Ligji nr. 9920/2008 “Për procedurat tatimore në Republikën e Shqipërisë”

Neni 1

Objekti i ligjit

1. Ky ligj rregullon procedurat për administrimin e detyrimeve tatimore në Republikën e Shqipërisë, si dhe parimet e organizimit e të funksionimit të administratës tatimore në Republikën e Shqipërisë.

2. Dispozitat e këtij ligji zbatohen për të gjitha llojet e tatimeve dhe të detyrimeve tatimore, me përjashtim të rasteve kur me ligje të veçanta është parashikuar ndryshe.

Neni 2

Fusha e veprimit (ndryshuar shkronja “ç” me ligjin nr. 179/2013, datë 28.12.2013) Ky ligj zbatohet për:

a) tatimpaguesit, administratën tatimore, agjentët tatimorë, agjentët e mbajtjes së tatimit në burim, si dhe për persona të tjerë, të përcaktuar nga legjislacioni tatimor;

b) personat e ngarkuar për të paguar, mbajtur, deklaruar dhe transferuar në Buxhetin e Shtetit kontributet, për sigurimet shoqërore dhe shëndetësore;

c) personat që paguajnë kontributet për sigurimet shoqërore dhe shëndetësore, për sa u përket pagesës dhe mbledhjes së kontributeve;

ç) sistemin e tatimeve, taksave dhe tarifave vendore, për aq sa nuk rregullohen me ligjin nr. 9632, datë 30.10.2006, “Për sistemin e taksave vendore”, të ndryshuar.

Neni 3

Legjislacioni tatimor Legjislacioni tatimor përbëhet nga:

a) marrëveshjet ndërkombëtare, të ratifikuara nga Kuvendi;

b) ligjet tatimore;

c) aktet nënligjore, të miratuara në mbështetje të ligjeve tatimore.

Neni 4

Llojet e tatimeve dhe të taksave

1. Tatimet dhe taksat janë kombëtare ose vendore.

2. Në tatimet dhe taksat kombëtare përfshihen:

a) tatimi mbi vlerën e shtuar;

b) tatimi mbi të ardhurat;

c) akciza;

ç) tatimi për lojërat e fatit, kazinotë dhe hipodromet;

d) taksat kombëtare;

dh) tatime të tjera, të cilat janë përcaktuar të tilla me ligj të veçantë.

3. Tatimet dhe taksat vendore përcaktohen në ligjin për sistemin e taksave vendore.

4. Kontributet e sigurimeve shoqërore dhe shëndetësore përcaktohen në ligjin për sigurimet shoqërore dhe shëndetësore.

Neni 5

Përkufizime (ndryshuar shkronja “a“ me ligjin nr. 62/2012, datë 24.5.2012; shtuar shkronja “j”me ligjin nr. 112/2016, datë 3.11.2016, ndryshuar pikat “g”, “h”, “j” dhe shtuar shkronjat “k”, “l”, “m”, “n” dhe “nj” me ligjin nr. 83/2022, datë 24.11.2022)

1. Në këtë ligj termat e mëposhtëm kanë këto kuptime:

a) “Administratë tatimore” përfshin Drejtorinë e Përgjithshme të Tatimeve, drejtoritë rajonale të ngarkuara për administrimin e tatimeve, taksave dhe kontributeve në nivel kombëtar dhe njësitë tatimore të qeverisjes vendore, të ngarkuara për administrimin e tatimeve, taksave dhe kontributeve në nivel vendor me përjashtim të akcizës. Nga data 1 tetor 2012 taksa e akcizës administrohet nga Drejtoria e Përgjithshme e Doganave.

b) “Agjent tatimor” është personi që mbledh dhe transferon në Buxhetin e Shtetit tatimet dhe taksat;

c) “Agjent i mbajtjes së tatimit në burim” është personi, të cilit, sipas legjislacionit tatimor, i kërkohet të llogarisë, të mbajë tatimin në burim për një tatimpagues, të raportojë dhe t’i transferojë këto tatime në Buxhetin e Shtetit;

ç) “Kontribut” është detyrimi monetar i detyrueshëm për t’u paguar si shpërblim për një shërbim specifik apo ushtrim të të drejtave, për sigurimin shoqëror dhe shëndetësor të të punësuarve;

d) “Libra dhe regjistrime” janë regjistrimet tregtare, dokumentacioni kontabël, llogaritë vjetore dhe raportet financiare, si dhe të gjitha dokumentet e tjera, që kanë të bëjnë me subjektin tatimpagues, korrespondencën e biznesit, faturat dhe dokumentet përkatëse, që duhen krijuar dhe mbajtur për përcaktimin e shumave të tatimeve, që duhen paguar nga tatimpaguesi;

dh) “Periudhë tatimore” është periudha e njëjtë me vitin kalendarik, me përjashtim të rasteve kur ky ligj ose ligje të tjera tatimore parashikojnë ndryshe;

e) “Përfaqësues i tatimpaguesit” është personi i autorizuar ligjërisht për të përfaqësuar tatimpaguesin në çështje tatimore;

ë) “Tatim” është pagesa e detyrueshme dhe e pakthyeshme në Buxhetin e Shtetit apo në buxhetin e organeve të qeverisjes vendore, e vendosur me ligj dhe që nuk bëhet në shkëmbim të mallrave dhe shërbimeve të caktuara;

f) “Taksë” është pagesa e detyrueshme dhe e pakthyeshme në Buxhetin e Shtetit apo në buxhetin e organeve të qeverisjes vendore, e vendosur me ligj dhe që paguhet nga çdo person, që ushtron një të drejtë publike apo përfiton një shërbim publik në territorin e Republikës së Shqipërisë. Dispozitat e këtij ligji për tatimet dhe detyrimet tatimore zbatohen njëlloj edhe për taksat;

g) “Tatimpagues” nënkupton çdo person që është:

i. subjekt i tatimeve sipas parashikimeve të shkronjave “a” deri në “dh” të pikës 2 të nenit 4 të këtij ligji;

ii. subjekt i tatimeve, taksave dhe tarifave vendore sipas pikës 3 të nenit 4 të këtij ligji;

iii. subjekt i pagesës së kontributeve të sigurimeve shoqërore dhe shëndetësore sipas legjislacionit përkatës në fuqi për kontributet e sigurimeve shoqërore dhe shëndetësore;

iv. agjent i mbajtjes së tatimit në burim në rastet kur parashikohet nga ky ligj apo ligjet e tjera tatimore.

gj) “Vend kryesor i biznesit” është vendi i administrimit efektiv të biznesit;

h) “Person i lidhur” nënkupton çdo person që është i lidhur me një person tjetër në një marrëdhënie që ndikon drejtpërdrejt ose tërthorazi në përcaktimin e bazës tatimore nëpërmjet menaxhimit, kontrollit apo pronësisë. Dy persona janë të lidhur nëse njëri ose të dy personat do të vepronin sipas udhëzimeve, kërkesave, sugjerimeve ose vullnetit të personit tjetër ose të një personi të tretë.

Personat e mëposhtëm do të trajtohen si persona të lidhur:

i. bashkëshorti, bashkëshortja, paraardhës dhe pasardhës, ndërmjet tyre ose ndërmjet njëri-tjetrit;

ii. një njësi ekonomike në të cilën çdo person zotëron drejtpërdrejt ose tërthorazi të paktën 50 për qind të të drejtave të votimit ose të menaxhimit, të drejtave të shpërndarjes së dividentit ose të drejtave të kapitalit;

iii. çdo dy ose më shumë njësi ekonomike në të cilën një person tjetër zotëron ose mbart të paktën 50 për qind të të drejtave të votimit ose menaxhimit, të drejtave të shpërndarjes së dividentit ose të drejtave të kapitalit në të dy njësitë ekonomike.

Kur zbatohen nënndarjet “ii” ose “iii” më sipër, zotërimi që i atribuohet një personi nga një person i lidhur nuk mund t’i atribuohet një personi tjetër të lidhur. Dy persona nuk do të konsiderohen të lidhur vetëm sepse njëri prej tyre konsiderohet i punësuar ose klient i personit tjetër, ose të dy konsiderohen të punësuar ose klientë të një personi të tretë, përveç rastit kur një marrëdhënie e tillë ndikon në përcaktimin e bazës tatimore, drejtpërdrejt ose në mënyrë indirekte.

j) “Ambulant” nënkupton një person tatimpagues, i cili tregton mallra ose shërbime për publikun pa pasur një vend biznesi fiks, por ushtron aktivitet në njësi të vetme tregtimi të lëvizshme, apo lejohet të tregtojë në ambiente publike të autorizuara nga strukturat e pushtetit vendor që administrojnë territorin dhe që për qëllime të pagesës së tatimeve dhe kontributeve regjistrohen si tatimpagues ambulant në administratën tatimore.

k) “person” nënkupton çdo person fizik dhe entitet;

l) “person fizik” nënkupton çdo individ, individ të vetëpunësuar apo individ tregtar. Ai përfshin të punësuarit, të vetëpunësuarit, tregtarët individualë, si dhe çdo person tjetër fizik, i cili ka të ardhura nga çdo burim, të ardhura të marra nga trashëgimitë apo dhurimet, apo fitime nga lojërat e fatit;

m) “entitet” nënkupton:

i.

çdo shoqëri apo çdo strukturë të organizimeve të korporuara apo jokorporuara (pavarësisht formës) të natyrës fitimprurëse ose jofitimprurëse;

ii. organizatat fitimprurëse dhe jofitimprurëse;

iii. ndonjë formë “trusti” të huaj, apo strukture të ngjashme;

iv. ndonjë formë partnership-i apo ndonjë entitet të natyrës personale;

v. çdo formë të joint-venture;

vi. çdo formë kompanie menaxhimi kapitalesh apo asetesh;

vii. çdo formë e shoqërive sipas Kodit Civil apo ligjit të shoqërive tregtare;

viii. partnership-et pasive apo në “fjetje”;

n) “individ i vetëpunësuar” nënkupton çdo person fizik i angazhuar në furnizimin e çdo lloj shërbimi, apo i angazhuar në veprimtari të tjera profesionale, të ndryshme nga veprimtaria tregtare;

nj) “individ tregtar” nënkupton çdo person fizik të angazhuar në veprimtari tregtare.

Neni 6

Detyrimi tatimor (shtuar fjalë në shkronjat “a”dhe “b” të pikës 4 me ligjin nr. 112/2016, datë 3.11.2016)

1. Detyrimi tatimor lind kur personi realizon të ardhura, kur bëhet pronar i një pasurie apo kryen pagesa, të cilat janë objekt i tatimit, sipas legjislacionit tatimor.

2. Detyrimi tatimor lind edhe kur personi realizon të ardhura, kryen pagesa, në formë të jashtëligjshme, apo bëhet zotërues i një sendi, në forma të jashtëligjshme. Kur personi bëhet zotërues i një sendi në forma të jashtëligjshme, ky detyrim përllogaritet për të gjithë periudhën në të cilën personi ka gëzuar frytet e kësaj pasurie.

3. Detyrimi tatimor përfshin tatimin, kamatëvonesat, si dhe gjobat, për rastet e parashikuara nga ky ligj.

4. Detyrimi tatimor për individë të vdekur ose shoqëri të likuiduara përcaktohet si më poshtë:

a) në rastin e një personi të vdekur, detyrimi tatimor pushon në datën e vdekjes dhe trashëgimtarët ligjorë, në përputhje me dispozitat e Kodit Civil, janë përgjegjës për llogaritjen dhe pagesën e tatimeve të këtij personi;

b) në rastin e një personi juridik të likuiduar, detyrimi tatimor pushon në datën e likuidimit dhe likuidatori ose përfaqësuesi, i caktuar ligjërisht, në përputhje me ligjin për tregtarët dhe shoqëritë tregtare, është përgjegjës për llogaritjen dhe pagesën e tatimit të këtij personi.

5. Detyrimet tatimore llogariten dhe paguhen në monedhë kombëtare, përveç rasteve kur me ligj parashikohet ndryshe.

Neni 7

Të drejtat dhe detyrimet e agjentit të mbajtjes së tatimit (hequr fjalë me ligjin nr. 164/2014, datë 4.12.2014)

1. Me përjashtim të rastit kur ligji e përcakton ndryshe, agjenti i mbajtjes së tatimit ka të njëjtat të drejta dhe detyrime me një tatimpagues.

2. Agjenti i mbajtjes së tatimit ka edhe këto detyra plotësuese:

a) të llogarisë saktësisht dhe të mbajë tatimin për një tatimpagues;

b) të paguajë tatimin në Buxhetin e Shtetit, në datën e përcaktuar në ligj;

c) të mbajë regjistrime për të ardhurat e paguara dhe për tatimet e mbajtura të gjithë tatimpaguesve dhe të pagesave, të transferuara në Buxhetin e Shtetit;

ç) t’i japë administratës tatimore informacion të saktë për deklaratat e tatimpaguesve në datën e duhur, të përcaktuar në ligj;

d) të kryejë të gjitha detyrat e tjera, të parashikuara nga dispozitat ligjore ne fuqi.

Neni 8

Tatimpaguesi rezident dhe jorezident (ndryshuar me ligjin me ligjin nr. 83/2022, datë 24.11.2022) Personat rezidentë dhe jorezidentë kanë kuptimin si në ligjin për tatimin mbi të ardhurat.

Neni 9

Caktimi i përfaqësuesi tatimor të personave jorezidentë (ndryshuar fjalë në pikën 1 me ligjin nr. 124/2012, datë 20.12.2012)

1. Tatimpaguesi jorezident emëron një përfaqësues tatimor rezident dhe regjistrohet pranë Drejtorisë Rajonale Tatimore, kur kjo i kërkohet nga legjislacioni në fuqi.

2. Tatimpaguesi jorezident mund të mos emërojë përfaqësues tatimor, në njërën nga rastet kur:

a) të gjitha të ardhurat, me burim në Shqipëri, janë objekt i tatimit përfundimtar, të mbajtur në burim;

b) tatimpaguesi e dorëzon vetë deklaratën tatimore.

Neni 10

Udhëzimet teknike (ndryshuar fjalia e dytë dhe e tretë e pikës 2, shtuar pika 3 me ligjin nr. 112/2016, datë 3.11.2016)

1. Ministri i Financave nxjerr udhëzim të përgjithshëm në zbatim të këtij ligji.

2. Drejtori i Përgjithshëm i Tatimeve, me kërkesë të tatimpaguesit, dhe, kur është e nevojshme, nxjerr vendim për qëndrimin zyrtar të administratës tatimore, në zbatim të legjislacionit tatimor, për rrethana specifike të tatimpaguesit. Vendimi publikohet brenda 5 ditëve kalendarike në faqen zyrtare të DPT-së, në rubrikën përkatëse të vendimeve teknike, duke ruajtur konfidencialitetin e të dhënave të biznesit të tatimpaguesit. Vendimi bëhet detyrues për tatimpaguesin në datën kur ai merr njoftim për të në njërën nga format e parashikuara në Kodin e Procedurave Administrative dhe zbatohet njëlloj nga strukturat e administratës tatimore qendrore, për raste të tjera, të ngjashme.

3. Drejtoria e Përgjithshme e Tatimeve, në fund të muajit korrik dhe dhjetor të çdo viti, përgatit komentarë përmbledhës të vendimeve teknike, në lidhje me mënyrën e trajtimit tatimor të rasteve specifike, duke i grupuar ato sipas natyrës së tyre. Këta komentarë përmbledhës publikohen në faqen zyrtare të DPT-së në muajin pasardhës.

Neni 11

Negocimi i marrëveshjeve ndërkombëtare

1. Ministria e Financave është, sipas rastit, autoritet nënshkrues apo palë në negociatat, që zhvillohen për të gjitha marrëveshjet ndërkombëtare, me efekte tatimore.

2. Autoriteti nënshkrues dhe miratues i këtyre marrëveshjeve vepron në përputhje me ligjin “Për lidhjen e marrëveshjeve dhe traktateve ndërkombëtare”.

KREU II PARIMET, ORGANIZIMI DHE PERSONELI I ADMINISTRATËS TATIMORE

Neni 12

Parimet e administrimit tatimor Në administrimin e sistemit tatimor të Republikës së Shqipërisë administrata tatimore udhëhiqet nga parimet e mëposhtme:

a) zbatimi i njëjtë dhe efektiv i legjislacionit nga ana e administratës tatimore;

b) vetëvlerësimi dhe vetëdeklarimi i detyrimit tatimor nga ana e tatimpaguesit;

c) nxitja e respektimit vullnetar të legjislacionit tatimor, nëpërmjet informimit, edukimit dhe publikimit të akteve nënligjore;

ç) hartimi i strategjive dhe marrja e masave përkatëse për pakësimin e rreziqeve që rezultojnë nga mosrespektimi i legjislacionit tatimor;

d) bashkëpunimi me organet tatimore vendase dhe ndërkombëtare, në funksion të globalizimit të ekonomive botërore;

dh) ndjekja e ndryshimeve në mjediset e biznesit dhe atij legjislativ, si dhe përshtatja e sistemeve të organizimit të burimeve, të teknologjisë së informacionit dhe proceseve të punës, për arritjen e efiçencës dhe të efektivitetit të duhur;

e) nxitja e veprimtarive elektronike, sidomos të deklarimit dhe pagesës elektronike të detyrimit tatimor;

ë) rekrutimi, trajnimi dhe ngritja në detyrë e punonjësve tatimorë, të ndershëm, të sjellshëm dhe të drejtë dhe që, për çdo rast, zbatojnë ligjin, aktet nënligjore dhe vendimet, në bazë të fakteve objektive.

Neni 13

Organizimi i administratës tatimore

1. Administrata tatimore përbëhet nga:

a) administrata tatimore qendrore, ku përfshihen Drejtoria e Përgjithshme e Tatimeve, drejtoritë rajonale dhe njësitë e tjera të saj;

b) administrata tatimore vendore, ku përfshihen zyrat tatimore, nën autoritetin e qeverisjes vendore.

2. Administrata tatimore qendrore është institucion qendror, në varësi të Ministrit të Financave.

Neni 14

Drejtoria e Përgjithshme e Tatimeve, drejtoritë rajonale dhe njësitë e tjera

1. Drejtoria e Përgjithshme e Tatimeve është autoriteti tatimor qendror i vetëm në Republikën e Shqipërisë, që zbaton dhe administron tatimet kombëtare, pagesat publike dhe mbledhjen e kontributeve, siç parashikohet në nenin 4 të këtij ligji.

2. Drejtoria rajonale varet nga Drejtori i Përgjithshëm i Tatimeve.

3. Drejtoria rajonale drejtohet nga drejtori i drejtorisë rajonale.

Neni 15

Zyrat tatimore të qeverisjes vendore (ndryshuar me ligjin nr. 179/2013, datë 28.12.2013, nr. 83/2022, datë 24.11.2022) Zyrat tatimore të qeverisjes vendore funksionojnë dhe administrojnë taksat, tarifat dhe pagesat publike vendore në përputhje me legjislacionin në fuqi për sistemin e taksave vendore.

Neni 16

Struktura e administratës tatimore qendrore (shtuar shkronja “e “ me ligjin nr. 10209, datë 23.12.2009; shtuar shkronja “ë” e pikës 3 me ligjin nr. 10 261, datë 1.4.2010; shtuar shkronja “f“ në pikën 3 me ligjin nr. 91/2015, datë 23.7.2015; ndryshuar pika 3 e shfuqizuar pika 4, ndryshuar fjalë në pikën 6 me ligjin nr. 112/2016, datë 3.11.2016, ndryshuar pika 3 me ligjin nr. 83/2022, datë 24.11.2022)

1. Struktura organizative dhe numri i përgjithshëm i personelit të administratës tatimore qendrore miratohen nga Kryeministri, me propozimin e Ministrit të Financave, pas bashkërendimit me DAP-in.

2. Organigrama e administratës tatimore qendrore miratohet nga Ministri i Financave, me propozimin e drejtorit të Përgjithshëm të Tatimeve.

3. Administrata tatimore qendrore është e organizuar në drejtori dhe njësi të tjera sipas funksioneve të mëposhtme:

a) funksionet bazë dhe operacionale, ku bëjnë pjesë:

i. shërbimi, regjistrimi dhe edukimi i tatimpaguesit;

ii. menaxhimi i riskut, kontrolli i tatimpaguesve, kontabiliteti dhe statistika;

iii. mbledhja e detyrimeve tatimore të papaguara/zbatimi i masave shtrënguese;

iv. hetimi tatimor, verifikimi në terren;

v. investigimi i brendshëm antikorrupsion, auditi i brendshëm.

b) funksionet mbështetëse, ku bëjnë pjesë:

i. financa dhe buxheti;

ii. rimbursimi i tatimeve;

iii. shërbimi teknik dhe ligjor;

iv. shërbimet mbështetëse;

v. burimet njerëzore;

vi. marrëdhëniet me jashtë dhe menaxhimi i projekteve;

vii. proceset e biznesit.

4. Shfuqizuar.

5. Funksionet dhe detyrat e Drejtorisë së Përgjithshme të Tatimeve, drejtorive rajonale, të secilës drejtori, si dhe të njësive të tjera të administratës tatimore qendrore përcaktohen me rregullore të brendshme, e cila propozohet nga Drejtori i Përgjithshëm i Tatimeve dhe miratohet nga Ministri i Financave.

6. Ministri i Financave mund të vendosë që, në përputhje me legjislacionin në fuqi, të nënkontraktohen subjekte private, të specializuara, për realizimin e funksioneve të parashikuara në pikën 3 shkronja “b” e këtij neni.

Neni 17

Marrëdhënia e punës për drejtorin dhe zëvendësdrejtorët e përgjithshëm të tatimeve (Ndryshuar me ligjin nr. 112/2016, datë 3.11.2016)

1. Organ drejtues i administratës tatimore qendrore është Drejtori i Përgjithshëm i Tatimeve.

2. Drejtori i Përgjithshëm i Tatimeve emërohet, lirohet, apo shkarkohet nga detyra me vendim të Këshillit të Ministrave, me propozim të Ministrit të Financave.

3. Zëvendësdrejtorët e përgjithshëm të tatimeve janë nëpunës civilë dhe emërohen e lirohen në përputhje me dispozitat e legjislacionit për nëpunësin civil, sipas propozimit të Ministrit të Financave.

Neni 18

Struktura e apelimit tatimor (Ndryshuar me ligjin nr. 112/2016, datë 3.11.2016)

1. Drejtoria e Apelimit Tatimor, pjesë përbërëse e strukturës organike të Ministrisë së Financave, është funksion i pavarur në vendimmarrje që shqyrton dhe merr vendim ndaj ankimit administrativ tatimor për vlera deri në një shumë të përcaktuar me vendim të Këshillit të Ministrave. Drejtori i Drejtorisë së Apelimit Tatimor emërohet dhe lirohet sipas dispozitave të legjislacionit për nëpunësin civil.

2. Për shqyrtimin dhe vendimmarrjen e apelimeve tatimore, për vlera mbi shumën e përcaktuar me vendim të Këshillit të Ministrave, në Ministrinë e Financave ngrihet Komisioni për Shqyrtimin e Apelimit Tatimor, në përbërje të të cilit janë 7 anëtarë, tre përfaqësues të Ministrisë së Financave, dy përfaqësues të Drejtorisë së Përgjithshme të Tatimeve, Drejtori i Apelimit Tatimor dhe një përfaqësues i Avokaturës së Shtetit.

3. Procedurat e funksionimit të Komisionit për Shqyrtimin e Apelimeve Tatimore, përfshirë përbërjen, kryesimin, sekretariatin, ndryshimin e anëtarëve dhe masën e shpërblimit të tyre, si dhe procedurat e shqyrtimit të ankimit e të vendimmarrjes dhe kufiri i vlerës objekt ankimi, vendimmarrja e të cilave bëhet nga ky komision, përcaktohen me vendim të Këshillit të Ministrave.

4. Drejtoria e Apelimit Tatimor dhe Komisioni për Shqyrtimin e Apelimeve Tatimore për procesin e ankimit administrativ tatimor u nënshtrohen dispozitave të kreut XIII të këtij ligji.

Neni 19

Marrëdhënia e punës për personelin e administratës tatimore (Ndryshuar me ligjin nr. 99/2015, datë 23.9.2015 dhe nr. 112/2016, datë 3.11.2016)

1. Marrëdhëniet e punës së nëpunësve të administratës tatimore rregullohen sipas dispozitave të legjislacionit për nëpunësin civil, përveç rasteve kur në këtë ligj parashikohet ndryshe.

2. Marrëdhëniet e punës së punonjësve të tjerë të administratës tatimore që nuk i nënshtrohen legjislacionit për nëpunësin civil, rregullohen në bazë të dispozitave të Kodit të Punës.

Neni 20

Punësimi dhe kategoritë e punësimit (Ndryshuar me ligjin nr. 112/2016, datë 3.11.2016)

1. Përveçse kur në këtë ligj përcaktohet ndryshe, Drejtori i Përgjithshëm i Tatimeve merr masat për respektimin e dispozitave ligjore për procedurat e punësimit e të rekrutimit të personelit të administratës tatimore qendrore, sipas pikës 2, të nenit 19, të këtij ligji, marrëdhënia e punës e të cilëve rregullohet në përputhje me Kodin e Punës.

2. Për kategorinë e punonjësve, sipas pikës 1, të nenit 19, të këtij ligji, procedurat e punësimit, të lëvizjes paralele e të ngritjes në detyrë të tyre kryhen në përputhje me dispozitat e ligjit për nëpunësin civil.

3. Nivelet e pagave për çdo kategori miratohen sipas legjislacionit të fushës në fuqi.

Neni 21

Shpërblimet e personelit dhe shpenzimet për investime (Ndryshuar me ligjin nr. 164/2014, datë 4.12.2014)

1. Drejtorisë së Përgjithshme të Tatimeve i lihet deri në 2 për qind të të ardhurave tatimore të mbledhura, për t’u përdorur për investime për përmirësimin dhe modernizimin e infrastrukturës së mbledhjes së të ardhurave dhe për shpërblime stimuluese të personelit të administratës tatimore.

2. Personelit të administratës tatimore i jepen shpërblime stimuluese për:

a) efektivitetin e shërbimit të kryer në organet tatimore;

b) kryerjen e një shërbimi me rrezikshmëri të veçantë.

3. Me vendim të Këshillit të Ministrave përcaktohen rregullat për miratimin e investimeve dhe dhënien e shpërblimeve.

4. Ministri i Financave me urdhër miraton çdo vit masën për investimet dhe për shpërblimet stimuluese të personelit, sipas pikës 1 të këtij neni.

Neni 22

Procedura disiplinore (Shtuar pika 4 me ligjin nr. 99/2015, datë 23.9.2015; ndryshuar me ligjin nr. 112/2016, datë 3.11.2016) 1.Procedurat për shkeljet dhe masat disiplinore të nëpunësve të administratës tatimore qendrore, që janë nëpunës civilë, bëhen në përputhje me ligjin për nëpunësin civil.

2. Për punonjësit e tjerë të administratës tatimore qendrore zbatohen dispozitat e Kodit të Punës.

3. Për zbatimin e pikës 2, të këtij neni, Drejtori i Përgjithshëm i Tatimeve miraton një rregullore të brendshme të institucionit, në të cilën detajohen rastet e shkeljeve disiplinore, në përputhje me legjislacionin në fuqi.

KREU III DISPOZITA ADMINISTRATIVE TË PËRGJITHSHME

Neni 23

Mënyrat e komunikimit me tatimpaguesin (Ndryshuar pikat 2 dhe 3 me ligjin nr. 84/2014, datë 17.7.2014; ndryshuar lidhëza n[ pikën 2 dhe shtuar pika 3/1 me ligjin nr. 112/2016, datë 3.11.2016; ndryshuar pikat 2, 3 dhe 4 me ligjin nr. 79/2025, datë 11.12.2025)

1. Administrata tatimore mund të kërkojë përdorimin nga tatimpaguesit të formularëve të veçantë, për dorëzimin e dokumentacionit, informacionit apo kërkesave. Kur nuk kërkohet formular, çdo komunikim, i kërkuar sipas legjislacionit tatimor, dërgohet në mënyrë elektronike ose dorëzohet me shkrim, me përjashtim të rasteve kur parashikohet ndryshe.

2. Vlerësimet, njoftimet, vendimet dhe komunikimet zyrtare të administratës tatimore, drejtuar tatimpaguesit, i njoftohen atij duke ia dërguar në llogarinë e tij elektronike në sistemin tatimor “e-filing” dhe/apo nëpërmjet shërbimit postar rekomande.

3. Vlerësimet, njoftimet, vendimet dhe komunikimet zyrtare të administratës tatimore, drejtuar tatimpaguesit, i njoftohen atij duke ia dërguar në llogarinë e tij elektronike në sistemin tatimor “e-filing” dhe/apo nëpërmjet shërbimit postar rekomande.

3/1. Për qëllime të përcaktimit të fillimit të afatit për marrjen e akteve tatimore, sipas këtij ligji, në llogaritjen e afateve në përputhje me Kodin e Procedurave Administrative nuk përfshihet dita në të cilën del akti. Llogaritja e afatit fillon nga e nesërmja e ditës kur akti është marrë ose konsiderohet të jetë marrë nga tatimpaguesi.

4. Tatimpaguesi është i detyruar të deklarojë të dhëna të sakta të lidhura me adresën dhe postën elektronike, në mënyrë që të sigurojë marrjen në kohë të njoftimeve.

5. Ministri i Financave, në zbatim të këtij neni, me propozimin e Drejtorit të Përgjithshëm të Tatimeve, miraton llojet e dokumentacionit, të dhënat, që duhet të përfshihen në informacion, si dhe procedurat e dërgimit pranë administratës tatimore.

Neni 24

Dhënia e informacionit tatimor nga administrata tatimore

1. Informacioni tatimor për tatimpaguesin, i administruar nga administrata tatimore, u ofrohet pa pagesë autoriteteve të përcaktuara në këtë nen, pas depozitimit të kërkesës me shkrim dhe kur verifikohen rrethanat e mëposhtme:

a) gjyqtarit, nëse është në gjykim ose në hetim të një çështjeje civile, të lidhur me një tatimpagues, për pjesën që u takon marrëdhënieve të tij me administratën tatimore;

b) gjyqtarit apo prokurorit, nëse është në gjykim ose në hetim të një çështjeje penale, të lidhur me një tatimpagues, për pjesën që u takon marrëdhënieve të tij me administratën tatimore;

c) Kontrollit të Lartë të Shtetit, vetëm për rastet, kur kërkesa e bërë është në funksion të kontrollit të kryer nga ky institucion ndaj administratës tatimore, në funksion të hartimit të rekomandimeve të veta;

ç) autoritetit të ngjashëm të huaj, me të cilin Kuvendi ka ratifikuar marrëveshje ndërkombëtare dhe informacioni kërkohet në kuadër të ekzekutimit të marrëveshjes;

d) autoritetit homolog të huaj ose autoriteteve vendase, me të cilat Drejtoria e Përgjithshme e Tatimeve ka nënshkruar marrëveshje bashkëpunimi dy ose shumëpalëshe, me objekt shkëmbimin e informacionit;

dh) institucioneve të pavarura, të krijuara me ligj;

e) çdo autoriteti tjetër, sipas parashikimit të bërë me ligj të veçantë.

Neni 25

Konfidencialiteti

1. Nëpunësit dhe punonjësit e administratës tatimore, qendrore, dhe vendore, ruajnë konfidencialitetin e të dhënave tatimore dhe financiare të tatimpaguesit, që i kanë siguruar gjatë kryerjes së detyrës. Kjo pikë nuk zbatohet për detyrimet tatimore, për të cilat kanë filluar procedurat e mbledhjes me forcë.

2. Detyrimi për ruajtjen e konfidencialitetit vazhdon edhe pasi nëpunësi apo punonjësi nuk është më i punësuar pranë administratës tatimore.

3. Informacioni i lidhur me tatimpaguesin përdoret brenda administratës tatimore, vetëm në masën e kërkuar për administrimin e tatimeve.

4. Kushti i ruajtjes së konfidencialitetit përfundon në rastet kur tatimpaguesi heq dorë, me shkrim, nga e drejta e tij për ruajtjen e konfidencialitetit dhe për aq sa është e lejuar në deklarimin e bërë nga tatimpaguesi.

5. Shkëmbimi i informacionit, i bërë në ekzekutim të marrëveshjeve të lidhura nga administrata tatimore, bëhet me kushtin e ruajtjes së konfidencialitetit për institucionet dhe individët, që marrin dijeni për të dhënat tatimore.

Neni 26

Shmangia e konfliktit të interesit (Shtuar pika 4 me ligjin nr. 99/2015, datë 23.9.2015)

1. Nëpunësit dhe punonjësit e administratës tatimore zbatojnë, në mënyrë të drejtë e të paanshme, ligjet tatimore dhe nuk administrojnë, ndikojnë apo orientojnë tatimpaguesin në veprimtarinë e tij, si dhe deklarojnë paraprakisht rastet, kur kanë lidhje të drejtpërdrejtë ose të tërthortë me tatimpaguesin.

2. Nëpunësit e administratës tatimore nuk mund të kontrollojnë apo vlerësojnë tatimet e veta apo të personave të lidhur me ta, me përjashtim të rasteve të vetëvlerësimit.

3. Nëpunësit e administratës tatimore nuk mund të punësohen, me kohë të pjesshme apo të plotë, në veprimtari të tjera me pagesë, me përjashtim të veprimtarisë së mësimdhënies.

4. Nëpunësi i administratës tatimore qendrore dhe vendore, që gëzon statusin e nëpunësit civil, ndalohet që të ketë zyrë të kontabilitetit apo të konsulencës fiskale në pronësi të tij apo të afërmve të tij, deri në shkallën e dytë, sipas Kodit Civil, dhe personave të lidhur, sipas ligjit për konfliktin e interesave. Kjo situatë përbën konflikt interesi dhe ndaj nëpunësit të administratës tatimore qendrore dhe vendore, që gëzon statusin e nëpunësit civil, merren masat e parashikuara nga legjislacioni në fuqi për shmangien e konfliktit të interesave, si dhe masa e largimit nga puna me pa të drejtë punësimi në administratën tatimore.

Neni 27

Publikimi i informacionit tatimor

1. Administrata tatimore mund ta publikojë informacionin e mbledhur gjatë veprimtarisë së saj, me qëllim përdorimin e të dhënave tatimore në hartimin e statistikave.

2. Publikimi bëhet në mënyrë dhe formë, që nuk lejon identifikimin e tatimpaguesit specifik.

Neni 28

Informimi i publikut (Shtuar pika 3 me ligjin nr. 164/2014, datë 4.12.2014; ndryshuar me ligjin nr. 112/2016, datë 3.11.2016)

1. Administrata tatimore ka për detyrë që, duke përdorur të gjitha mjetet e komunikimit, përfshirë median e shkruar dhe atë elektronike, të informojë publikun për përmbajtjen, rolin dhe rëndësinë e legjislacionit tatimor. Drejtoria e Përgjithshme e Tatimeve publikon materiale sqaruese, komentarë dhe materiale të tjera shpjeguese, në lidhje me legjislacionin tatimor.

Drejtoria e Përgjithshme e Tatimeve, duke ruajtur të dhënat konfidenciale të tatimpaguesit, për qëllime të informimit, publikon në faqen e saj zyrtare të internetit opinionet e nxjerra prej saj, që japin qëndrime për zbatimin e legjislacionit tatimor.

2. Për qëllime të informimit të publikut, për ligjet e reja tatimore, ndryshimet e bëra për legjislacionin tatimor dhe për aktet nënligjore, të dala në zbatim të tij, bëhet publikimi i akteve nëpërmjet medias së shkruar dhe asaj elektronike, si dhe përmes faqes zyrtare të internetit të Drejtorisë së Përgjithshme të Tatimeve, jo më vonë se 15 ditë nga data e hyrjes në fuqi të tyre.

Administrata tatimore publikon dhe mban të përditësuara aktet ligjore dhe nënligjore tatimore, sipas përcaktimit të bërë në udhëzimin e Ministrit të Financave.

3. Drejtoria e Përgjithshme e Tatimeve publikon në faqen e saj të internetit çdo gjashtë muaj një buletin informues mbi vendimet e formës së prerë të Gjykatës Administrative të Apelit, të Gjykatës së Lartë dhe të Gjykatës Kushtetuese për çështjet tatimore, me qëllim informimin e tatimpaguesve dhe në bazë të të cilave, për raste të unifikuara, reflekton rast pas rasti vendimet teknike, të cilat zbatohen për raste të tjera të ngjashme.

Neni 29

Dosja e detyrimeve tatimore (Shtuar pika 4 me ligjin nr. 179/2013, datë 28.12.2013)

1. Administrata tatimore krijon dhe përditëson dosjen e detyrimeve tatimore, ku regjistrohen të gjitha detyrimet e tatimpaguesit, sipas kategorisë së detyrimit, interesat, gjobat dhe pagesat, që i takojnë tatimpaguesit.

2. Forma, mënyra dhe afati i ruajtjes së të dhënave të dosjes përcaktohen me rregullore, të miratuar nga Drejtori i Përgjithshëm i Tatimeve.

3. Administrata tatimore vë në dispozicion dhe garanton, në rrugë elektronike, aksesin e tatimpaguesit në dosjen e tij. Në rastet kur tatimpaguesi nuk mund të përdorë rrugën elektronike të marrjes së të dhënave, administrata tatimore vë në dispozicion kopje të dokumenteve të dosjes, sipas kërkesës me shkrim të tatimpaguesit.

4. Drejtoria e Përgjithshme e Tatimeve krijon sistemin qendror të të dhënave për secilin tatimpagues.

KREU IV TË DREJTAT E TATIMPAGUESIT

Neni 30

E drejta për informim dhe asistencë

1. Çdo tatimpagues ka të drejtë që, me qëllim kuptimin dhe zbatimin e legjislacionit tatimor, të marrë informacion dhe të asistohet pa shpërblim nga administrata tatimore. Brenda strukturës së administratës tatimore krijohen strukturat përgjegjëse për shërbimin e tatimpaguesve.

2. Çdo tatimpagues ka të drejtën e trajtimit të paanshëm, profesional dhe etik nga administrata tatimore, për çështje, që kanë të bëjnë me detyrimet tatimore.

Neni 31

E drejta për konfidencialitetin e të dhënave

1. Çdo tatimpagues ka të drejtën e konfidencialitetit për të dhënat e veta tatimore e financiare, të administruara nga administrata tatimore.

2. E dhënë tatimore dhe financiare është çdo informacion, i cili merret nga administrata tatimore, gjatë ushtrimit të funksioneve, tek tatimpaguesi ose palët e treta.

Neni 32

E drejta për njoftim Çdo tatimpagues ka të drejtë të marrë njoftim për çdo akt administrativ, veprim ose mosveprim, të bërë për mbledhjen e detyrimeve tatimore, i cili prek pasurinë e tij, me përjashtim të rasteve kur administrata tatimore vlerëson se ekziston rreziku real që, pas marrjes së njoftimit, tatimpaguesi ta transferonte pronësinë para përfundimit të vlerësimit tatimor.

Neni 33

E drejta për kontrolle të arsyeshme Tatimpaguesi ka të drejtë t’i sigurohen kontrolle të arsyeshme, të cilat të kryhen në kohë të arsyeshme, në vendin e duhur dhe brenda afateve, sipas dispozitave të këtij ligji.

Neni 34

E drejta për informim

1. Në rastin e një mosmarrëveshjeje për vlerësimin tatimor, të bërë nga administrata tatimore tatimpaguesi ka të drejtë të marrë përgjigje me shkrim, në lidhje me arsyet dhe mënyrën e vlerësimit dhe të vendimit të marrë.

2. Në bazë të kërkesës me shkrim të tatimpaguesit, administrata tatimore lëshon vërtetim për të ardhurat e tatueshme, për detyrimet tatimore të mbetura, si dhe për pagesat e kryera nga tatimpaguesi.

Neni 35

E drejta për përfaqësim

1. Tatimpaguesi ka të drejtë të emërojë një përfaqësues, me prokurë, i cili përfaqëson atë në raport me administratën tatimore.

2. Tatimpaguesi mbetet personalisht përgjegjës për përmbushjen e detyrimeve tatimore edhe në rastin e emërimit të përfaqësuesit me prokurë.

Neni 36

E drejta për të kërkuar evidenca me shkrim apo në rrugë elektronike Tatimpaguesi ka të drejtë të kërkojë nga administrata tatimore, në rrugë elektronike apo me shkrim, kopje të njësuara me origjinalin, për çdo dokument, që ndodhet në dosjen e hapur për të, apo të kërkojë kopje të printuara dhe të certifikuara të të dhënave elektronike, të lidhura me të.

Neni 37

E drejta për t’u dëgjuar Tatimpaguesi, përpara marrjes së një vendimi administrativ për të dhe pasurinë e tij, ka të drejtën të dëgjohet nga administrata tatimore.

Neni 38

E drejta e ankimit (Ndryshuar me ligjin nr. 112/2016, datë 3.11.2016)

1. Tatimpaguesi gëzon të drejtën të ankohet dhe të sigurohet për një shqyrtim të pavarur administrativ të çështjeve të lidhura me të, në përputhje me kreun XIII, të këtij ligji.

2. Tatimpaguesi gëzon të drejtën gjithashtu të ankohet në rrugë administrative, në përputhje me Kodin e Procedurave Administrative, në Drejtorinë Rajonale Tatimore ose në Drejtorinë e Përgjithshme të Tatimeve, për çdo veprim apo mosveprim të punonjësve të administratës tatimore qendrore që shkelin të drejtat e tatimpaguesit.

Neni 38/1 Këshilli Tatimor si organ këshillimor (Shtuar me ligjin nr. 10261, datë 1.4.2010)

1. Pranë Ministrit të Financave krijohet Këshilli Tatimor, si organ këshillimor.

2. Këshilli Tatimor është forum teknik këshillimi dhe bashkëpunimi për dhe ndërmjet Ministrisë së Financave, Drejtorisë së Përgjithshme të Tatimeve dhe tatimpaguesve.

3. Këshilli Tatimor ka për qëllim diskutimin e problematikave dhe propozimin e masave, që do të bënin të mundur zbatimin e legjislacionit tatimor me një kosto më të ulët administrative për administratën tatimore dhe me një kosto më të ulët financiare për tatimpaguesit.

4. Këshilli Tatimor ka këto funksione:

a) shqyrtimin e procedurave të deklarimit e të pagimit të tatimeve, me synim përmirësimin dhe lehtësimin e tyre;

b) shqyrtimin e vështirësive, që hasin tatimpaguesit në plotësimin e të drejtave që parashikohen nga legjislacioni tatimor;

c) propozimin e masave për të garantuar respektimin e të drejtave të tatimpaguesve;

ç) propozimin e ndryshimeve të procedurave, për të mundësuar plotësimin vullnetar të detyrimeve tatimore me një kosto më të ulët administrative për administratën tatimore dhe me një kosto më të ulët financiare për tatimpaguesit;

d) hartimin e materialeve të shkruara të propozimeve për masat që mund të merren për përmirësimin e procedurave të deklarimit e të pagimit vullnetar të tatimeve;

dh) hartimin e materialeve të shkruara të propozimeve për plane konkrete bashkëpunimi, ndërmjet shoqatave profesionale tatimore, shoqatave të biznesit dhe Drejtorisë së Përgjithshme të Tatimeve, lidhur me informimin dhe edukimin e tatimpaguesve;

e) organizimin e seminareve e të trajnimeve të përbashkëta për punonjësit e administratës tatimore dhe të organizatave profesionale tatimore të tatimpaguesve.

5. Këshilli Tatimor mund t’i propozojë Ministrit të Financave ndryshime në dispozitat ligjore e nënligjore tatimore, që lidhen me objektin e vet të veprimtarisë.

6. Burimet e financimit të Këshillit Tatimor janë:

a) Buxheti i Shtetit;

b) kontributi i anëtarëve që përfaqësojnë tatimpaguesit;

c) burime të tjera të ligjshme financiare, të dhëna në formë donacioni nga institucione apo nga organizata kombëtare apo ndërkombëtare, për financimin e veprimtarive që lidhen me objektin e vet.

7. Përbërja dhe mënyra e funksionimit të Këshillit Tatimor, si dhe kontributet financiare të anëtarëve që përfaqësojnë tatimpaguesit në të përcaktohen me vendim të Këshillit të Ministrave.

KREU V DETYRIMI I TATIMPAGUESIT PËR REGJISTRIM

Neni 39

Regjistri i individëve (Ndryshuar me ligjin me ligjin nr. 83/2022, datë 24.11.2022)

1. Administrata tatimore mban regjistër të veçantë të individëve sipas të dhënave të gjendjes civile, të cilët kanë fituar zotësi të plotë për të vepruar, për efekt të deklarimit nga ana e tyre të të ardhurave individuale të realizuara.

2. E dhëna bazë e identifikimit të tatimpaguesit individ, për qëllime tatimore, është numri personal sipas Regjistrit Kombëtar të Gjendjes Civile.

3. Përbërësit e gjendjes civile të tatimpaguesit dhe çdo përditësim i tyre shkëmbehen nëpërmjet platformës qeveritare të ndërveprimit në përputhje me legjislacionin në fuqi.

4. Individët që mbartin detyrimin ligjor të dorëzimit të deklaratës individuale të të ardhurave vjetore, të cilët nuk e përmbushin këtë detyrim, njoftohen nga administrata tatimore me qëllim vetëpërmbushjen.

5. Nëse individi nuk përmbush detyrimin sipas pikës 4 të këtij neni, drejtorisë rajonale të juridiksionit i lind e drejta të kryejë vlerësimin e detyrimeve tatimore përkatëse.

Neni 40

Regjistrimi i personave, që ushtrojnë veprimtari tregtare dhe jotregtare (Ndryshuar titulli me ligjin nr. 10209, datë 23.12.2009; ndryshuar pika 4, shtuar pika 4/1 me ligjin nr. 84/2014, datë 17.7.2014; shtuar pikat 2.1 dhe 2.2 me ligjin nr. 99/2015, datë 23.9.2015; ndryshuar pika 2.2, shkronja “ç” e pikës 4, me ligjin nr. 112/2016, datë 3.11.2016; shtuar një fjali në pikën 1 me ligjin nr. 97/2018, datë 3.12.2018; shtuar pika 1/1 me ligjin nr. 79/2025, datë 11.12.2025)

1. Personat fizikë dhe juridikë ushtrojnë veprimtari ekonomiko-tregtare vetëm pas regjistrimit të tyre, në përputhje me ligjin nr. 9723, datë 3.5.2007 “Për Qendrën Kombëtare të Regjistrimit”. Një person fizik me të njëjtin numër të identifikimit personal regjistrohet vetëm një herë nga Qendra Kombëtare e Biznesit. Atij i lind e drejta të regjistrohet dhe të pajiset me një NIPT/NUIS të ri nga Qendra Kombëtare e Biznesit, vetëm mbas çregjistrimit të NIPT-it/NUIS-it ekzistues.

1/1. Veprimtaria ekonomiko-tregtare, në kuptim të këtij neni, përfshin edhe veprimtarinë e ushtruar nëpërmjet internetit. Personat fizikë, individë tregtarë e të vetëpunësuar dhe entitetet, që ushtrojnë veprimtari ekonomiko-tregtare sipas kësaj pike, duhet të publikojnë në faqen e internetit, nëpërmjet së cilës kryejnë këtë veprimtari, të dhënat e mëposhtme:

a) numrin e NIPT-it;

b) emrin e subjektit tregtar;

c) adresën e selisë;

ç) numrin e telefonit.

Kur administrata tatimore identifikon persona që ushtrojnë veprimtari ekonomiko-tregtare nëpërmjet internetit dhe nuk kanë publikuar në faqen e tyre elektronike këto të dhëna, u dërgon një njoftim zyrtar për publikimin e tyre.

Nëse brenda 15 ditëve nga marrja e njoftimit zyrtar nuk merren masa për publikimin e të dhënave, administrata tatimore i kërkon Autoritetit të Komunikimeve Elektronike dhe Postare bllokimin e përkohshëm të faqes së internetit, përmes së cilës ushtrohet aktiviteti.

2. Personat e regjistruar sipas këtij ligji pajisen me numër identifikimi unik, të gjeneruar elektronikisht, i cili shërben si numër i identifikimit tatimor të tyre, për tatimet kombëtare dhe vendore.

2.1. Numri i identifikimit tatimor nuk gjeneron detyrime tatimore vendore për subjektet që e ushtrojnë aktivitetin e tyre nëpërmjet ndërmjetësit në vendin e biznesit të këtyre të fundit, të regjistruar sipas pikës 1, të këtij neni, për sa kohë detyrimi për të paguar tatimet vendore i mbetet vetëm ndërmjetësit, sipas adresës së tij të regjistruar të biznesit, ku ushtron aktivitetin e tij si i pavarur dhe si ndërmjetës.

2.2. Ministri i Financave nxjerr aktet nënligjore në zbatim të pikës 2.1, të këtij neni.

3. Afati për dorëzimin e aplikimit, formati i aplikimit dhe mënyrat e dorëzimit të aplikimit përcaktohen në ligjin “Për Qendrën Kombëtare të Regjistrimit”. Dokumentet e kërkuara, si pjesë e aplikimit për qëllime tatimore, përcaktohen në aktet nënligjore, në zbatim të këtij ligji.

4. Regjistrimi në Qendrën Kombëtare të Regjistrimit shërben njëkohësisht si regjistrim në administratën tatimore, si dhe në skemat e sigurimit shoqëror e shëndetësor të Inspektoratit të Punës dhe organeve doganore.

4.1. Në administratën tatimore regjistrohen personat juridikë, fizikë dhe individët e mëposhtëm:

a) organizatat jofitimprurëse, ku përfshihen fondacionet, shoqatat, qendrat, si dhe degët e organizatave jofitimprurëse të huaja të regjistruara në regjistrin e organizatave jofitimprurëse, në Gjykatën e Rrethit Gjyqësor Tiranë;

b) persona të tjerë juridikë, të cilët nuk regjistrohen në Regjistrin Tregtar në Qendrën Kombëtare të Regjistrimit, si dhe përfaqësi e ambasada të huaja, entet publike kombëtare apo vendore, njësitë e zbatimit të projekteve të veçanta dhe persona të tjerë të ngjashëm me to;

c) përfaqësuesit tatimorë të tatimpaguesve jorezidentë;

ç) të vetëpunësuarit në veprimtari, si shitës ambulant, sipas përkufizimit të dhënë në shkronjën “j”, të nenit 5, të këtij ligji.

d) kryefamiljari, që punëson individë, si punëtorë shtëpie, kujdestarë dhe persona të tjerë të kësaj natyre;

dh) fermeri.

Personat e regjistruar në administratën tatimore pajisen me numër identifikimi unik (NUIS), të gjeneruar nga sistemi, i cili shërben si numër i identifikimit tatimor të tyre, për tatimet kombëtare dhe vendore.

Mënyra e regjistrimit dhe dokumentacioni që administrohet në dosjen e regjistrimit të këtyre personave, pranë administratës tatimore, përcaktohen me udhëzim të Ministrit të Financave.

5. Mosregjistrimi nuk e çliron një person nga pagesa e detyrimit tatimor ose përmbushja e detyrimeve të tjera tatimore.

Neni 41

Identifikimi i personave, që ushtrojnë veprimtari tregtare pa u regjistruar (Ndryshuar me ligjin nr. 10415, datë 7.4.2011; shtuar pika 3 me ligjin nr. 99/2015, datë 23.9.2015; ndryshuar me ligjin nr. 112/2016, datë 3.11.2016; ndryshuar fjalë në fjalinë e dytë të pikës 1 me ligjin nr. 83/2019, datë 18.12.2019; shtuar fjali në pikën 1me ligjin nr. 79/2025, datë 11.12.2025)

1. Kur administrata tatimore identifikon persona, të cilët ushtrojnë veprimtari ekonomiko-tregtare pa u regjistruar në Qendrën Kombëtare të Biznesit, vendos masën e bllokimit të mallrave dhe detyron personin të regjistrohet menjëherë në Qendrën Kombëtare të Biznesit, si tatimpagues i tatimit mbi vlerën e shtuar. Masa e bllokimit hiqet pas kryerjes së regjistrimit për veprimtarinë ekonomike, duke aplikuar masat dhe dënimin, sipas pikës 2, të nenit 121, të këtij ligji si dhe masat e tjera administrative, që parashikon ky ligj për të gjitha shkeljet e konstatuara nga administrata tatimore. Për mallrat e konstatuara pa faturë bëhet rivlerësimi i TVSH-së dhe i detyrimeve përkatëse tatimore bazuar në vlerën e tregut.

Në rast të mospërmbushjes së detyrimit për regjistrim, detyrimet tatimore dhe penalitetet, që lindin sipas kësaj pike, zbatohen nga administrata tatimore ndaj tatimpaguesit individ.

2. Në rast se një person ushtron veprimtari në fushën e shërbimeve, i pajisur me leje /licencë/autorizim profesional, por nuk e ka regjistruar veprimtarinë në QKB, përveç sa është parashikuar në pikën 1, të këtij neni, për mallrat që disponon, administrata tatimore u propozon strukturave kompetente pezullimin e lejes /licencës/autorizimit për ushtrim veprimtarie për një periudhë gjashtëmujore.

Neni 42

Regjistrimi i organizatave jofitimprurëse

1. Organizatat jofitimprurëse regjistrohen në administratën tatimore, pasi kanë kryer më parë regjistrimin, në përputhje me legjislacionin e fushës.

2. Administrata tatimore mban një regjistër elektronik të veçantë për organizatat jofitimprurëse.

3. Në regjistrin e organizatave jofitimprurëse regjistrohen këto të dhëna:

a) emri;

b) kohëzgjatja, nëse kjo është e përcaktuar;

c) objekti i veprimtarisë;

ç) vendi i ushtrimit të veprimtarisë;

d) të dhënat vetjake të drejtuesit dhe të përfaqësuesit ligjor të organizatës;

dh) dokumenti, që vërteton kompetencat e përfaqësimit dhe afatet e emërimeve të tyre;

e) specimenë të përfaqësuesve të organizatës, në raport me të tretët;

ë) numri i të punësuarve.

4. Regjistrimi në administratën tatimore të organizatave jofitimprurëse bëhet pas depozitimit në administratën tatimore të formularit të kërkesës, së bashku me dokumentacionin, që i bashkëlidhet formularit. Formulari i kërkesës dhe dokumentacioni i kërkuar, si pjesë e kërkesës, publikuar në faqen zyrtare të Drejtorisë së Përgjithshëm të Tatimeve mund të merret pa pagesë, në çdo sportel të njësive të shërbimit ndaj tatimpaguesit.

5. Administrata tatimore, brenda 5 ditëve nga data e marrjes së formularit të plotë dhe të saktë të aplikimit, përpunon kërkesën për regjistrim tatimor dhe e pajis kërkuesin me numër identifikimi.

6. Mosrespektimi i detyrimit për regjistrim nuk e çliron organizatën jofitimprurëse nga pagesa e detyrimeve tatimore.

Neni 43

Përditësimi i të dhënave të regjistrimit (Shfuqizuar shkronja “dh” e pikës 3 me ligjin nr. 84/2014, datë 17.7.2014; shtuar pika 1/1, me ligjin nr. 112/2016, datë 3.11.201; shtuar pika 1/2 me ligjin nr. 97/2018, datë 3.12.2018)

1. Tatimpaguesi, person fizik dhe juridik, regjistron çdo ndryshim të të dhënave në Qendrën Kombëtare të Regjistrimit, siç përcaktohet në ligjin nr. 9723, datë 3.5.2007 “Për Qendrën Kombëtare të Regjistrimit”.

1/1. Në përputhje me ligjin për regjistrimin e biznesit, aplikimi për ndryshimin e selisë dhe hapja e vendeve të tjera të ushtrimit të veprimtarisë, të ndryshme nga selia, në çdo rast bëhen përpara nisjes efektive të veprimtarisë në atë vend. Për hapjen e vendeve të tjera të ushtrimit të veprimtarisë, të ndryshme nga selia, tatimpaguesi pajiset me një certifikatë, me numër unik identifikimi të njëjtë me atë të regjistrimit, por me numër serial të ndryshëm. Kjo certifikatë lëshohet për të identifikuar vendndodhjen e ushtrimit të veprimtarisë, kur është e ndryshme nga selia.

1/2. Edhe personi fizik tregtar i pajisur me NIPT/NUIS, për çdo veprimtari të re që kërkon të regjistrojë, pajiset me një certifikatë, me numër unik identifikimi të njëjtë me atë të regjistrimit, por me numër serial të ndryshëm, me qëllim identifikimin e vendndodhjes të veprimtarisë së re.

2. Tatimpaguesi, statusi i të cilit ndryshon nga një kategori në tjetrën, sipas parashikimeve në ligjet e veçanta tatimore, duhet të njoftojë administratën tatimore përkatëse, brenda 15 ditëve kalendarike nga data e regjistrimit të ndryshimit. Kur një ndryshim i tillë i statusit diktohet nga një kontroll, i kryer nga administrata tatimore, qendrore ose vendore, administrata që kryen kontrollin njofton administratën tjetër, brenda 10 ditëve kalendarike pas këtij ndryshimi.

3. Organizatat jofitimprurëse duhet të njoftojnë administratën tatimore për ndryshimet që vijojnë, brenda 15 ditëve nga data e regjistrimit të ndryshimeve:

a) ndryshimi i emrit;

b) ndryshimi i adresës së veprimtarisë ose kontaktit;

c) ndryshimi i statusit ligjor;

ç) krijimi/mbyllja e degëve, sektorëve ose njësive të reja;

d) ndryshimi i llojit të veprimtarisë ekonomike;

dh) Shfuqizuar.

e) çdo ndryshim tjetër, i parashikuar në aktet nënligjore, të dala në zbatim të këtij ligji.

Neni 44

Kalimi në regjistrin pasiv (Shtuar pika 6 me ligjin nr. 10415, datë 7.4.2011; ndryshuar pikat 1 dhe 2 me ligjin nr. 84/2014, datë 17.7.2014; shfuqizuar pika 6 e shtuar pika 7 me ligjin nr. 164/2014, datë 4.12.2014; ndryshuar pika 2 dhe 5 me ligjin nr. 112/2016, datë 3.11.2016; shtuar fjalë në shkronjën “c” të pikës 1, shtuar pika 4/1 dhe ndryshuar pika 7 me ligjin nr. 97/2018, datë 3.12.2018; shtuar fjali në pikën 1me ligjin nr. 79/2025, datë 11.12.2025)

1. Administrata tatimore transferon regjistrimin e tatimpaguesit nga regjistri aktiv në regjistrin pasiv, që mbahet nga administrata tatimore, në rast se përmbushet, të paktën, një nga kushtet e mëposhtme:

a) nuk ushtron më veprimtari tregtare për një periudhë tatimore prej 12 muajsh të njëpasnjëshëm;

b) nuk dorëzon deklaratën tatimore për një periudhë tatimore prej 12 muajsh të njëpasnjëshëm;

c) deklaron në QKR pezullim veprimtarie tregtare dhe paguan të gjitha detyrimet tatimore.

2. Për periudhën e qëndrimit në regjistrin pasiv, tatimpaguesi nuk paraqet deklarata periodike tatimore dhe ndaj tij nuk llogariten gjoba për mosdeklarim tatimor.

3. Administrata tatimore, brenda 10 ditëve kalendarike nga data e transferimit të regjistrimit në regjistrin pasiv, njofton tatimpaguesin me shkrim.

4. Transferimi i regjistrimit tatimor nga regjistri aktiv në regjistrin pasiv nuk eliminon detyrimin tatimor ekzistues dhe nuk e ndalon administratën tatimore për vlerësimin ose mbledhjen e detyrimit tatimor, pas transferimit në regjistrin pasiv.

4/1. Kalimi në regjistrin pasiv të tatimpaguesve persona fizikë dhe juridikë, nga Qendra Kombëtare e Biznesit, bëhet duke verifikuar më parë pagimin e detyrimeve tatimore nga ana e tyre. Verifikimi në administratën tatimore bëhet në rrugë elektronike brenda së njëjtës ditë pune.

5. Kur tatimpaguesi rifillon veprimtarinë, administrata tatimore automatikisht transferon regjistrimin nga regjistri pasiv në regjistrin aktiv.

6. Shfuqizuar.

7. Shfuqizuar.

Neni 45

Çregjistrimi i subjekteve/tatimpaguesve (Ndryshuar pikat 2 dhe 3 me ligjin nr. 10415, datë 7.4.2011; nr. 124/2012, datë 20.12.2012; ndryshuar pika 3 me ligjin nr. 179, datë 28.12.2013; ndryshuar me ligjin nr. 84/2014, datë 17.7.2014; shtuar shkronjat “ç” dhe “d”, ndryshuar pika 3, 4, 5, 6, 7, 8, 9, 10, me ligjin nr. 112/2016, datë 3.11.2016; me ligjin nr. 97/2018, datë 3.12.2018)

1. Subjektet/tatimpaguesit, të cilët janë regjistruar në administratën tatimore, sipas pikave 1 deri 4, të nenit 40, dhe të nenit 42, të këtij ligji, çregjistrohen nga regjistri i administratës tatimore vetëm pas çregjistrimit të tyre në Qendrën Kombëtare të Biznesit dhe/ose në gjykatë.

Subjektet/tatimpaguesit, të cilët janë të regjistruar në administratën tatimore, sipas pikës 4.1, të nenit 40, çregjistrohen nga drejtoritë rajonale tatimore, sipas procedurave të përcaktuara në udhëzimin e ministrit përgjegjës për financat.

2. Data e çregjistrimit të tatimpaguesit në administratën tatimore është data e çregjistrimit në Qendrën Kombëtare të Biznesit ose në gjykatë, për të gjitha subjektet që çregjistrohen pranë tyre.

Data e çregjistrimit të personave juridikë publikë apo të ngjashme me to, si dhe të institucioneve e organizatave ndërkombëtare, është data e aktit/vendimit të mbylljes nga institucioni përkatës.

Datë e çregjistrimit për subjektet/tatimpaguesit e tjerë është data e miratimit të çregjistrimit të tyre nga administrata tatimore.

3. Çregjistrimi i subjekteve/tatimpaguesve, që janë pjesë e regjistrit të Qendrës Kombëtare të Biznesit:

3.1 Çregjistrimi i subjektit/tatimpaguesit nga regjistri i administratës tatimore fillon në Qendrën Kombëtare të Biznesit dhe, mbas çregjistrimit në Qendrën Kombëtare të Biznesit, bëhet çregjistrimi në regjistrin e administratës tatimore.

3.2 Qendra Kombëtare e Biznesit, me marrjen e kërkesës për çregjistrim të personit fizik, njofton menjëherë organin tatimor në rrugë elektronike mbi datën e kërkesës për çregjistrimin e tij.

Për personat juridikë, Qendra Kombëtare e Biznesit njofton statusin e shoqërisë në likuidim, dhe në vijim, kur shoqëria dorëzon raportin përfundimtar të likuidimit, dërgon në organin tatimor datën e paraqitjes së këtij raporti.

Për personat juridikë, që kryejnë çregjistrimin nëpërmjet procedurave të bashkimit apo ndarjes së shoqërive, Qendra Kombëtare e Biznesit dërgon në organin tatimor përkatës vendimin përfundimtar të miratimit të bashkimit/ndarjes së shoqërive.

3.3 Administrata tatimore, brenda 10 ditëve pune nga data e paraqitjes së kërkesës për çregjistrim të personave fizikë, apo paraqitjes së raportit përfundimtar të likuidimit për personat juridikë, është e detyruar të verifikojë dhe të vlerësojë situatën tatimore të subjektit/ tatimpaguesit në llogarinë e tij në kontabilitetin dhe sistemin e të dhënave që disponon. Për situatën tatimore të subjektit/tatimpaguesit, si dhe për deklaratat e padorëzuara nga ai, administrata tatimore njofton brenda këtyre 10 ditëve tatimpaguesin.

Kur administrata tatimore, sipas analizës së riskut, gjykon se është e nevojshme të ushtrojë kontroll në mjedisin ku kryen veprimtarinë subjekti, ky kontroll dhe pasqyrimi i tij në situatën e tatimpaguesit nuk mund të zgjasë më shumë se 30 ditë pune.

Komunikimi me Qendrën Kombëtare të Biznesit, për detyrimet tatimore dhe deklaratat e padorëzuara të tatimpaguesit, do të bëhet në rrugë elektronike, në kohë reale, sipas marrëveshjes dypalëshe dhe protokollit elektronik të komunikimit ndërmjet Qendrës Kombëtare të Biznesit dhe Drejtorisë së Përgjithshme të Tatimeve.

3.4 Qendra Kombëtare e Biznesit nuk mund të kryejë çregjistrimin e subjektit, në qoftë se në situatën e tatimpaguesit në kohë reale rezultojnë  detyrime tatimore të papaguara të tatimpaguesit dhe deklarata tatimore të padorëzuara, si dhe në rast se ai nuk ka paraqitur pasqyrat financiare të mbylljes së aktivitetit deri në momentin e mbylljes. Në raste të veçanta, kur deklaratat apo pasqyrat financiare nuk janë dorëzuar nga subjektet, komunikimi ndërmjet organit tatimor dhe Qendrës Kombëtare të Biznesit mund të bëhet me postë elektronike (e-mail) ose dhe me shkresë zyrtare.

3.5 Nëse në situatën në kohë reale të tatimpaguesit/subjektit nuk ka detyrime tatimore të papaguara, si dhe deklarata të padorëzuara, Qendra Kombëtare e Biznesit kryen menjëherë çregjistrimin e tatimpaguesit, duke njoftuar menjëherë në rrugë elektronike administratën tatimore për datën e çregjistrimit të tij.

4. Çregjistrimi i subjekteve/tatimpaguesve që likuidohen në gjykatë:

4.1 Gjykata, me marrjen e kërkesës për çregjistrim prej subjektit/tatimpaguesit, njofton menjëherë organin tatimor kompetent për regjistrimin e hapjes së procedurave të likuidimit dhe në vijim për paraqitjen e raportit përfundimtar të likuidimit. Ky njoftim bëhet edhe për personat juridikë që likuidohen dhe çregjistrohen në gjykatë sipas dispozitave të ligjit “Për tregtarët dhe shoqëritë tregtare” apo subjekteve/tatimpaguesve që hyjnë në procedura falimentimi.

4.2 Administrata tatimore, brenda 10 ditëve pune nga data e paraqitjes së kërkesës për çregjistrim në gjykatë, është e detyruar të verifikojë situatën tatimore të subjekteve dhe njofton gjykatën dhe subjektin mbi këtë situatë. Kur organi tatimor, sipas analizës së riskut, gjykon se është e nevojshme të ushtrojë kontroll në mjedisin ku ushtron veprimtarinë subjekti, atëherë ky kontroll, pasqyrimi i tij në situatën e tatimpaguesit dhe njoftimi i gjykatës nuk mund të zgjasin më shumë se 30 ditë kalendarike.

4.3 Gjykata nuk mund të kryejë çregjistrimin, në qoftë se brenda afatit të 30 ditëve administrata tatimore e kundërshton me shkrim çregjistrimin. Kundërshtimi i çregjistrimit të tatimpaguesit nga administrata tatimore tregon shumën e detyrimeve tatimore të papaguara të tatimpaguesit dhe faktin që nuk ka dorëzuar deklarata tatimore apo nuk ka paraqitur pasqyrat financiare të mbylljes së aktivitetit deri në momentin e likuidimit përfundimtar.

Nëse organi tatimor nuk i përgjigjet gjykatës brenda afatit 30-ditor, gjykata çregjistron subjektin/ tatimpaguesin dhe njofton në të njëjtën ditë organin tatimor dhe tatimpaguesin.

4.4 Kur subjekti paguan detyrimet e papaguara në kohë, administrata tatimore njofton menjëherë gjykatën dhe vetë subjektin se ai nuk ka detyrime tatimore të papaguara. Gjykata kryen çregjistrimin dhe dërgon në administratën tatimore dokumentin e çregjistrimit të subjektit, përfshirë datën e çregjistrimit.

5. Çregjistrimi i subjekteve/tatimpaguesve që regjistrohen vetëm në regjistrin e administratës tatimore, sipas pikës 4.1, të nenit 40, të ligjit, dhe që janë të regjistruara në drejtoritë rajonale tatimore me procedura të thjeshtuara, si: ambulantë, përfaqësues tatimorë, fermerë, individë etj., bëhet pranë drejtorive rajonale tatimore përkatëse, sipas procedurave të thjeshtuara të parashikuara në udhëzimin e ministrit përgjegjës për financat.

6. Subjektet e regjistruara në Qendrën Kombëtare të Biznesit/gjykatë dhe në administratën tatimore çregjistrohen nga regjistri elektronik pasi të kenë paguar të gjitha detyrimet tatimore, përfshirë detyrimet që lindin në rastin kur çregjistrimi kryhet me likuidim. Në rastin e falimentit, subjekti/tatimpaguesi do të çregjistrohet sipas vendimit të gjykatës me statusin “i falimentuar”.

7. Nëse pavarësisht se detyrimi tatimor për të cilin është kundërshtuar çregjistrimi është shlyer, por administrata tatimore nuk e ka tërhequr kundërshtimin, subjekti/tatimpaguesi paraqet pranë Qendrës Kombëtare të Biznesit apo gjykatës dokumentin që vërteton shlyerjen e detyrimeve tatimore. Në këtë rast Qendra Kombëtare e Biznesit apo gjykata kryejnë menjëherë çregjistrimin dhe njoftojnë administratën tatimore dhe tatimpaguesin.

8. Çregjistrimi i subjektit/tatimpaguesit në Qendrën Kombëtare të Biznesit apo gjykatë nuk eliminon detyrimet tatimore të papaguara dhe nuk e ndalon administratën tatimore të vlerësojë ose të mbledhë me forcë detyrimet tatimore.

KREU VI MBAJTJA E TË DHËNAVE Seksioni I Detyrimi për dokumentimin dhe mbajtjen e llogarive për qëllime tatimore

Neni 46

Dokumentimi dhe mbajtja e të dhënave tatimore për tatimpaguesit, subjekt i TVSH-së ose i tatim-fitimit (Shtuar pika 3 me ligjin nr. 99/2015, datë 23.9.2015; zëvendësuar fjalë në pikën 1, ndryshuar pika 3 me ligjin nr. 83/2019, datë 18.12.2019)

1. Tatimpaguesit, që janë subjekt i TVSH-së ose i tatim-fitimit, për përllogaritjen e detyrimit tatimor, mbajnë regjistrat, dokumentacionin kontabël, librat dhe informacionin financiar, si dhe lëshojnë faturë, në përputhje me ligjet e fushës, si dhe aktet nënligjore, të nxjerra në zbatim të tyre.

2. Tatimpaguesi, subjekt i TVSH-së, regjistron menjëherë të gjitha veprimet financiare dhe përgatit e mban libra e regjistra kontabël, ku regjistrohen:

a) shitjet e përditshme të mallrave ose kryerja e punimeve apo e shërbimeve të tatueshme, përfshirë shumën e secilit veprim dhe shumën e tatimit të ngarkuar;

b) veprimet e përfunduara, por akoma të pafaturuara;

c) veprimet e patatueshme;

ç) pagesat për mallra dhe shërbime, përfshi shumën e secilës blerje apo pagesë, shumën e tatimit të paguar dhe emrin e adresën e furnizuesit.

3. Tatimpaguesi nuk është i detyruar të mbajë regjistra të veçantë, sipas pikës 2, të këtij neni, për të cilët administrata tatimore harton raporte automatike, në përputhje me legjislacionin në fuqi për faturën dhe sistemin e monitorimit të qarkullimit.

Neni 47

Dokumentimi dhe mbajtja e të dhënave tatimore për tatimpaguesit e klasifikuar “biznes i vogël” (Ndryshuar me ligjin nr. 164/2014, datë 4.12.2014, ndryshuar dhe shtuar fjalë me ligjin nr. 83/2019, datë 18.12.2019) Tatimpaguesit, që janë subjekt i ligjit “Për sistemin e taksave vendore”, për përllogaritjen e detyrimit tatimor, mbajnë regjistra, libra dhe dokumente të tjera, si dhe lëshojnë një faturë, në përputhje me dispozitat e ligjit nr. 9632, datë 30.10.2006 “Për sistemin e taksave vendore”, si dhe dispozitat e ligjit “Për tatimin mbi të ardhurat” dhe legjislacionit në fuqi për faturën dhe sistemin e monitorimit të qarkullimit.

Neni 48

Mbajtja dhe ruajtja e dokumenteve të të dhënave tatimore (Shfuqizuar pika 3 me ligjin nr. 83/2019, datë 18.12.2019)

1. Regjistrat, librat dhe informacioni financiar janë dokumente, që përmbajnë informacionin e regjistruar, në mënyrë kronologjike dhe sistematike, të veprimeve tregtare të tatimpaguesit, të cilat mbahen për përcaktimin e shumës së detyrimeve tatimore të këtij tatimpaguesi.

2. Të dhënat dhe informacioni financiar e kontabël ruhen nga tatimpaguesi, për të paktën 5 vjet, duke filluar nga fundi i vitit tatimor, të cilit i përkasin dokumentet.

3. Shfuqizuar.

Neni 49

Fatura tatimore (Shfuqizuar me ligjin nr. 83/2019, datë 18.12.2019)

Neni 50

Fatura tatimore me TVSH (Ndryshuar fjalë në pikën 1, me ligjin nr. 112/2016, datë 3.11.2016; shfuqizuar me ligjin nr. 83/2019, datë 18.12.2019)

Neni 51

Lëshimi i faturës tatimore (Shfuqizuar me ligjin nr. 83/2019, datë 18.12.2019) Neni 51/1 Veprimtari ekspertize dhe/ose profesionale (Shtuar me ligjin nr. 10137, datë 11.5.2009) Veprimtaritë e përcaktuara në nenet 52, 55 pika 2 dhe 56 të këtij ligji, përfshihen në kategorinë XII.2 të ligjit për licenca. Këto veprimtari licencohen sipas dispozitave në vijim të këtij ligji.

Neni 52

Prodhimi dhe shpërndarja e dokumenteve tatimore (Ndryshuar fjalë në pikën 3 me ligjin nr. 10137, datë 11.5.2009; shtuar pika 4 me ligjin nr. 112/2016, datë 3.11.2016; shfuqizuar me ligjin nr. 83/2019, datë 18.12.2019 )

Neni 53

Faturat tatimore, të përgatitura nga blerësi (Shfuqizuar me ligjin nr. 83/2019, datë 18.12.2019

Neni 54

Kuponi tatimor (Hequr fjalë me ligjin nr. 164/2014, datë 4.12.2014; shtuar pika 5 me ligjin nr. 99/2015, datë 23.9.2015; shfuqizuar me ligjin nr. 83/2019, datë 18.12.2019) Neni 54/1 Krijimi i Bazës së të Dhënave të numrave IMEI të telefonave celularë (Shtuar me ligjin nr. 99/2015, datë 23.9.2015)

1. Drejtoria e Përgjithshme e Tatimeve krijon Bazën e të Dhënave të numrave IMEI të telefonisë celulare, në të cilën regjistrohen të gjithë numrat IMEI të telefonave celularë në momentin e importimit dhe të gjithë numrat IMEI të telefonave që shiten nga tatimpaguesit në tregun vendas, shitës me shumicë dhe shitës me pakicë, pa cenuar legjislacionin në fuqi për mbrojtjen e të dhënave personale.

2. Baza e të Dhënave të numrave IMEI aksesohet nga depozituesit e informacionit që janë importuesit, tatimpaguesit, shitës me shumicë, dhe tatimpaguesit, shitës me pakicë, vetëm për qëllime të popullimit të të dhënave, në përputhje me pikën 3, të këtij neni, si dhe nga inspektorët e administratës tatimore gjatë ushtrimit të kontrolleve. Inspektorëve u ndalohet të aksesojnë të dhënat e bazës, sipas këtij neni, jashtë objektit të një çështjeje në hetim dhe çdo akses shoqërohet me mbajtjen e një procesverbali për qëllimin e aksesit dhe destinacionin e të dhënave të nxjerra.

3. Popullimi i Bazës së të Dhënave bëhet si më poshtë:

a) importuesit e telefonave celularë, në çastin e deklarimit dhe të pagesës së detyrimeve doganore pranë degëve doganore, duhet të deklarojnë edhe listën e numrave IMEI të aparateve të importuara, si dhe të ngarkojnë elektronikisht të gjithë informacionin e numrave IMEI respektivë në Bazën e të Dhënave;

b) individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është mbi minimumin e patatueshëm, të vendosur në ligj, ndjekin të njëjtën procedurë si në shkronjën “a”, të kësaj pike. Ngarkimi elektronikisht në Bazën e të Dhënave kryhet nga dega doganore;

c) tatimpaguesit me shumicë dhe me pakicë, brenda 1 muaji nga hyrja në fuqi e vendimit të Këshillit të Ministrave, duhet të ngarkojnë numrat IMEI të telefonave celularë te Baza e të Dhënave të të gjithë telefonave celularë gjendje. Kjo praktikë duhet të ndiqet më pas për çdo telefon të ri që hedhin në treg.

Këshilli i Ministrave përcakton procedurat e krijimit e të funksionimit të Bazës së të Dhënave.

Seksioni II Pajisjet fiskale

Neni 55

Detyrimi për përdorimin e pajisjeve fiskale dhe për vendosjen e sistemeve të monitorimit të qarkullimit (Ndryshuar fjalë me ligjin nr. 10137, datë 11.5.2009; ndryshuar me ligjin nr. 164/2014, datë 4.12.2014; shtuar fjali në pikën 1 me ligjin nr. 99/2015, datë 23.9.2015; shtuar fjalë në pikën 1 me ligjin nr. 112/2016, datë 3.11.2016; shfuqizuar me ligjin nr. 83/2019, datë 18.12.2019)

Neni 56

Kontrolli i sistemit automatik të mbledhjes së të dhënave të pajisjeve fiskale (Ndryshuar fjalë me ligjin nr. 10137, datë 11.5.2009; shfuqizuar me ligjin nr. 83/2019, datë 18.12.2019) Seksioni III Mbajtja e kontabilitetit për qëllime tatimore

Neni 57

Dokumentimi dhe mbajtja e llogarive për qëllime tatimore (Zëvendësuar fjalë në pikën 4 me ligjin 83/2019, datë 18.12.2019; ndryshuar pika 1 me ligjin me ligjin nr. 83/2022, datë 24.11.2022)

1. Tatimpaguesi është përgjegjës për mbajtjen e kontabilitetit në përputhje me legjislacionin në fuqi për kontabilitetin dhe pasqyrat financiare.

2. Për regjistrimin e veprimeve ekonomike, që lidhen me tatimet dhe taksat, përdoren edhe librat, regjistrat apo dokumentacioni i përcaktuar në ligjet tatimore specifike dhe në dispozitat përkatëse nënligjore.

3. Tatimpaguesit janë të detyruar të përdorin dokumentacionin bazë, përfshirë faturën tatimore, në përputhje me legjislacionin tatimor dhe dispozitat nënligjore përkatëse.

4. Tatimpaguesit, subjekte të ligjit nr. 9632, datë 30.10.2006 “Për sistemin e taksave vendore”, për përllogaritjen e detyrimit tatimor, mbajnë regjistra, libra dhe dokumente të tjera, si dhe lëshojnë faturë, në përputhje me ligjin e fushës dhe me aktet nënligjore, të nxjerra në zbatim të tij. Gjithashtu, këta tatimpagues mbajnë dokumentacion tatimor, sipas kërkesave të këtij ligji, të ligjeve specifike tatimore dhe të dispozitave nënligjore, të dala në zbatim të tyre.

5. Të dhënat dhe regjistrat e nevojshëm për tatimet mund të mbahen në formë elektronike, kur legjislacioni tatimor apo dispozitat përkatëse nënligjore nuk e pengojnë një gjë të tillë, me kusht që të garantojnë, në çdo kohë, një pasqyrim të plotë të veprimeve ekonomike dhe të të dhënave për tatimet.

Seksioni IV Detyrime të tjera të tatimpaguesit dhe të të tretëve

Neni 58

Dokumentimi i mallrave (Shtuar fjalë me ligjin 83/2019, datë 18.12.2019) Tatimpaguesit që mbajnë, tregtojnë, përdorin ose transportojnë mallra, duhet të kenë dokumentet e nevojshme tatimore duke përfshirë faturën e shoqërimit, në përputhje me legjislacionin në fuqi për faturën dhe sistemin e monitorimit të qarkullimit, që provojnë pronësinë ose kontrollin mbi këto mallra dhe, me kërkesën e zyrtarëve të administratës tatimore, i vënë këto dokumente në dispozicion të tyre.

Neni 59

Pagesat me para në dorë (Ndryshuar pika 1 me ligjin nr. 179/2013, datë 28.12.2013; shtuar pika 1/1 me ligjin nr. 112/2016, datë 3.11.2016; shtuar pika 1/2 dhe 1/3 me ligjin nr. 31/2019, datë 17.6.2019; ndryshuar pika 1 dhe shtuar pika 3 me ligjin nr. 79/2025, datë 11.12.2025)

1. Tatimpaguesit, personat fizikë, individë tregtarë e të vetëpunësuar apo entitetet nuk mund të kryejnë ndërmjet tyre transaksione shitjeje ose blerjeje me para në dorë kur vlera e transaksionit është më e madhe se 100 000 lekë.

1/1. Për qëllime të kësaj dispozite, nuk konsiderohet si transaksion i kryer me para në dorë pagesa për transaksionet, e cila kryhet nëpërmjet institucioneve financiare të parasë elektronike, të licencuara nga Banka e Shqipërisë, ose pagesat e kryera me kartë krediti.

1/2. Tatimpaguesit persona fizikë tregtarë, të regjistruar për tatimin mbi vlerën e shtuar, tatimpaguesit persona juridikë, pavarësisht nga qarkullimi që realizojnë, si dhe organizatat jofitimprurëse të regjistruara në organin tatimor, janë të detyruar të kenë llogari bankare të biznesit/organizatës së regjistruar dhe ta deklarojnë atë në administratën tatimore.

1/3. Tatimpaguesit e regjistruar rishtas, janë të detyruar të hapin llogarinë bankare të biznesit/organizatës jo më vonë se 20 ditë kalendarike nga e nesërmja e regjistrimit në Qendrën Kombëtare të Biznesit/administratën tatimore dhe ta deklarojnë atë në administratën tatimore.

2. Përveç detyrimeve të tjera, të parashikuara në këtë ligj, tatimpaguesi, në përputhje me legjislacionin tatimor, duhet të reklamojë në vende të dukshme, çmimet e mallrave dhe të shërbimeve që ofron. Në rastet kur ushtron njëkohësisht tregti me shumicë dhe me pakicë, është i detyruar që t’i organizojë këto veprimtari në vende të veçanta, të ndara nga njëri-tjetri.

3. Personat fizikë, individë tregtarë e të vetëpunësuar apo entitetet nuk mund të kryejnë transaksione shitjeje ose blerjeje me para në dorë me individë kur vlera e transaksionit është më e madhe se 500 000 lekë.

Neni 59/1 Detyrimi për të depozituar paratë (kartëmonedhat dhe monedhat) në llogarinë bankare (Shtuar me ligjin me ligjin nr. 83/2022, datë 24.11.2022)

1. Tatimpaguesi, që lëshon faturë, detyrohet që t’i depozitojë në llogarinë e vet bankare ose në llogarinë e tij të hapur në institucione të tjera financiare jobankare, që mund të mbajnë depozita në përputhje me ligjin përkatës, paratë (kartëmonedha dhe monedha) që ka grumbulluar gjatë ditës për furnizimin e mallrave apo të shërbimeve, të cilat tejkalojnë nivelin maksimal të arkës, në përputhje me nenin 59/2 të këtij ligji, ditën e nesërme të punës, pas ditës që maksimumi i arkës është tejkaluar.

2. Tatimpaguesi, që lëshon faturë, të cilit i janë bllokuar llogaritë bankare të biznesit për mospagim të detyrimeve, nuk mund të paguajë me para në dorë ose të mbajë para në arkë, por duhet që këto para t’i depozitojë në llogarinë bankare për veprimtarinë e rregullt të biznesit menjëherë ose në ditën e ardhshme të punës.

Neni 59/2 Limiti i arkës (Shtuar me ligjin me ligjin nr. 83/2022, datë 24.11.2022)

1. Tatimpaguesi, që lëshon faturë, përveç në rastet e përcaktuara në pikën 2 të nenit 59/1 të këtij ligji, mund të mbajë para cash (kartëmonedha dhe monedha) në arkën e vet në fillim të çdo dite pune deri në shumën maksimale të arkës. Shuma e parave cash është shuma fillestare e parave (kartëmonedha dhe monedha) që tatimpaguesi mund të ketë në arkën e tij në fillim të ditës së punës ose të ndërrimit të çdo operatori. Shumën maksimale të parave cash e përcakton tatimpaguesi që lëshon faturë, në mënyrë të pavarur, duke nxjerrë një akt të brendshëm, në përputhje me nevojat dhe kushtet e sigurisë, por kjo nuk mund të jetë më shumë se maksimumi i përcaktuar në pikën 2 të këtij neni.

2. Kriteri për përcaktimin e shumës maksimale të arkës së tatimpaguesit, që lëshon faturë, është niveli i qarkullimit vjetor të tatimpaguesit që lëshon faturë. Shuma maksimale e lejuar e parave cash në arkë për tatimpaguesit skedulohet si më poshtë:

a) për tatimpaguesit me qarkullim vjetor, gjatë vitit të mëparshëm tatimor, deri në 2 milionë lekë, shuma maksimale e lejuar e parave cash në arkë është deri në 150 000 lekë;

b) për tatimpaguesit me qarkullim vjetor, gjatë vitit të mëparshëm tatimor, mbi 2 milionë lekë deri në 10 milionë lekë, shuma maksimale e lejuar e parave cash në arkë është deri në 500 000 lekë;

c) për tatimpaguesit me qarkullim vjetor, gjatë vitit të mëparshëm tatimor, mbi 10 milionë lekë, shuma maksimale e lejuar e parave cash në arkë është deri në 500 000 lekë ose 5% të qarkullimit vjetor të vitit të kaluar, cilado qoftë vlera më e lartë.

Në rastet kur një tatimpagues fillon veprimtarinë gjatë vitit kalendarik, limiti maksimal i lejuar i parave cash në arkë përcaktohet në përputhje me shkronjat “a”, “b” dhe “c” të kësaj pike, referuar shumës së qarkullimit të parashikuar deri në fund të vitit.

3. Shuma maksimale e arkës përcaktohet për tatimpaguesin, që lëshon faturë, në tërësi dhe brenda kësaj shume tatimpaguesi që lëshon faturë mund të përcaktojë maksimumin e parave cash në arkë për çdo njësi të organizimit ose vendit të ushtrimit të aktivitetit të biznesit.

4. Shuma maksimale cash e arkës, sipas pikës 2 të këtij neni, nuk zbatohet për bankat dhe institucionet e tjera financiare jobankare.

5. Tatimpaguesi që lëshon faturë, i cili kryen transaksione këmbimi monedhe, pavarësisht nga dispozitat e pikave 2 e 3 të këtij neni, mund të përcaktojë maksimumin e arkës deri në shumën 5 000 000 lekë ose 5% të qarkullimit vjetor të vitit të kaluar, cilado qoftë vlera më e lartë.

6. Tatimpaguesi, që lëshon faturë, detyrohet në fillim të çdo dite pune dhe para lëshimit të faturës së parë, nëpërmjet lidhjes elektronike (internetit) të vendosur me administratën tatimore qendrore, që e përdor për zbatimin e procedurës së fiskalizimit, të paraqesë informacionin mbi shumën fillestare të parave cash në arkë për çdo pajisje elektronike të faturimit.

Neni 59/3 Pajisja me terminal “POS/POI” (Shtuar me ligjin nr. 79/2025, datë 11.12.2025)

1. Tatimpaguesit që kryejnë shitje me para në dorë duhet të jenë të pajisur me terminal “POS/POI” në çdo pikë shitjeje, sipas kalendarit të mëposhtëm:

a) Brenda datës 30 maj 2026 të gjithë tatimpaguesit, të cilët:

i. ushtrojnë aktivitet ekonomik si struktura akomoduese, sipas përcaktimeve në ligjin për turizmin, dhe, konkretisht: “Bujtinë”; “Bllok apartamentesh”; “Motel”; “Fjetje dhe mëngjes”; “Hotel”; “Hotel i shpërndarë”; “Resort” dhe “Strukturë akomoduese e trashëgimisë kulturore”;

ii. ofrojnë shërbime në sektorin e transportit; si dhe iii. institucionet publike dhe shoqëritë publike me kapital shtetëror;

b) Brenda datës 31 dhjetor 2026 të gjithë tatimpaguesit e tjerë, të papërmendur në shkronjën “a” të kësaj pike.

2. Përjashtohen nga detyrimi i pajisjes me terminal “POS/POI”:

a) tatimpaguesit që ushtrojnë aktivitet ekonomik në zonat ku nuk ka mbulim me internet;

b) tatimpaguesit që përjashtohen nga detyrimi për të lëshuar faturë, sipas ligjit për faturën dhe sistemin e monitorimit të qarkullimit;

c) tatimpaguesit, të cilët përmbushin njëkohësisht kriteret e mëposhtme:

i. nuk janë subjekt i tatimit mbi vlerën e shtuar;

ii. kanë përgjegjësi tatimore të tatimit mbi të ardhurat personale nga biznesi;

iii. nuk kanë më shumë se një vendndodhje të ushtrimit të veprimtarisë së biznesit;

iv. kanë statusin/kategorinë e punësimit “I vetëpunësuar i vetëm”.

3. Terminali “POS/POI” është pajisja që bën të mundur përdorimin e kartave bankare apo të instrumenteve të tjera të pagesave elektronike në pikën e shitjes ose të ndërveprimit. Informacioni për pagesën merret nëpërmjet faturave letër nga terminalet mekanike ose elektronike.

Neni 60

Detyrimi i tatimpaguesit për të dhënë informacion dhe për të lejuar hyrjen në mjediset e veprimtarisë ekonomike

1. Tatimpaguesi vë në dispozicion të administratës tatimore librat, regjistrimet, informacionin, dokumentet e nevojshme për të kryer llogaritjen e saktë të detyrimeve të tyre tatimore.

2. Tatimpaguesi lejon hyrjen e nëpunësve të administratës tatimore në mjediset, ku ushtron veprimtarinë ekonomike, gjatë orarit zyrtar të punës.

3. Me kërkesën e administratës tatimore, tatimpaguesi jep shpjegime shtesë, me gojë ose me shkrim. Ky detyrim përfshin, por nuk kufizohet në:

a) plotësimin, nënshkrimin dhe kthimin e pyetësorëve ose të kërkesave të tjera me shkrim për informacione apo dokumente nga administrata tatimore, brenda 20 ditëve nga data e postimit të kërkesës ose e dërgimit elektronik të tatimpaguesit;

b) takimin me punonjës të administratës tatimore gjatë orarit të punës, për t’iu përgjigjur pyetjeve dhe për të dhënë informacion, sipas nenit 94 të këtij ligji.

4. Kërkesa e administratës tatimore për shpjegime shtesë bëhet vetëm për informacione, të lidhura me transaksionet tregtare të tatimpaguesit, proceset ose procedurat teknike dhe me operacionet financiare ndërmjet tatimpaguesit dhe palëve të treta.

Neni 61

Detyrimi i të tretëve për të dhënë informacion (Shtuar pika 3 me ligjin nr. 10415, datë 7.4.2011, ndryshuar pika 3 me ligjin nr. 83/2022, datë 24.11.2022)

1. Me kërkesën e administratës tatimore, palët e treta japin informacion, me shkrim ose me gojë, vënë në dispozicion librat dhe regjistrimet, si dhe informacion tjetër për detyrimin tatimor të një tatimpaguesi, me të cilin ata kanë hyrë në transaksione tregtare ose financiare. Ky detyrim përfshin, por nuk kufizohet në:

a) plotësimin, nënshkrimin dhe kthimin e pyetësorëve me shkrim, ose të kërkesave të tjera, me shkrim, për informacion ose dokumente, nga administrata tatimore, brenda 30 ditëve kalendarike nga data kur kërkesa, dërguar me postë ose në mënyrë elektronike, është marrë ose vlerësohet të jetë marrë prej palës së tretë;

b) takimin me punonjësit e administratës tatimore gjatë orarit zyrtar të punës në mjediset e veprimtarisë ekonomike të palës së tretë ose në zyrat e administratës tatimore, për t’iu përgjigjur pyetjeve dhe për të dhënë informacion, në bazë të fletëthirrjes me shkrim, sipas nenit 94 të këtij ligji.

2. Kur tatimpaguesi ose një palë e tretë nuk përmbush detyrimet e parashikuara sipas këtij kreu, administrata tatimore mund të ushtrojë autoritetin e vet, në përputhje me dispozitat e këtij ligji.

3. Ministri përgjegjës për financat përcakton me udhëzim:

a) mënyrën, kohën dhe formën në të cilën palëve të treta u kërkohet të paraqesin informacion në administratën tatimore, si dhe përmbajtjen e këtij informacioni;

b) natyrën dhe/ose llojin e informacionit që kërkohet të dorëzohet në rrugë elektronike nga palët e treta, në baza periodike, sipas një formati të standardizuar dhe me përdorimin e teknologjisë së përshtatshme;

c) kategoritë e caktuara të personave, të cilëve u kërkohet të japin automatikisht informacion në lidhje me transaksionet e tyre financiare me tatimpaguesit apo edhe të dhënat që ata mbajnë në lidhje me tatimpaguesit, si dhe termat dhe kushtet për dhënien e këtij informacioni.

Neni 61/1 Dhënie informacioni për zbatimin e marrëveshjeve ndërkombëtare (Shtuar me ligjin nr. 164/2014, datë 4.12.2014)

1. Me kërkesë të administratës tatimore, për qëllim të zbatimit të marrëveshjeve ndërkombëtare për çështjet tatimore ose për qëllim të marrëveshjeve ndërkombëtare, të cilat parashikojnë asistencë administrative në çështjet tatimore, të cilat janë në fuqi në Republikën e Shqipërisë, çdo person duhet të japë informacion në përputhje me dispozitat e marrëveshjeve ndërkombëtare në fushën tatimore, përfshirë, por pa u kufizuar, në informacionin e mbajtur nga banka dhe institucione të tjera financiare.

2. Pa kufizuar detyrimet e parashikuara në pikën 1, zbatohen të njëjtat rregulla si për informacionin e dhënë për qëllime të zbatimit të legjislacionit tatimor vendas, përveç kur parashikohet ndryshe në marrëveshjet ndërkombëtare, në bazë të të cilave kërkohet ky informacion.

3. Ministri i Financave miraton udhëzimin për procedurat për zbatimin e këtij neni.

4. Në rast mosdhënieje të informacionit, në përputhje me këtë nen, aplikohen penalitete, sipas nenit 126 “Mosdhënie e informacionit”.

Neni 62

Personat të cilëve u adresohet kërkesa për të dhënë informacion (Ndryshuar me ligjin nr. 83/2022, datë 24.11.2022) Administrata tatimore kërkon çdo lloj informacioni që e konsideron të nevojshëm për zbatimin e legjislacionit tatimor në fuqi nga çdo person, duke përfshirë, por pa u kufizuar në sa vijon:

a) nga çdo entitet, duke përfshirë informacionin për:

i. dividentët e paguar aksionarëve ose ortakëve;

ii. personat me të cilët personi juridik ka kryer transaksione financiare ose biznesi;

iii. pagesat e bëra për nënkontraktorët;

iv. debitorët dhe kreditorët.

b) nga bankat dhe institucionet financiare, duke përfshirë informacion mbi:

i. të dhënat e llogarisë bankare dhe gjendjet e hapjes dhe mbylljes së këtyre llogarive brenda një viti tatimor;

ii. pagesat e interesit;

iii. aktive të tjera që ata mbajnë në emër të një personi;

iv. çdo transaksion tjetër financiar të nevojshëm për nevoja kontrolli dhe përcaktimi të detyrimit tatimor.

c) nga kompanitë e ndërmjetësimit ose menaxherët e fondeve të investimeve, përfshirë transaksionet e letrave me vlerë ose llogaritë e menaxhimit të aktivit/portofolit;

ç) nga fondet e pensioneve në lidhje me planet e pensioneve private;

d) nga agjentët e pasurive të paluajtshme në lidhje me transaksionet e klientëve të tyre;

dh) nga noterët për noterizimin e transaksioneve të shitblerjes së pasurive të paluajtshme ose të luajtshme, ose kontratat e shërbimit;

e) nga entitetet rezidente dhe jorezidente për pagesat e bëra ndaj personave jorezidentë;

ë) nga institucionet shtetërore dhe punonjësit e administratës shtetërore;

f) nga çdo person në transaksione financiare ose biznesi me një tatimpagues;

g) nga donatorë, organizata ndërkombëtare, organizata jofitimprurëse, vendase ose të huaja, në lidhje me pagesat e bëra ndaj tatimpaguesve për furnizimin e mallrave dhe shërbimeve;

gj) nga tregjet elektronike, ndërfaqet elektronike dhe platformat digjitale në lidhje me furnitorët, përdoruesit dhe transaksionet e tyre;

h) nga bazat e të dhënave dhe regjistrat e të dhënave publike dhe private, përfshirë kadastrën, regjistrin e pronarëve përfitues, regjistrin elektronik të llogarive bankare dhe Qendrën Kombëtare të Regjistrimit, në lidhje me të dhënat e tatimpaguesve që mbahen në to.

Neni 63

Përjashtimi nga detyrimi për të dhënë informacion

1. Në rast të hetimit tatimor nga organet e administratës tatimore, kanë të drejtë të refuzojnë dhënien e informacionit, sipas këtij neni, personat e mëposhtëm:

a) anëtarët e familjes së tatimpaguesit;

b) avokatët, noterët, këshilltarët tatimorë, doktorët, personeli mjekësor, për informacionin, që kanë njohur gjatë veprimtarisë normale profesionale.

2. Personat e përmendur në pikën 1 të këtij neni, me përjashtim të tatimpaguesit, nuk janë të detyruar të japin informacion tek organet e administratës tatimore kur ky informacion mund t’i ekspozojë ata, si dhe anëtarët e shkallës së parë të familjes së tyre për ndjekje penale. Në këtë rast, administrata tatimore duhet ta njohë tatimpaguesin me të drejtën e këtyre personave për të refuzuar dhënien e informacionit, informacion, і cili duhet të regjistrohet dhe nënshkruhet nga personi i interesuar.

Seksioni V Raporti për çdo vend (Shtuar seksioni V me ligj nr. 95, datë 7.12.2023) Neni 63/1 Terminologjia bazë për raportin për çdo vend Për qëllime të neneve 63/2 deri 63/6 dhe 115/4 të këtij ligji, termat e mëposhtëm kanë këto kuptime:

a) “Grup” është një bashkësi entitetesh të lidhura nëpërmjet pronësisë ose kontrollit, në mënyrë të tillë që kërkohet të përgatiten pasqyrat financiare të konsoliduara për qëllime të raportimit financiar, sipas parimeve të zbatueshme të kontabilitetit, ose do të kërkoheshin nëse interesat e kapitalit të ndonjë prej entiteteve do të tregtoheshin në një bursë publike të letrave me vlerë;

b) “Grup shoqërie shumëkombëshe” është çdo grup që:

i. përfshin dy ose më shumë entitete, rezidenca tatimore e të cilave është në juridiksione të ndryshme ose përfshin një entitet që është rezident për qëllime tatimore në një juridiksion dhe i nënshtrohet tatimit në lidhje me biznesin e kryer nëpërmjet një selie të përhershme në një juridiksion tjetër; dhe ii. nuk është një grup shoqërie shumëkombëshe i përjashtuar;

c) “Grup shoqërie shumëkombëshe i përjashtuar” është një grup që ka të ardhura totale të konsoliduara të grupit më pak se 105 000 000 000 (njëqind e pesë miliardë) lekë gjatë vitit fiskal pararendës të vitit fiskal raportues, siç pasqyrohet në pasqyrat financiare të konsoliduara për atë vit fiskal;

ç) “Entitet përbërës” është:

i. çdo njësi e veçantë biznesi e një grupi shoqërie shumëkombëshe, që përfshihet në pasqyrat financiare të konsoliduara të grupit të shoqërive shumëkombëshe për qëllime të raportimit financiar ose do të përfshihej nëse interesat e kapitalit të një njësie të tillë biznesi janë tregtuar në një bursë publike të letrave me vlerë;

ii. çdo njësi biznesi që përjashtohet nga pasqyrat financiare të konsoliduara të grupit të shoqërive shumëkombëshe vetëm për arsye të madhësisë ose të materialitetit; dhe iii. çdo seli e përhershme e ndonjë njësie të veçantë biznesi të grupit të shoqërive shumëkombëshe të përfshirë në nënndarjet “i” ose “ii” të kësaj shkronje, me kushtin që njësia e biznesit të përgatisë një pasqyrë financiare të veçantë për një seli të tillë të përhershme për qëllime të raportimit financiar, raportimit në përputhje me legjislacionin tatimor ose të kontrollit të menaxhimit të brendshëm;

d) “Entitet raportues” është entiteti përbërës, të cilit i kërkohet të paraqesë një raport për çdo vend, në përputhje me kërkesat e nenit 63/4 të këtij ligji, në juridiksionin e tij të rezidencës tatimore, në emër të grupit të shoqërive shumëkombëshe. Entiteti raportues është entiteti mëmë përfundimtar;

dh) “Entitet mëmë përfundimtar” është një entitet përbërës i një grupi shoqërie shumëkombëshe, që plotëson kriteret e mëposhtme:

i. zotëron në mënyrë të drejtpërdrejtë ose jo të drejtpërdrejtë një interes të mjaftueshëm në një ose më shumë entitete të tjera përbërëse të një grupi shoqërie shumëkombëshe, në mënyrë të tillë që i kërkohet të përgatisë pasqyrat financiare të konsoliduara sipas parimeve të kontabilitetit, që zbatohen përgjithësisht në juridiksionin e tij të rezidencës tatimore, ose nëse interesat e tij të kapitalit janë tregtuar në një bursë publike të letrave me vlerë në juridiksionin e tij të rezidencës tatimore; dhe ii. nuk ka asnjë entitet tjetër përbërës të grupit të shoqërive shumëkombëshe, që zotëron në mënyrë të drejtpërdrejtë ose jo të drejtpërdrejtë një interes si ai i përshkruar në nënndarjen “i” të kësaj shkronje;

e) “Vit fiskal” është një periudhë kontabël vjetore për të cilën entiteti mëmë përfundimtar i grupit të shoqërive shumëkombëshe përgatit pasqyrat e tij financiare;

ë) “Vit fiskal raportues” është ai vit fiskal, rezultatet financiare dhe operacionale të të cilit pasqyrohen në raportin për çdo vend të përcaktuar në nenin 63/4 të këtij ligji;

f) “Pasqyra financiare të konsoliduara” janë pasqyrat financiare të një grupi shoqërie shumëkombëshe në të cilën aktivet, pasivet, të ardhurat, shpenzimet dhe flukset e mjeteve monetare të entitetit mëmë përfundimtar dhe të entiteteve përbërëse paraqiten si ato të një entiteti të vetëm.

Neni 63/2 Detyrimi për dorëzimin e raportit për çdo vend Çdo entitet mëmë përfundimtar i një grupi shoqërie shumëkombëshe, që është rezident për qëllime tatimore në Republikën e Shqipërisë, paraqet një raport për çdo vend, në përputhje me kërkesat e nenit 63/4 të këtij ligji, në administratën tatimore të Republikës së Shqipërisë për vitin e tij fiskal raportues në ose përpara datës së përcaktuar në nenin 63/5 të këtij ligji.

Neni 63/3 Njoftimi Çdo entitet përbërës, që është rezident për qëllime tatimore në Shqipëri, duhet të njoftojë administratën tatimore jo më vonë se dita e fundit e vitit fiskal raportues të grupit të shoqërive shumëkombëshe:

a) nëse është entiteti mëmë përfundimtar i grupit; ose

b) kur entiteti përbërës nuk është entiteti mëmë përfundimtar, të dhënat identifikuese dhe rezidencën tatimore të entitetit raportues.

Neni 63/4 Raporti për çdo vend

1. Raporti për çdo vend në lidhje me një grup shoqërie shumëkombëshe është një raport që përmban:

a) informacion lidhur me shumën e të ardhurave, fitimin (humbjen) përpara tatimit mbi të ardhurat, tatimin e paguar mbi të ardhurat, tatimin e përllogaritur mbi të ardhurat, kapitalin e deklaruar, fitimet e akumuluara, numrin e punonjësve dhe asetet e prekshme, përveç parasë cash ose ekuivalentëve të saj, për çdo juridiksion në të cilin operon grupi i shoqërive shumëkombëshe;

b) një identifikim të çdo entiteti përbërës të grupit të shoqërive shumëkombëshe, që përcakton juridiksionin e rezidencës tatimore të entitetit përbërës dhe, kur është i ndryshëm nga juridiksioni i rezidencës tatimore, juridiksionin sipas ligjeve të të cilit është i organizuar entiteti përbërës dhe natyrën e aktivitetit ose aktiviteteve kryesore të biznesit të entitetit përbërës.

2. Procedurat dhe informacioni i detajuar që përmban raporti për çdo vend përcaktohen me vendim të Këshillit të Ministrave.

Neni 63/5 Afati për dorëzim Raporti për çdo vend, sipas dispozitave të këtij ligji, dorëzohet jo më vonë se 12 (dymbëdhjetë) muaj pas ditës së fundit të vitit fiskal raportues të grupit të shoqërive shumëkombëshe.

Neni 63/6 Përdorimi dhe konfidencialiteti i informacionit të raportit për çdo vend

1. Administrata tatimore e Republikës së Shqipërisë përdor raportin për çdo vend për qëllime të vlerësimit të rreziqeve të nivelit të lartë për transferimin e çmimit dhe rreziqeve të tjera të lidhura me erozionin e bazës tatimore dhe zhvendosjen e fitimit në ose nga Republika e Shqipërisë, duke përfshirë vlerësimin e rrezikut të mosrespektimit nga anëtarët e grupit të shoqërive shumëkombëshe të rregullave të zbatueshme, lidhur me transferimin e çmimit dhe, kur është e përshtatshme, për analiza ekonomike dhe statistikore. Rregullimet e transferimit të çmimit nga administrata tatimore e Republikës së Shqipërisë nuk bazohen në raportin për çdo vend.

2. Administrata tatimore e Republikës së Shqipërisë ruan konfidencialitetin e informacionit që përmban raporti për çdo vend, të paktën në të njëjtën masë që do të zbatohej nëse një informacion i tillë do t’i jepej sipas dispozitave të konventës shumëpalëshe mbi ndihmën e ndërsjellë administrative në çështjet tatimore.

KREU VII DEKLARATA TATIMORE

Neni 64

Deklarata tatimore

1. Tatimpaguesi dorëzon deklaratë të plotë dhe të saktë tatimore brenda afateve të përcaktuara në legjislacionin tatimor përkatës.

2. Kur ligji tatimor kërkon dorëzimin e deklaratës tatimore, tatimpaguesi bën vetëdeklarim të shumës së detyrimit tatimor apo të kontributit, pa pritur vlerësimin, njoftimin ose kërkesën nga administrata tatimore dhe e paguan këtë tatim në afatin dhe vendin e përcaktuar në ligjin tatimor përkatës, pavarësisht nga shtyrja e afatit për dorëzimin e deklaratës tatimore.

3. Deklaratat dhe formularët e tjerë, që duhen dorëzuar nga tatimpaguesi, vihen në dispozicion të publikut, pa pagesë, nëpërmjet:

a) publikimit në faqen zyrtare të internetit të administratës tatimore;

b) sporteleve të njësive të shërbimit për tatimpaguesin;

c) dërgimit me postë, duke përdorur shërbimin postar rekomande, për ata tatimpagues, që paraqesin kërkesë me shkrim për ofrimin e këtij shërbimi.

4. Formatet e deklaratave dhe dokumentacioni, që i bashkëlidhet deklaratës tatimore, miratohen me udhëzim të Ministrit të Financave.

Neni 65

Dorëzimi i deklaratës tatimore (Shtuar pika 6 me ligjin nr. 10209, datë 23.12.2009; shtuar pika 7 me ligjin nr. 10415, datë 7.4.2011; ndryshuar pika 7 me ligjin nr. 84/2014, datë 17.7.2014; ndryshuar pika 7 me ligjin nr. 112/2016, datë 3.11.2016; ndryshuar pika 1 me ligjin nr. 79/2025, datë 11.12.2025)

1. Tatimpaguesi e dorëzon deklaratën tatimore në mënyrë elektronike nga llogaria e tij në sistemin informatik të administratës tatimore.

2. Ministri i Financave, me udhëzim, miraton procedurën e dorëzimit të deklaratës tatimore.

3. Në rastet kur afati i fundit për dorëzimin e deklaratës bie në ditë pushimi, atëherë si ditë e fundit e afatit llogaritet dita e parë e punës, pas ditës së pushimit.

4. Tatimpaguesi dhe, nëse ka, përfaqësuesi i tij nënshkruajnë deklaratën tatimore, shënojnë numrat e tyre të identifikimit tatimor dhe konfirmojnë, në përgjegjësinë e tyre, se deklarata është e plotë dhe e saktë.

5. Deklarata tatimore vlerësohet e dorëzuar, nëse plotësohen kërkesat e këtij ligji, të legjislacionit tatimor dhe të akteve nënligjore, të dala në zbatim të tyre.

6. Këshilli i Ministrave përcakton afatet kohore për dorëzimin e deklaratave tatimore e të dokumenteve të tjera tatimore, vetëm nëpërmjet formës elektronike.

7. Për tatimpaguesit, persona fizikë, që kërkojnë të çregjistrohen, detyrimi për të deklaruar ndërpritet në momentin e aplikimit të tyre për çregjistrim në Qendrën Kombëtare të Biznesit, ndërsa për tatimpaguesit, persona juridikë, detyrimi për të deklaruar ndërpritet në momentin e dorëzimit të raportit përfundimtar të likuidimit /bashkimit/ndarjes në Qendrën Kombëtare të Biznesit ose gjykatë.

Neni 66

Zgjatja e afatit për dorëzimin e deklaratës tatimore (Shfuqizuar me ligjin nr. 84/2014, datë 17.7.2014)

Neni 67

Deklarata tatimore e ndryshuar (Ndryshuar pika 2 me ligjin nr. 112/2016, datë 3.11.2016; ndryshuar fjalë në pikën 1 dhe shtuar pika 5 me ligjin nr. 79/2025, datë 11.12.2025)

1. Tatimpaguesi mund të dorëzojë deklaratë të re tatimore, me ndryshime, në rastet kur deklarata tatimore fillestare është e pasaktë dhe me mangësi.

2. Deklarata e ndryshuar prej tatimpaguesit mund të dorëzohet brenda 24 muajve nga afati i dorëzimit të deklaratës fillestare, me kushtin që kjo deklaratë të mos jetë kontrolluar më parë nga administrata tatimore.

Përjashtimisht përcaktimit të paragrafit të parë të kësaj pike, një deklaratë e kontrolluar mund të ndryshohet nga tatimpaguesi në çdo rast kur ai ka për të deklaruar një detyrim tatimor më të madh se detyrimi që ka rezultuar nga kontrolli.

3. Dorëzimi i një deklarate tatimore të ndryshuar përfshin:

a) pagesën e çdo detyrimi tatimor shtesë;

b) kamatëvonesën për periudhën ndërmjet afatit të dorëzimit të deklaratës fillestare dhe datës së dorëzimit të deklaratës tatimore të ndryshuar;

c) kërkesën e tatimpaguesit për kreditimin e tatimit të paguar më tepër plus interesat e llogaritura për këtë periudhë, duke e llogaritur këtë shumë për llogari të detyrimeve tatimore të tjera, ekzistuese apo të ardhshme;

ç) kërkesën për rimbursimin e tatimit të paguar më tepër, plus interesat.

4. Për llogaritjen e interesit të përmendur në pikën 3 të këtij neni, zbatohen dispozitat e këtij ligji për kamatëvonesat.

5. Deklaruesi i deklaratës vjetore të të ardhurave personale mund ta korrigjojë deklaratën e dorëzuar brenda 6 muajve nga data e dorëzimit, por jo më shumë se dy herë.

KREU VIII VLERËSIMI TATIMOR

Neni 68

Vlerësimi tatimor (Ndryshuar pika 8 me ligjin nr. 10209, datë 23.12.2009; ndryshuar pika 8 me ligjin nr. 164/2014, datë 4.12.2014; ndryshuar fjalë në pikën 4 me ligjin nr. 112/2016, datë 3.11.2016; ndryshuar fjalë në pikën 8 me ligjin nr. 97/2018, datë 3.12.2018)

1. Vlerësimi tatimor:

a) është llogaritja e detyrimit tatimor të tatimpaguesit nga administrata tatimore;

b) në rastet kur shuma e detyrimit tatimor të vetëdeklaruar nuk paguhet, është njoftimi, që kërkon pagesën e detyrimit tatimor në datën e përcaktuar në ligjin përkatës.

2. Nëse tatimpaguesit i kërkohet të dorëzojë deklaratë tatimore dhe të paguajë detyrimin tatimor, deklarata merret si vetëvlerësim tatimor. Pagesa e tatimit bëhet në mënyrën dhe afatin e parashikuar në ligjin tatimor përkatës.

3. Nëse detyrimi tatimor mbahet në burim nga një agjent i mbajtjes së tatimit në burim dhe tatimpaguesi nuk është subjekt i kërkesës së dorëzimit të deklaratës tatimore për tatimin e mbajtur në burim, mbajtja e tatimit në burim është vlerësim tatimor.

4. Nëse administrata tatimore konstaton se detyrimi tatimor, i dhënë në deklaratën tatimore, është i pasaktë ose tatimpaguesi nuk ka dorëzuar deklaratë tatimore apo nuk ka paguar detyrimin tatimor, administrata tatimore bën vlerësimin tatimor.

5. Administrata tatimore vlerëson detyrimin tatimor të tatimpaguesit, në përputhje me dispozitat e legjislacionit përkatës. Vlerësimi bazohet në:

a) informacionin, që përmban deklarata tatimore e tatimpaguesit;

b) rezultatet e një kontrolli, në përputhje me kreun X të këtij ligji;

c) mënyrat alternative të vlerësimit, të parashikuara në nenin 72 të këtij ligji.

6. Vlerësimi i bërë nga administrata tatimore hyn në fuqi 10 ditë kalendarike pas datës, kur njoftimi i vlerësimit tatimor dhe i kërkesës për të paguar vlerësohet të jetë marrë, siç parashikohet në nenin 69 të këtij ligji.

7. Kur një vlerësim bëhet në përputhje me shkronjat “b” ose “c” të pikës 5 të këtij neni, barra e provës, që shuma e këtij vlerësimi është e pasaktë, bie mbi tatimpaguesin.

8. Shuma e detyrimit tatimor e detyrueshme për t’u paguar ose shuma e tepricës së kredisë, me vlerë deri në 1 000 (një mijë) lekë, vlerësohet si detyrim ose kredi me vlerë zero dhe për shuma të tilla nuk bëhet vlerësim tatimor nga administrata tatimore.

Neni 69

Njoftimi i vlerësimit tatimor dhe kërkesa për pagesën e detyrimit tatimor (Shtuar fjali në pikën 4 me ligjin nr. 179, datë 28.12.2013; ndryshuar pika 1 me ligjin nr. 84/2014, datë 17.7.2014; ndryshuar pika 1 dhe shkronja “d” e pikës 2 me ligjin nr. 112/2016, datë 3.11.2016; ndryshuar pika 1 shkronja “a” e pikës 2 dhe shtuar togfjalësh në fund të pikës 4 me ligjin nr. 79/2025, datë 11.12.2025)

1. Administrata tatimore, brenda 10 ditëve kalendarike nga data e llogaritjes së vlerësimit prej saj, i dërgon tatimpaguesit njoftimin e vlerësimit tatimor dhe kërkesën për pagesën e detyrimit tatimor:

a) në rrugë elektronike, në përputhje me legjislacionin e komunikimeve elektronike, kur njoftimi i vlerësimit është nënshkruar elektronikisht; ose

b) nëpërmjet shërbimit postar rekomande në rastet kur njoftimi i vlerësimit nuk është i nënshkruar elektronikisht.

2. Njoftimi i vlerësimit tatimor dhe kërkesa për pagesën e tatimit duhet të përmbajë informacionin, si më poshtë:

a) emrin dhe mbiemrin e tatimpaguesit, person fizik ose emrin e entitetit, adresën e selisë dhe adresën elektronike;

b) numrin e identifikimit të tatimpaguesit;

c) datën e njoftimit;

ç) çështjen, për të cilën bëhet njoftimi dhe periudhën ose periudhat tatimore, që u referohet njoftimi;

d) shumën e tatimit të vlerësuar apo, sipas rastit, edhe uljen e humbjes tatimore, uljen e kredisë tatimore, kamatëvonesën, gjobat.

dh) kërkesën për pagesën e tatimit dhe afatin e pagesës;

e) vendin dhe mënyrën e pagesës së tatimit;

ë) shpjegimin e arsyes së vlerësimit;

f) shpjegimin e së drejtës së tatimpaguesit për të ankimuar vlerësimin.

3. Njoftimi i vlerësimit tatimor dhe kërkesa për pagesën e tij regjistrohen në dosjen e tatimpaguesit, brenda 5 ditëve kalendarike nga data e lëshimit.

4. Nëse nuk bie dakord me vlerësimin e detyrimit tatimor, të kryer nga administrata tatimore, tatimpaguesi, brenda 30 ditëve kalendarike nga data e marrjes së njoftimit të vlerësimit, ose të vlerësuar si të jetë marrë dhe të kërkesës, mund të ankimojë, në përputhje me procedurat e parashikuara në kreun XIII të këtij ligji. Në rastet kur nuk mund të provohet e saktë data e marrjes së vlerësimit të detyrimit tatimor, konsiderohet të jetë marrë 10 ditë nga data e nisjes me postë ose në format elektronik.

Neni 70

E drejta për të nxjerrë njoftimin e vlerësimit tatimor (Shtuar fjali në pikën 3 me ligjin nr. 179, datë 28.12.2013, ndryshuar pikat 1 dhe 3 me ligjin nr. 83/2022, datë 24.11.2022)

1. Drejtoritë rajonale tatimore apo strukturat e tjera të autorizuara në Drejtorinë e Përgjithshme të Tatimeve, që mund të kryejnë të njëjtat funksione me to, autorizohen të nxjerrin njoftim vlerësimi tatimor për tatimpaguesit e regjistruar në administratën tatimore qendrore, përfshirë entitetet, personat fizikë tregtarë, të vetëpunësuarit, individët që kanë detyrimin për deklarimin e të ardhurave individuale në rastet kur ndaj tyre është ushtruar kontroll nga strukturat përgjegjëse sipas procedurave të përcaktuara në kreun X të këtij ligji, si dhe ndaj çdo personi tjetër që ka detyrimin për të deklaruar dhe/ose paguar tatime apo taksa sipas legjislacionit në Republikën e Shqipërisë.

2. Për detyrimet tatimore, të lidhura me kontributet e sigurimeve shoqërore dhe shëndetësore, njoftimin e vlerësimit tatimor, në të gjitha rastet, nxirret nga drejtori i drejtorisë rajonale.

3. Strukturat e menaxhimit të taksave dhe tarifave të njësive të vetëqeverisjes vendore, nxjerrin njoftim vlerësimi për kategoritë e detyrimeve dhe tatimpaguesve sipas legjislacionit në fuqi për taksat dhe tarifat vendore.

Neni 71

E drejta për të përdorur mënyra alternative vlerësimi (Ndryshuar shkronja “e“ me ligjin nr. 179, datë 28.12.2013; shtuar shkronja “f” me ligjin nr. 97/2018, datë 3.12.2018; ndryshuar shkronja “ë” me ligjin 83/2019, datë 18.12.2019; ndryshuar togfjalësh në shkronjën “e” të pikës 1me ligjin nr. 79/2025, datë 11.12.2025)

1. Administrata tatimore ka të drejtë të përdorë mënyra alternative vlerësimi të detyrimit tatimor të tatimpaguesit dhe të nxjerrë një vlerësim, në rastet kur:

a) tatimpaguesi nuk dorëzon deklaratën tatimore, në përputhje me afatin dhe mënyrën e kërkuar në legjislacionin tatimor përkatës;

b) deklarata tatimore përmban të dhëna të pasakta ose të falsifikuara;

c) tatimpaguesi nuk mban ose ruan llogari apo regjistrime të sakta të transaksioneve;

ç) tatimpaguesi nuk bashkëpunon me kontrollin tatimor të autorizuar;

d) tatimpaguesi nuk vë në dispozicion informacionin e kërkuar dhe dokumente të tjera, të nevojshme, për llogaritjen e detyrimit të tij tatimor;

dh) tatimpaguesi hyn në transaksione me persona të lidhur jo në bazë të parimit të vlerës së tregut, ose hyn në transaksione pa efekte ekonomike thelbësore;

e) tatimpaguesi hyn në transaksione shitblerjeje me para në dorë, që tejkalojnë shumën 100 000 lekë;

ë) tatimpaguesi nuk lëshon faturë dhe/ose nuk kryen procedurat e fiskalizimit, në përputhje me legjislacionin në fuqi për faturën dhe sistemin e monitorimit të qarkullimit.

f) tatimpaguesi me status “person fizik tregtar”, i cili, për qëllime të shmangies tatimore dhe minimizimit të detyrimit tatimor, regjistron/mban më tepër se një numër identifikimi unik të subjektit, dhe dorëzon deklarata të veçanta për çdo NIPT/NUIS.

Neni 71/1 Letërkujtesa (Shtuar me ligjin nr. 84/2014, datë 17.7.2014; shtuar pika 6 me ligjin nr. 79/2025, datë 11.12.2025)

1. Administrata tatimore, brenda 5 ditëve kalendarike nga përfundimi i afatit ligjor të deklarimit, i lëshon tatimpaguesit, i cili nuk ka dorëzuar deklaratën e tij të një periudhe tatimore, një letërkujtesë, sipas formës dhe përmbajtjes së përcaktuar në udhëzimin e Ministrit të Financave.

2. Administrata tatimore, brenda 10 ditëve kalendarike nga lëshimi i letërkujtesës, të përcaktuar në pikën 1, të këtij neni, mund të lëshojë një njoftim vlerësimi automatik nga zyra për tatimpaguesin, i cili, edhe pas lëshimit të letërkujtesës, vazhdon të mos ketë dorëzuar deklaratën e tij të një periudhe tatimore.

3. Vlerësimi tatimor nga zyra bëhet në mënyrë automatike nga sistemi informatik, në një nga mënyrat e përcaktuara në nenin 72, të këtij ligji.

4. Njoftimvlerësimi, i lëshuar sipas pikës 2, të këtij neni, nuk mund të apelohet nga tatimpaguesi. Tatimpaguesi, i cili nuk është dakord me këtë njoftim vlerësimi, mund të paraqesë deklaratën e tij tatimore, e cila anulon tërësisht vlerësimin tatimor nga zyra.

5. Ndaj tatimpaguesit që vazhdon të mos paraqesë deklaratën e tij tatimore, për të cilën është bërë një vlerësim automatik tatimor nga zyra, administrata tatimore fillon procedurat e mbledhjes me forcë të detyrimeve tatimore, si për çdo detyrim tjetër tatimor të papaguar.

6. Në rast se tatimpaguesi nuk ka dorëzuar deklaratën e TVSH-së brenda afatit të përcaktuar në ligj, sistemi elektronik i administratës tatimore, brenda 24 orëve nga përfundimi i këtij afati, plotëson dhe dorëzon automatikisht deklaratën e TVSH-së mbi bazën e të dhënave të librit të shitjes e të librit të blerjes. Përgjegjësia për çdo penalitet për mosdorëzimin e saj në afat i ngarkohet tatimpaguesit, i cili ka të drejtën ta kontrollojë, ta ndryshojë apo ta korrigjojë deklaratën sipas procedurës dhe afateve të këtij ligji.

Neni 71/2 Përdorimi i metodave alternative të vlerësimit në rastet e veprimeve për shmangien e tatimit dhe abuzimit me parimet e ligjit tatimor (Shtuar me ligjin nr. 97/2018, datë 3.12.2018, ndryshuar me ligjin nr. 83/2022, datë 24.11.2022)

1. Në përllogaritjen e të ardhurave dhe fitimit të tatueshëm, administrata tatimore mund të mos marrë në konsideratë marrëveshje ose seri marrëveshjesh të lidhura ndërmjet tatimpaguesve, të cilat kanë si qëllim kryesor apo një ndër qëllimet kryesore sigurimin e përfitimeve tatimore. Marrëveshje të tilla për qëllime tatimore trajtohen duke iu referuar substancës së tyre ekonomike.

2. Për qëllime të pikës 1 të këtij neni, “marrëveshje apo seri marrëveshjesh” nënkupton çdo transaksion, veprim, operacion, marrëveshje, grant, mirëkuptim, premtim, ndërveprim ose ngjarje. Një marrëveshje mund të përbëhet nga më shumë se një veprim ose pjesë veprimi.

3. Për të përcaktuar nëse një marrëveshjeje ose një sërë marrëveshjeve iu mungon thelbi ekonomik, administrata tatimore shqyrton nëse ekziston një ose më shumë nga situatat e mëposhtme:

a) thelbi ligjor i hapave individualë nga e cila përbëhet një marrëveshje, nuk është në përputhje me substancën ligjore të marrëveshjes në tërësi;

b) marrëveshja ose seria e marrëveshjeve zbatohet në një mënyrë e cila nuk është në pajtim me një sjellje të rregullt biznesi;

c) marrëveshja ose seria e marrëveshjeve përfshin elemente që kanë efektin e kompensimit ose anulimit të njëra-tjetrës;

ç) transaksionet e lidhura janë të natyrës qarkulluese;

d) marrëveshja ose seria e marrëveshjeve çon në një përfitim të konsiderueshëm tatimor, por kjo nuk reflektohet në risqet e biznesit të tatimpaguesit ose në fluksin e tij monetar;

dh) marzhi i parashikuar para tatimit është i rëndësishëm në krahasim me shumën e përfitimit tatimor të parashikuar.

4. Për qëllim të pikës 1 të këtij neni, qëllimi i këtyre marrëveshjeve ose seri marrëveshjesh konsiston në shmangien e tatimit edhe nëse, pavarësisht mungesës së këtij qëllimi nga tatimpaguesit, por nëse ky qëllim vjen në kundërshtim me objektin, arsyetimin dhe qëllimin e dispozitave tatimore që do të duhej të zbatoheshin.

5. Për qëllim të pikës 1 të këtij neni, një qëllim i caktuar duhet të konsiderohet kritik kur çdo qëllim tjetër që i atribuohet ose mund t’i atribuohet marrëveshjes ose serisë së marrëveshjeve duket i papërfillshëm, duke pasur parasysh të gjitha rrethanat e rastit.

6. Për të përcaktuar nëse një marrëveshje ose një seri marrëveshjesh ka sjellë një përfitim tatimor në kuptim të pikës 1 të këtij neni, administrata tatimore krahason shumën e tatimit që detyrohet të paguajë një tatimpagues, duke marrë parasysh marrëveshjen, me shumën që i njëjti tatimpagues do të detyrohej të paguante në të njëjtat rrethana në mungesën e një marrëveshjeje të tillë.

7. Për qëllime të këtij neni, barra e provës i takon administratës tatimore.

Neni 72

Baza e mënyrave alternative të vlerësimit (Ndryshuar shkronjat“ ç” dhe ”d” me ligjin nr. 164/2014, datë 4.12.2014)

1. Mënyrat alternative të vlerësimit nuk kufizohen, por bazohen në:

a) të dhëna të drejtpërdrejta, që gjenden në deklaratat tatimore ose në dokumentet apo në një informacion tjetër, dhënë nga tatimpaguesi;

b) të dhëna të drejtpërdrejta, dokumente ose informacion, dhënë nga palë të treta;

c) krahasime me një veprimtari ekonomike të ngjashme, të kryer nga tatimpagues të tjerë;

ç) të dhënat e tërthorta, bazuar në çmimet e tregut të mallrave dhe shërbimeve të ngjashme, të çmimeve të referencave të qirave, të përcaktuara me vendim të Këshillit të Ministrave;

d) çmimet sipas të dhënave të disponueshme në doganë ose çmimet e referencës së shitjes me pakicë që disponon Drejtoria e Përgjithshme e Tatimeve.

2. Kur vlerësohet detyrimi tatimor, që lind nga transaksione ndërmjet personave të lidhur, mënyra alternative e përdorur pasqyron të ardhurat e tatueshme, që do të kishin rezultuar nga transaksione të krahasueshme, ndërmjet personave të palidhur.

3. Rregullat për zbatimin e këtij neni përcaktohen në udhëzimin e Ministrit të Financave, të nxjerrë në zbatim të këtij ligji.

Neni 73

E drejta e administratës tatimore për të bërë vlerësim tatimor, si dhe e drejta e tatimpaguesit për të kërkuar tepricën kreditore (Ndryshuar me ligjin nr. 164/2014, datë 4.12.2014; shtuar fjalë në pikat 1 dhe 4 me ligjin nr. 112/2016, datë 3.11.2016)

1. E drejta e administratës tatimore për të bërë një vlerësim tatimor parashkruhet brenda 5 vjetëve nga data e fundit e dorëzimit të deklaratës tatimore, fillestare ose të ndryshuar të përcaktuar në legjislacionin tatimor përkatës.

2. Afati i parashkrimit, i përcaktuar në pikën 1 të këtij neni, mund të ndërpritet kur:

a) si rezultat i apelimit të vlerësimit të mëparshëm bëhet një vlerësim i ri. Në këtë rast afati i parashkrimit është më i mëvonshëm se:

i) afati i parashkrimit, të përcaktuar në pikën 1 të këtij neni;

ii) 30 ditë kalendarike nga data e vendimit përfundimtar të gjykatës së apelit;

b) si rezultat i një kontrolli ose hetimi tatimor të tatimpaguesit nga administrata tatimore, bëhet një vlerësim i ri. Në këtë rast, afati i parashkrimit është më i mëvonshëm se:

i) afati i parashkrimit të përcaktuar në pikën 1 të këtij neni;

ii) 30 ditë kalendarike nga data e nxjerrjes së vendimit përfundimtar, me shkrim, të kontrollit ose hetimit tatimor;

c) ndaj tatimpaguesit ka filluar një çështje penale për detyrimet e tij tatimore. Në këtë rast, afati i parashkrimit është më i mëvonshëm se:

i) afati i parashkrimit të përcaktuar në pikën 1 të këtij neni;

ii) 30 ditë kalendarike nga data e marrjes nga gjykata e vendimit të formës së prerë, për çështjen penale.

3. Në rastet kur ndaj tatimpaguesit hapet një çështje penale për detyrimet tatimore të tij, pas kalimit të afatit të parashikuar në pikën 1 të këtij neni, e drejta për vlerësim tatimor vlerësohet se nuk është parashkruar.

4. E drejta e tatimpaguesit për të kërkuar rimbursimin e tepricës kreditore parashkruhet kur kanë kaluar 5 vjet nga data e dorëzimit të deklaratës tatimore, fillestare ose të ndryshuar të përcaktuar në legjislacionin tatimor përkatës.

KREU IX PAGESA DHE RIMBURSIMI I TATIMIT

Neni 74

Afatet dhe mënyrat e pagesës së detyrimit tatimor (Ndryshuar pika 3 me ligjin nr. 112/2016, datë 3.11.2016)

1. Tatimpaguesi shlyen detyrimet tatimore brenda afateve të parashikuara në ligjin tatimor përkatës.

2. Kur administrata tatimore nxjerr vlerësimin e një detyrimi tatimor, në përputhje me kreun VIII të këtij ligji, detyrimi tatimor i vlerësuar paguhet brenda 30 ditëve kalendarike, nga data në të cilën tatimpaguesi ka marrë ose vlerësohet të ketë marrë njoftimin e vlerësimit dhe kërkesën për pagesë.

3. Tatimpaguesi mund t’i paguajë detyrimet tatimore në mënyrë elektronike, nëpërmjet bankave, institucioneve të tjera financiare ose të autorizuara, që kanë lidhur marrëveshje me administratën tatimore, për të pranuar këto pagesa.

4. Kur afati i fundit për pagesën e detyrimit tatimor bie në ditë pushimi, data e pagesës së tatimit është dita e parë e punës, pas ditës së pushimit.

5. Të gjitha pagesat tatimore kryhen në lekë.

Neni 75

Detyrimet tatimore të paguara më tepër (Shtuar pika 3 me ligjin nr. 97/2018, datë 3.12.2018;

shtuar pika 4 me ligjin 83/2019, datë 18.12.2019)

1. Kur shuma e detyrimit tatimor të paguar është më e madhe se shuma e tatimit të vlerësuar në njoftimin për vlerësimin tatimor, administrata tatimore e kalon shumën e paguar më tepër për llogari të detyrimeve të tjera tatimore, të papaguara nga tatimpaguesi.

Pas kësaj, me miratimin, me shkrim, të tatimpaguesit, shuma e mbetur, nëse ka:

a) rimbursohet automatikisht, brenda 30 ditëve kalendarike nga data e derdhjes së shumës së paguar më tepër;

b) kalohet për llogari të detyrimeve tatimore të ardhshme të tatimpaguesit.

2. Veprimet për shumat e paguara më tepër për detyrimet tatimore regjistrohen në dosjen e tatimpaguesit.

3. Kompensimi nga teprica kreditore i detyrimeve tatimore brenda çdo tatimi, me përjashtim të kontributeve të sigurimeve shoqërore dhe shëndetësore, kryhet automatikisht nga sistemi informatik.

4. Në raste të veçanta, shumat e tatimeve dhe të taksave për t’u paguar apo të paguara më tepër në administratën tatimore ose administratën doganore mund të kompensohen përkundrejt njëra-tjetrës. Ministri përgjegjës për financat përcakton me udhëzim rastet e veçanta, procedurat dhe kriteret për zbatimin e kësaj pike.

Neni 75/1 Rimbursimi i TVSH-së dhe kompensimi i detyrimeve tatimore (Shtuar me ligjin nr. 10148, datë 28.9.2009; ndryshuar fjalë me ligjin nr. 179/2013, datë 28.12.2013; ndryshuar me ligjin nr. 164/2014, datë 4.12.2014; riformuluar pika 1 me ligjin nr. 91/2015, datë 23.7.2015; shtuar pika 1.1 me ligjin nr.

112/2016, datë 3.11.2016; shtuar pika 1/2 me ligjin 83/2019, datë 18.12.2019; shtuar pika 1/3 me ligjin nr. 79/2025, datë 11.12.2025)

1. Personat e tatueshëm, të regjistruar për TVSH-në, që rezultojnë me tepricë kreditore, kanë të drejtë të paraqesin kërkesën për rimbursimin e TVSH-së së paguar tepër pranë Drejtorisë së Rimbursimit të TVSH-së nëDrejtorinë e Përgjithshme të Tatimeve. Kjo kërkesë paraqitet sipas formularit të miratuar “Kërkesë për rimbursimin e TVSH-së”.

Brenda 60 ditëve nga data e paraqitjes së kërkesës së tatimpaguesit dhe brenda 30 ditëve nga data e paraqitjes së kërkesës së tatimpaguesve eksportues, Drejtoria e Rimbursimit të TVSH-së në Drejtorinë e Përgjithshme të Tatimeve, në bashkëpunim me drejtorinë rajonale tatimore, ku është i regjistruar tatimpaguesi, verifikojnë situatën tatimore të tatimpaguesit dhe miratojnë tepricën kreditore si të rimbursueshme. Kur është e nevojshme, administrata tatimore ushtron kontroll bazuar në analizën e riskut.

Pagesa e tepricës kreditore të rimbursueshme kryhet brenda pesë ditëve, nëpërmjet sistemit të thesarit, në bazë të rregullave të përcaktuara në udhëzimin e Ministrit të Financave. Në rast të kundërt, personit të tatueshëm i lind e drejta e mospagesës së detyrimeve të tjera tatimore në masën e TVSH-së së pretenduar për rimbursim.

1/1.

Në rastin kur tatimpaguesi, i cili ka kërkuar rimbursim, i nënshtrohet kontrollit, sipas analizës së riskut, me qëllim respektimin e afatit të rimbursimit, sipas këtij neni, afatet e përcaktuara nga nenet 83 dhe 84 nuk do të zbatohen dhe çdo afat do të jetë 5 ditë kalendarike.

1/2. Përjashtimisht përcaktimeve të pikave 1 dhe 1/1, të këtij neni, në raste të veçanta, me kërkesë të administratës tatimore dhe me dakordësinë e tatimpaguesit mund të lidhet një marrëveshje për pagesë me këste, e cila përmban një plan të skeduluar pagesash për detyrimet që administrata tatimore ka ndaj tatimpaguesve, si rezultat i kërkesave të miratuara për rimbursimin e TVSH-së. Në këto raste, detyrimi i administratës tatimore ndaj tatimpaguesit konsiderohet i shlyer dhe nuk aplikohen kamatëvonesat. Rastet kur do të aplikohet, procedurat dhe kriteret për zbatimin e kësaj pike përcaktohen me vendim të Këshillit të Ministrave.

1/3. Kërkesat për rimbursim të tatimpaguesit, për të cilin ka të regjistruar një çështje hetimore në proces, për konsumimin e veprës penale të krijimit të skemave mashtruese me TVSH-në apo fshehje të të ardhurave, parashikuar nga

Neni 144/a

ose nga

Neni 180

i Kodit Penal, pezullohen deri në përfundim të veprimeve hetimore.

2. Mënyra dhe procedurat e hollësishme teknike për zbatimin e pikës 1, të këtij neni, përcaktohen me udhëzim të Ministrit të Financave.

Neni 76

Kamatëvonesa (Shtuar referenca ligjore në pikë 2 dhe një fjali në fund të pikës 3 me ligjin nr. 112/2016, datë 3.11.2016; shtuar pika 5 me ligjin nr. 79/2025, datë 11.12.2025)

1. Kur detyrimi tatimor nuk paguhet në afat, tatimpaguesi është i detyruar që, për periudhën nga afati i pagesës deri në datën e pagesës së tatimit, të paguajë kamatëvonesë për këtë shumë, në masën e përcaktuar në pikën 3 të këtij neni.

2. Nëse një rimbursim, i cili duhej kryer nga administrata tatimore, sipas nenit 75 dhe nenit 75/1 të këtij ligji, nuk kryhet brenda 30 ditëve kalendarike, administrata tatimore paguan kamatëvonesë për shumën e paguar më tepër, si më poshtë:

a) kur një shumë e paguar më tepër kreditohet kundrejt një detyrimi tatimor tjetër, kamatëvonesa paguhet duke filluar nga data e pagesës më tepër deri në afatin e pagesës së tatimit, kundrejt të cilit bëhet kreditimi;

b) kur një shumë e paguar më tepër rimbursohet, kamatëvonesa paguhet për periudhën nga 30 ditë pas bërjes së pagesës më tepër deri në kryerjen e rimbursimit.

3. Masa e kamatëvonesës, sipas këtij neni, është 120 për qind e shkallës së interesit ndërbankar të Bankës së Shqipërisë, që përcaktohet çdo tremujor, në bazë të shkallës mesatare të tremujorit paraardhës. Drejtoria e Përgjithshme e Tatimeve publikon dhe përditëson në faqen zyrtare të internetit normën e interesit që aplikon për llogaritjen e kamatëvonesës.

4. Kamatëvonesa paguhet në çdo rrethanë dhe nuk mund të hiqet nga administrata tatimore, as të ankimohet, me përjashtim të rasteve kur ka gabime në llogaritje ose kur detyrimi tatimor, për të cilin zbatohet, ndryshon.

5. Përjashtimisht nga parashikimi në pikën 4 të këtij neni, kamatëvonesat e parashikuara nga ky ligj nuk zbatohen për njësitë e qeverisjes qendrore dhe njësitë e vetëqeverisjes vendore në rastet kur mosdeklarimi brenda afatit ka ndodhur si pasojë:

a) e zbatimit të një akti ligjor apo nënligjor me efekte prapavepruese; ose

b) e zbatimit të një vendimi gjykate të formës së prerë.

Neni 77

Marrëveshja e pagesës me këste (Ndryshuar pika 1, 3, shtuar fjali në pikën 6, shtuar pikat 7 e 8 me ligjin nr. 112/2016, datë 3.11.2016; ndryshuar pika 7 me ligjin 83/2019, datë 18.12.2019)

1. Kur një rrethanë financiare pengon tatimpaguesin për të paguar në afat detyrimet tatimore, ai mund të lejohet të lidhë në çdo kohë marrëveshje pagese me këste. Në të njëjtën kohë tatimpaguesi duhet të vërtetojë që është në kushtet e pamundësisë financiare për të paguar të plotë detyrimin tatimor, si dhe të tregojë që pavarësisht nga rrethana financiare, ai është në gjendje të përmbushë marrëveshjen.

2. Tatimpaguesi paraqet një kërkesë me shkrim, për të hyrë në një marrëveshje pagese me këste. Kërkesa duhet t’i drejtohet drejtorit të drejtorisë rajonale apo drejtuesit të njësive të ngjashme me të dhe duhet të parashtrojë arsyet, që e pengojnë tatimpaguesin për të paguar detyrimet tatimore.

3.

Marrëveshja e pagesës me këste bëhet me shkrim, brenda 10 ditëve kalendarike nga data e paraqitjes së kërkesës dhe nënshkruhet nga tatimpaguesi dhe drejtori i drejtorisë rajonale apo drejtuesi i njësisë së ngjashme me të. Për të nënshkruar një marrëveshje të pagesës me këste, tatimpaguesi detyrohet të paguajë menjëherë të paktën njëzet për qind të vlerës së detyrimit, për të cilin lidhet marrëveshja.

4. Marrëveshja e pagesës me këste nuk mund të zgjasë më tepër se fundi i vitit kalendarik pasardhës.

5. Administrata tatimore mund ta refuzojë kërkesën për një marrëveshje pagese me këste ose të kërkojë garanci bankare, para se të hyjë në një marrëveshje të tillë.

6. Tatimpaguesi duhet të paguajë kamatëvonesë për të gjitha detyrimet tatimore, pagesa e të cilave shtyhet, sipas marrëveshjes së pagesës me këste. Në rastin kur tatimpaguesi hyn në një marrëveshje të pagesës me këste me administratën tatimore, duke filluar nga muaji që pason muajin në të cilin marrëveshja është vendosur deri në përfundimin e afatit të marrëveshjes, me kushtin që marrëveshja të jetë përmbushur tërësisht, tatimpaguesi paguan kamatëvonesë për detyrimin tatimor, pagesa e të cilit shtyhet, por nuk llogaritet gjobë për pagesë të vonuar sipas nenit 114 të këtij ligji.

7. Marrëveshja për pagesë me këste mund të lidhet për detyrime tatimore të vendosura nga administrata tatimore, si rezultat i një vlerësimi tatimor të kryer, sipas nenit 68, të këtij ligji, si dhe për detyrime tatimore të vetëdeklaruara nga tatimpaguesi.

Pavarësisht sa më sipër, administrata tatimore nuk hyn në një marrëveshje të pagesës me këste, për detyrim tatimor mbi të ardhurat, të mbajtur në burim dhe të vetëdeklaruar nga tatimpaguesi, si dhe për detyrim nga kontributet e sigurimeve shoqërore e shëndetësore, i cili është llogaritur ose mbledhur, ose mbajtur prej tatimpaguesit.

Përjashtimisht, në rastet kur në cilësinë e tatimpaguesit janë institucione apo ente shtetërore apo publike, qendrore apo vendore, apo ente të tjera ku shteti është palë, për raste të një interesi të lartë publik ose të nevojës për moslejimin e cenimit të rendit e të sigurisë kombëtare, mund të lidhet një marrëveshje me këste edhe për detyrimet e kontributeve të sigurimeve shoqërore e shëndetësore.

Marrëveshja me këste nuk lehtëson pozitën ligjore të personit përgjegjës në rastet e prezumimit apo të konsumimit të veprës penale të parashikuar ligjërisht, lidhur me detyrimin tatimor të vetëdeklaruar nga tatimpaguesi, i cili është llogaritur ose mbledhur, ose mbajtur prej tij, përfshirë kontributet e sigurimeve shoqërore e shëndetësore.

8. Në rastin kur për tatimpaguesin ka filluar mbledhja me forcë e detyrimeve tatimore, hiqet urdhërbllokimi i llogarive bankare të tatimpaguesit, i vendosur në përputhje me nenin 90 të këtij ligji.

Në rastin kur për tatimpaguesin ka filluar mbledhja me forcë e detyrimeve tatimore, në përputhje me nenin 91, të këtij ligji, pavarësisht nga lidhja e marrëveshjes së pagesës me këste, administrata tatimore, për të siguruar pagesën e detyrimit tatimor nuk heq dorë nga kjo masë.

Administrata tatimore nuk mund të lidhë një marrëveshje të pagesës me këste nëse ka filluar procedurat e shitjes në ankand të pasurive të konfiskuara për efekt të atij detyrimi tatimor të pashlyer, në përputhje me nenin 96 të këtij ligji.

Neni 78

Zgjidhja e marrëveshjes së pagesës me këste

1. Marrëveshja e pagesës me këste zgjidhet nga administrata tatimore kur:

a) tatimpaguesi nuk i bën pagesat në përputhje me marrëveshjen;

b) tatimpaguesi nuk paguan detyrimet e tjera tatimore, që lindin gjatë periudhës së mbuluar nga marrëveshja.

2. Nëse marrëveshja e pagesës me këste zgjidhet, të gjitha detyrimet tatimore të papaguara, që mbulohen nga kjo marrëveshje, paguhen brenda 30 ditëve kalendarike nga data e marrjes së vendimit të zgjidhjes së marrëveshjes.

Neni 79

Radha e pagesës së kontributeve dhe të detyrimeve tatimore (Ndryshuar me ligjin nr. 84/2014, datë 17.7.2014; shtuar fjalia e parë në pikën 1 me ligjin nr. 97/2018, datë 3.12.2018)

1. Pagesat e kryera për çdo tatim, përveç pagesave për kontributet e sigurimeve shoqërore dhe shëndetësore, fillimisht do të shkojnë për të mbyllur detyrimet më të hershme brenda të njëjtit lloj detyrimi, në qoftë se këto detyrime nuk janë në proces apelimi, gjykimi apo në marrëveshje të pagesës me këste të detyrimeve tatimore të papaguara. Pagesat e kontributeve të sigurimeve dhe të detyrimeve tatimore bëhen sipas kësaj radhe:

a) kontributet e detyrueshme të sigurimeve shëndetësore;

b) kontributet e detyrueshme të sigurimeve shoqërore të punëmarrësit;

c) kontributet e detyrueshme suplementare të sigurimeve shoqërore;

ç) kontributet e detyrueshme të sigurimeve shoqërore të punëdhënësit;

d) tatimet;

dh) kamatëvonesat,

e) gjobat;

ë) kostot administrative.

2. Kostot administrative llogariten në përputhje me rregullat e miratuara në udhëzimin e Ministrit të Financave.

3. Rregullat dhe procedurat për zbatimin e radhës së pagesave, sipas pikës 1, të këtij neni përcaktohen me udhëzim të Ministrit të Financave.

KREU X KONTROLLI TATIMOR

Neni 80

Kontrolli tatimor (Shtuar paragraf në pikën 4 me ligjin nr. 99/2015, datë 23.9.2015; ndryshuar paragrafi i dytë i pikës 4 me ligjin nr. 112/2016, datë 3.11.2016, shtuar pika 1/1 me ligjin 83/2019, datë 18.12.2019; ndryshuar pika 5 me ligjin nr. 83/2022, datë 24.11.2022 )

1. Administrata tatimore kontrollon deklaratat tatimore, llogaritë, librat dhe regjistrimet tatimore të tatimpaguesit, përfshirë të gjithë dokumentacionin, që ka të bëjë me të ardhurat, shpenzimet, aktivet dhe pasivet dhe marrëdhëniet financiare me palë të treta.

1/1. Administrata tatimore kryen mbikëqyrjen e dispozitave të lëshimit të faturave dhe të monitorimit të qarkullimit (në vijim, kontrolli i lëshimit të faturave), në përputhje me legjislacionin në fuqi për faturën e sistemin e monitorimit të qarkullimit dhe tatimin mbi vlerën e shtuar.

2. Kontrolli i tatimpaguesit bazohet në deklaratat e dhëna nga tatimpaguesi, si dhe në librat, regjistrimet e informacionin e dhënë nga palët e treta ose në përputhje me mënyrat alternative të vlerësimit, parashikuar në nenin 72 të këtij ligji.

3. Administrata tatimore kontrollon saktësinë e të gjitha dokumenteve, që kanë të bëjnë me statusin ligjor, rezidencën, veprimtarinë ekonomike, pagesat dhe detyrimet tatimore, si dhe çdo dokument tjetër me rëndësi për përcaktimin e detyrimit tatimor.

4. Zgjedhja e tatimpaguesve, që kontrollohen, bëhet në bazë të analizës së vlerësimit të riskut, të kryer nga administrata tatimore, për të identifikuar tatimpaguesin, і cili ka më shumë rrezik për ta shkelur legjislacionin tatimor.

Në rast se tatimpaguesi ka të certifikuara, nga kompani të njohura audituese, ose kompani të klasifikuara si të tilla me ligj të veçantë dhe deklaratat tatimore ku vërtetohet se janë në përputhje me legjislacionin fiskal, administrata tatimore e përshin këtë element në analizën e riskut të tatimpaguesit.

Procedurat, kriteret dhe lista e kompanive audituese ose kompani të klasifikuara si të tilla me ligj të veçantë përcaktohen me udhëzim të Ministrit të Financave në zbatim këtij neni.

5. Për kontrollet e kryera nga administrata tatimore qendrore, autoritetin për të iniciuar kontrollin tatimor e ka Drejtoria Rajonale Tatimore ose njësitë e tjera në Drejtorinë e Përgjithshme të Tatimeve me funksione të njëjta me të. Për kontrolle që kryhen nga struktura të kontrollit në Drejtorinë e Përgjithshme, kompetencën për të iniciuar kontrollin tatimor e ka titullari i institucionit ose i deleguari i tij. Për kontrollet e kryera nga administrata tatimore vendore, njësia tatimore e qeverisjes vendore ka autoritetin për të iniciuar kontroll tatimor.

6. Procedurat për kryerjen e kontrolleve tatimore dhe llojet e kontrolleve tatimore miratohen nga Ministri i Financave, me propozimin e Drejtorit të Përgjithshëm të Tatimeve.

Neni 81

Njoftimi i kontrollit tatimor (Shtuar pika 1/1, ndryshuar shkronja “f” dhe shtuar një paragraf në pikën 2, e pikat 3, 4, 5, 6 me ligjin nr. 112/2016, datë 3.11.2016; shtuar pikat 7-10 me ligjin 83/2019, datë 18.12.2019)

1. Administrata tatimore i dërgon tatimpaguesit njoftimin, i cili përcakton tatimpaguesin si subjekt të kontrollit tatimor.

1/1. Njoftimi i kontrollit tatimor i dërgohet tatimpaguesit të paktën 30 ditë kalendarike përpara datës së fillimit të kontrollit tatimor të shkruar në njoftim, përveç kur kontrolli kryhet si rezultat i kërkesës së tatimpaguesit për rimbursim tatimor.

Në rastin e kryerjes së vizitave fiskale, të cilat janë kontrolle të shkurtra të kryera gjatë një periudhe të shkurtër kohore për të verifikuar saktësinë e deklaratave e të pagesave, si rregull vetëm për një periudhë të caktuar tatimore dhe vetëm për një lloj tatimi, njoftimi i vizitës fiskale i dërgohet tatimpaguesit të paktën 10 ditë kalendarike përpara datës së fillimit të vizitës fiskale.

2. Njoftimi i kontrollit tatimor përmban:

a) identifikimin e organit, që kryen kontrollin tatimor;

b) emrin dhe mbiemrin e tatimpaguesit, person fizik, ose emrin e personit juridik, subjekt kontrolli;

c) numrin e identifikimit të tatimpaguesit;

ç) datën e lëshimit;

d) bazën ligjore për kontrollin:

dh) llojet e tatimit, objekt të kontrollit;

e) periudhën ose periudhat tatimore, për të cilat kryhet kontrolli tatimor;

ë) një përshkrim të të drejtave dhe të detyrave të tatimpaguesit gjatë kontrollit tatimor, përfshirë të drejtën e ankimit të vlerësimit, që bëhet në bazë të kontrollit tatimor;

f) datën dhe orën kur fillon dhe kur përfundon kontrolli tatimor. Kohëzgjatja e nevojshme e kontrollit përcaktohet nga të dhënat e analizës së riskut.

g) vendin e kontrollit tatimor;

gj) nënshkrimin e titullarit të zyrës;

h) një kërkesë për vënien në dispozicion të administratës tatimore të informacionit specifik për kontrollin tatimor.

Afati për kryerjen e kontrollit, i përcaktuar në përputhje me shkronjën “f”, mund të zgjatet pas miratimit nga Drejtori i Përgjithshëm i Tatimeve, por jo më shumë se 15 ditë pune.

3. Me njoftimin e kontrollit tatimor, tatimpaguesit i jepet mundësia të deklarojë çdo të dhënë për transaksione të padeklaruara, për të cilat nuk është paguar tatim. Ky deklarim kryhet në Drejtorinë Rajonale Tatimore, nëpërmjet një formulari-pyetësor që i vihet në dispozicion së bashku me njoftimin për kontroll, brenda 30 ditëve kalendarike, por përpara fillimit të kontrollit tatimor.

4. Tatimpaguesi deklaron dhe paguan menjëherë tatimin ose kontributin përkatës së bashku me kamatëvonesën, të llogaritur në përputhje me nenin 76 të këtij ligji.

5. Për detyrimin tatimor të deklaruar përpara fillimit të kontrollit tatimor sipas pikës 3, të këtij neni, aplikohet dënim administrativ në masën 50 për qind të tatimit ose kontributit.

Nëse dënimi i aplikuar sipas kësaj dispozite është më i madh se dënimi që aplikohet për shkeljen sipas dispozitës përkatëse të kreut XIV, të ligjit, atëherë aplikohet dënimi më i ulët.

6. Nëse tatimpaguesi nuk deklaron sipas pikës 3, të këtij neni, përpara fillimit të kontrollit prezumohet që nuk ka për të deklaruar dhe për çdo detyrim tatimor apo shkelje të konstatuar gjatë kontrollit aplikohen dënimet administrative sipas këtij ligji.

7. Njoftimi i kontrollit tatimor i lëshimit të faturave i dërgohet tatimpaguesit në të njëjtën ditë kur fillon kontrolli tatimor në vendndodhjen e biznesit të tatimpaguesit.

8. Njoftimi, sipas pikës 7, të këtij neni, përveç të dhënave të përcaktuara në shkronjat “a”, “b”, “c” dhe “ç”, të pikës 2, të këtij neni, përmban edhe të dhënat e mëposhtme:

a) përshkrimin e të drejtave dhe të detyrimeve të tatimpaguesit gjatë dhe pas përfundimit të kontrollit tatimor;

b) nënshkrimin e personit përgjegjës të administratës tatimore.

9. Me përjashtim të pikave 7 e 8, të këtij neni, njoftimi i kontrollit tatimor i lëshimit të faturave nuk është i nevojshëm t’i dërgohet tatimpaguesit përpara fillimit të kontrollit tatimor, nëse kontrolli tatimor ka filluar mbi bazën e informacionit nga strukturat kompetente, sipas këtij ligji dhe legjislacionit në fuqi dhe njoftimi paraprak i tatimpaguesit do të rrezikonte qëllimin e kontrollit tatimor. Në këtë rast kontrolli tatimor fillon menjëherë.

10. Në rastet e përcaktuara në pikën 9, të këtij neni, njoftimi i kontrollit tatimor i dërgohet tatimpaguesit në të njëjtën kohë me raportin e kontrollit tatimor, sipas nenit 83 të këtij ligji.

Neni 81/1 (Shtuar me ligjin 83/2019, datë 18.12.2019)

1. Administrata tatimore kryhen verifikime në terren për zbulimin në kohë të shkeljeve lidhur me regjistrimin e personave të tatueshëm; përdorimin e pajisjeve fiskale; dokumentimin e mallrave në ruajtje, përdorim dhe transport; dokumentimin e çdo transaksioni shitjeje të mallrave apo të shërbimeve dhe lëshimin e faturave tatimore; regjistrimin e punonjësve, si dhe çdo verifikim tjetër për zbatimin e legjislacionit tatimor.

2. Verifikimet, sipas pikës 1, të këtij neni, kryhen pa njoftimin paraprak të personit të tatueshëm. Përpara verifikimit, punonjësi i administratës tatimore tregon dokumentin personal të identifikimit si dhe urdhrin ditor të punës, të lëshuar nga drejtori i drejtorisë përgjegjëse për verifikimin në terren.

Për kundërvajtjet administrative tatimore, të evidentuara gjatë verifikimit në terren, merren masat administrative sipas këtij ligji.

Neni 82

Përjashtimi i inspektorit nga kontrolli tatimor

1. Nëpunësit e administratës tatimore, të lidhur me tatimpaguesin, subjekt kontrolli, nuk mund të marrin pjesë në kontrollin e këtij tatimpaguesi.

2. Me nëpunës të administratës tatimore, të lidhur me tatimpaguesin, subjekt kontrolli, kuptojmë personin:

a) me lidhje gjaku deri në shkallën e tretë;

b) përfaqësues të tatimpaguesit;

c) të lidhur me marrëveshje biznesi me tatimpaguesin.

Neni 83

Raporti i kontrollit tatimor (Ndryshuar pika 4 me ligjin nr. 179, datë 28.12.2013; ndryshuar pika 3 me ligjin nr. 112/2016, datë 3.11.2016, shtuar pikat 7-11 me ligjin 83/2019, datë 18.12.2019; ndryshuar pika 3 me ligjin nr. 83/2022, datë 24.11.2022)

1. Inspektori i grupit të kontrollit tatimor është përgjegjës për përgatitjen e raportit të kontrollit, brenda shtatë ditëve kalendarike pas datës së përfundimit të kontrollit tatimor.

2. Raporti i kontrollit jep rezultatet e kontrollit, shumën e vlerësimit të propozuar dhe referencat ligjore, që justifikojnë propozimin e bërë, dhe nënshkruhet nga inspektori/inspektorët e kontrollit tatimor.

3. Një kopje e raportit të kontrollit i jepet për miratim drejtorit të drejtorisë rajonale tatimore dhe një kopje e raportit i njoftohet tatimpaguesit. Për kontrollet e kryera nga strukturat e Drejtorisë së Përgjithshme, raporti i kontrollit miratohet nga titullari i institucionit ose i deleguari i tij.

4. Tatimpaguesi ka të drejtë t’i kundërshtojë rezultatet e kontrollit tatimor brenda 15 ditëve kalendarike pas datës, kur vlerësohet se raporti është marrë nga tatimpaguesi.

5. Kundërshtimi i tatimpaguesit paraqitet me shkrim, ku jepen arsyet e marrjes së këtij kundërshtimi.

6. Grupi i kontrollit e shqyrton kundërshtimin, brenda 5 ditëve pune nga data e marrjes së kundërshtimit, ose që vlerësohet të jetë marrë dhe arsyetimi i dhënë nga grupi i kontrollit për kundërshtimin përfshihet në raportin përfundimtar të kontrollit.

7. Në rastin e kontrolleve për lëshimin e faturave, raporti i kontrollit tatimor përmban rezultatet e kontrollit tatimor dhe listën e shkeljeve të konstatuara, përfshirë edhe përshkrimin e dispozitave ligjore, të cilat janë shkelur. Raporti i kontrollit tatimor i lëshimit të faturave nënshkruhet nga inspektori/inspektorët, i cili/të cilët kanë marrë pjesë në kontrollin tatimor.

8. Raportin e kontrollit tatimor të lëshimit të faturave, sipas pikës 7, të këtij neni, e miraton struktura përkatëse e ngarkuar me atë detyrë. Një kopje e raportit të kontrollit i dërgohet me postë tatimpaguesit.

9. Tatimpaguesi ka të drejtë t’i kundërshtojë rezultatet e kontrollit tatimor brenda 15 ditëve kalendarike, duke filluar nga e nesërmja e datës së marrjes së aktit.

10. Pas marrjes së kundërshtimit ndaj raportit të kontrollit tatimor, kryhet një raport plotësues, i cili nënshkruhet nga personi që mbikëqyr inspektorët, të cilët kanë kryer kontrollin tatimor, ndërsa miratohet nga personi përgjegjës i drejtorisë rajonale të tatimeve, duke përfshirë përgjegjësin e sektorit, drejtorin e drejtorisë përkatëse dhe drejtorin e drejtorisë rajonale të tatimeve.

11. Nëse në raportin e kontrollit tatimor konstatohen shkelje, zbatohen dënimet administrative të parashikuara në legjislacionin tatimor.

Neni 84

Raporti përfundimtar i kontrollit tatimor (Ndryshuar pika 3 me ligjin nr. 83/2022, datë 24.11.2022)

1. Raporti përfundimtar i kontrollit tatimor plotësohet dhe nënshkruhet nga të gjithë pjesëtarët e grupit të kontrollit dhe miratohet nga urdhëruesi i kontrollit, brenda 14 ditëve kalendarike nga data e marrjes së kundërshtimit të tatimpaguesit, ose që vlerësohet të jetë marrë nga grupi i kontrollit tatimor.

2. Raporti përfundimtar i kontrollit tatimor përshkruan vendin e kontrollit, periudhën, për të cilën është kryer kontrolli, një përshkrim të dokumenteve të shqyrtuara, personat e intervistuar, arsyetimin e tatimpaguesit, të marrë parasysh dhe rezultatin e argumentuar të kontrollit.

3. Një kopje e raportit përfundimtar të kontrollit tatimor dhe shumës së llogaritur, nëse ka, i dërgohet me postë tatimpaguesit dhe një kopje i dorëzohet Drejtorisë së Kontrollit Tatimor që ka kryer kontrollin.

4. Tatimpaguesi ka të drejtë t’i kundërshtojë rezultatet e kontrollit tatimor brenda 15 ditëve kalendarike pas datës kur vlerësohet se raporti është marrë nga tatimpaguesi.

5. Tatimpaguesi, që kundërshton vlerësimin e propozuar, mund ta ankimojë këtë vlerësim, në përputhje me dispozitat e kreut XIII të këtij ligji.

Neni 85

Rikontrolli tatimor (Shtuar pika 3 me ligjin nr. 112/2016, datë 3.11.2016)

1. Rezultatet e kontrollit tatimor janë detyruese për administratën tatimore. Për të njëjtin detyrim tatimor nuk mund të kryhen kontrolle të mëtejshme, me përjashtim të rasteve kur:

a) tatimpaguesi nuk ka bashkëpunuar gjatë kontrollit tatimor ose nuk ka vepruar, në përputhje me kërkesën me shkrim, për t’i dhënë informacion administratës tatimore, gjatë kryerjes së kontrollit tatimor;

b) administrata tatimore ka prova, konkrete dhe të besueshme, që tatimpaguesi është përfshirë në evazion tatimor;

c) inspektori, gjatë kontrollit tatimor, nuk ka vepruar në përputhje me procedurat dhe, për këtë shkak, ndaj tij kanë filluar procedura disiplinore apo janë marrë masa disiplinore. Në përbërjen e grupit të rikontrollit tatimor nuk mund të bëjnë pjesë inspektorë, që kanë marrë pjesë në kontrollin tatimor të mëparshëm.

2. Rikontrolli tatimor miratohet nga Drejtori i Përgjithshëm i Tatimeve, sipas kërkesës me shkrim për fillimin e një rikontrolli tatimor, të bërë nga drejtori i drejtorisë rajonale apo drejtuesi i njësisë së ngjashme me të, si dhe nga drejtori i drejtorisë së kontrollit apo auditit brenda Drejtorisë së Përgjithshme të Tatimeve.

3. Vendimi i miratimit të rikontrollit nga Drejtori i Përgjithshëm i Tatimeve, në të cilin janë shprehur qartë arsyet e rikontrollit, i vihet në dispozicion tatimpaguesit së bashku me njoftimin e kontrollit tatimor.

Neni 86

Bashkëpunimi me specialistë të jashtëm

1. Në rastet kur punonjësve të administratës tatimore u mungon ekspertiza e duhur, për të kontrolluar dhe vlerësuar me korrektësi detyrimin tatimor të një tatimpaguesi, administrata tatimore mund të kërkojë asistencë teknike nga specialistë të jashtëm të fushave të veçanta.

2. Specialistit të jashtëm, të kontraktuar nga administrata tatimore, mund t’i jepet vetëm informacioni teknik përkatës. Specialisti i jashtëm është subjekt i të njëjtave rregulla të ruajtjes së konfidencialitetit si të gjithë nëpunësit e administratës tatimore.

Neni 87

Asistenca e huaj

1. Administrata tatimore mund të kërkojë asistencën e një autoriteti tatimor të huaj, për zgjidhjen e çështjeve të veçanta tatimore.

2. Asistenca e huaj kërkohet në bazë të marrëveshjeve tatimore, dypalëshe ose shumëpalëshe. Në mungesë të marrëveshjeve të tilla, asistenca kërkohet në bazë të parimit të reciprocitetit, me kusht që:

a) informacioni i dhënë të jetë objekt i të njëjtave rregulla të ruajtjes së konfidencialitetit, sipas këtij ligji;

b) informacioni i marrë të përdoret në përputhje me këtë ligj, vetëm në zbatim të legjislacionit tatimor.

KREU XI MBLEDHJA ME FORCË E DETYRIMIT TATIMOR TË PAPAGUAR

Neni 88

Autoriteti dhe kompetencat për mbledhjen e detyrimit tatimor të papaguar (Shtuar pika 4 me ligjin nr. 112/2016, datë 3.11.2016; shtuar pika 5 me ligjin 83/2019, datë 18.12.2019)

1. Administrata tatimore ka autoritetin dhe kompetencat e dhëna sipas këtij kreu për të mbledhur detyrimet tatimore të papaguara, për të cilat nuk është ushtruar e drejta e ankimit apo kanë kaluar të gjitha fazat e shqyrtimit administrativ dhe gjyqësor.

2. Administrata tatimore i ushtron këto kompetenca, duke zbatuar mënyrat e vlerësimit të riskut, për të përcaktuar dhe zbatuar, në çdo rast, masën më të përshtatshme të mbledhjes me forcë, në mënyrë që të maksimalizojë mbledhjen e detyrimeve tatimore të papaguara.

3. Kriteri i vlerësimit të riskut bazohet në dokumentacionin financiar, të dhënë nga tatimpaguesi ose palët e treta, duke marrë parasysh shumën e detyrimit tatimor të papaguar të tatimpaguesit dhe aftësinë e tij për ta paguar tatimin.

4. Administrata tatimore, pasi ka ezauruar procedurat e mbledhjes me forcë të detyrimit tatimor të papaguar, sipas këtij kreu, mund të mbledhë detyrimin tatimor të mbetur të papaguar edhe nëpërmjet një personi juridik publik, i cili përfiton komision mbi shumën e mbledhur, në masën e përcaktuar me vendim të Këshillit të Ministrave.

5. Mbledhja e detyrimeve të papaguara kryhet nga drejtoritë përgjegjëse të mbledhjes me forcë të detyrimeve të papaguara, në varësi të Drejtorisë së Përgjithshme të Tatimeve.

Neni 89

Njoftimi dhe kërkesa për të paguar (Shtuar paragrafë në fund të pikës 2, me ligjin nr. 99/2015, datë 23.9.2015; ndryshuar pika 1 me ligjin nr. 97/2018, datë 3.12.2018, shtuar një paragraf në fund të pikës 2 me ligjin nr. 83/2022, datë 24.11.2022)

1. Kur administrata tatimore konstaton se një tatimpagues nuk ka paguar plotësisht dhe në datën e caktuar detyrimet tatimore, ajo i dërgon atij, me postë rekomande ose në rrugë elektronike, një njoftim me shkrim, ku kërkon pagesën e plotë të detyrimit tatimor. Për njoftimin dhe kërkesën për të paguar detyrimet tatimore zbatohen afatet dhe procedurat e parashikuara në nenin 69 të këtij ligji.

2. Nëse tatimpaguesi nuk përdor të drejtën e ankimit dhe nuk paguan detyrimin tatimor, administrata tatimore duhet ta mbledhë tatimin, duke përdorur njërën ose disa prej mënyrave, të parashikuara në këtë kre.

Gjithashtu, në funksion të mbledhjes së detyrimit tatimor të papaguar të tatimpaguesit, administrata tatimore mund të angazhojë strukturat e saj për të verifikuar dhe monitoruar në vend aktivitetin tregtar të tatimpaguesit, me qëllim konfiskimin në fund të çdo dite të një shume jo më pak se 50 për qind të qarkullimit të realizuar, por jo më shumë se detyrimi tatimor, për të cilin ka filluar procedura e mbledhjes me forcë të detyrimeve tatimore, për llogari të detyrimeve tatimore të pashlyera të tatimpaguesit. Pagesa e shumës së qarkullimit të sekuestruar kalohet në llogarinë bankare të administratës tatimore ditën e nesërme.

Tatimpaguesi, për të cilin administrata tatimore ka filluar mbledhjen me forcë të detyrimeve tatimore të papaguara, nuk mund të kryejë transferim të shumave të parave nga llogaria e tij apo të shesë\të transferojë aktivet ose kapitalet e shoqërisë, me përjashtim të rasteve kur, nëpërmjet shitjes\transferimit të aktiveve, synohet shlyerja në masën 100 për qind e detyrimit tatimor të papaguar. Transferimi i shumave të parave nga llogaria e tatimpaguesit, shitja/transferimi i aktiveve ose kapitaleve të shoqërisë në këtë rast kryhet vetëm në bashkëpunim me administratën tatimore.

3. Detyrimi për dërgimin e njoftimit dhe të kërkesës për të paguar nuk zbatohet, nëse administrata tatimore zotëron prova konkrete dhe të besueshme, se tatimi është në rrezik dhe tatimpaguesi, për të shmangur mbledhjen me forcë të detyrimit tatimor, mund të fshehë ose të transferojë aktivet.

4. Në rastin e parashikuar në pikën 3 të këtij neni, administrata tatimore, në përputhje me dispozitat e Kodit Penal dhe të Kodit të Procedurës Penale, mund të kërkojë pranë organeve kompetente:

a) ndalimin e lëvizjes jashtë territorit të Republikës së Shqipërisë të administratorit, të personit juridik, ortakut dhe aksionarit të personit juridik apo individit tregtar, i cili ka detyrime të papaguara;

b) ndalimin e transferimit jashtë shtetit të shumave të depozituara në llogaritë bankare, në emër të individit tregtar apo të shoqërisë tregtare, që ka detyrime të papaguara.

Neni 90

Urdhri i bllokimit të llogarive bankare të tatimpaguesit (Ndryshuar pika 2 me ligjin nr. 179, datë 28.12.2013; ndryshuar pika 1me ligjin nr. 164, datë 4.12.2014; shtuar fjalë në pikën 1 me ligjin nr. 97/2018, datë 3.12.2018; shtuar fjalë në pikën 1 me ligjin 83/2019, datë 18.12.2019)

1. Nëse tatimpaguesi nuk paguan detyrimin tatimor në datën e caktuar, në përputhje me nenin 89 të këtij ligji, për njoftimin dhe kërkesën për pagesë, administrata tatimore, nëpërmjet një urdhri me shkrim, të lëshuar nga drejtori i drejtorisë përgjegjëse për mbledhjen e detyrimeve të papaguara apo drejtuesi i njësisë së ngjashme me të, apo titullari i zyrës tatimore të qeverisjes vendore, i kërkon çdo banke shqiptare të nivelit të dytë, sipas përcaktimeve në udhëzimin e ministrit përgjegjës për financat me postë rekomande ose në rrugë elektronike, ku tatimpaguesi ka llogari në emër të vet, të bllokojë një shumë, e cila duhet të jetë më e vogla ndërmjet:

a) shumës që kërkohet të mbahet;

b) shumës, që rezulton në atë çast në llogarinë bankare të tatimpaguesit.

Shuma e bllokuar kalon për llogari të administratës tatimore sipas procedurës së përcaktuar me udhëzim të Ministrit të Financave.

2. Me përjashtim të rasteve kur në ligj është parashikuar ndryshe, nëse në bankën, ku tatimpaguesi ka llogarinë bankare, ka edhe urdhra të tjerë pagese, urdhri i lëshuar nga administrata tatimore ekzekutohet sipas radhës së përcaktuar në nenin 605 të ligjit nr. 7850, datë 29.7.1994, “Kodi Civil i Republikës së Shqipërisë”, të ndryshuar.

Neni 91

Masa e sigurimit të detyrimit tatimor (Shtuar fjalë në pikën 1 me ligjin 83/2019, datë 18.12.2019)

1. Nëse tatimpaguesi nuk paguan në datën e caktuar detyrimin tatimor, në përputhje me nenin 89 të këtij ligji, detyrimi tatimor i papaguar sigurohet në favor të administratës tatimore mbi të gjithë pasurinë e tatimpaguesit, në përputhje me rregullat e detajuara me udhëzim të ministrit përgjegjës për financat, në masën e nevojshme, për të përmbushur detyrimin tatimor të tij.

2. Masa e sigurimit të detyrimit tatimor të papaguar mund të jetë, sipas rastit, barrë siguruese dhe/ose barrë hipotekore. Vendimi për të vendosur një barrë siguruese dhe/ose barrë hipotekore mbi pasurinë e tatimpaguesit bëhet me shkrim nga drejtori i drejtorisë përgjegjëse për mbledhjen e detyrimeve të papaguara apo drejtuesi i njësisë së ngjashme me të ose titullari i zyrës tatimore të qeverisjes vendore.

3. Para vendosjes së një barre siguruese dhe/ose barre hipotekore mbi pasurinë e tatimpaguesit, ky i fundit duhet të njoftohet me shkrim. Njoftimi duhet të përmbajë të gjithë informacionin lidhur me to.

4. Njoftimi për barrën siguruese dhe/ose barrën hipotekore duhet të përmbajë të dhënat e nevojshme, për të identifikuar tatimpaguesin, detyrimin tatimor të papaguar, pasurinë, objekt të barrës siguruese dhe/ose barrën hipotekore dhe kompetencën e administratës tatimore për të dorëzuar kërkesë për vendosjen e masës së sigurimit.

5. Formati i njoftimit për barrën siguruese dhe/ose barrën hipotekore dhe regjistrat publikë për regjistrimin e tyre parashikohen në vendimin e Këshillit të Ministrave.

6. Nëse plotësohen të gjitha kërkesat në fuqi për njoftimin dhe dorëzimin e kërkesës për vendosjen e masës së sigurimit të detyrimit tatimor të papaguar, në favor të administratës tatimore, barra siguruese dhe/ose barra hipotekore është e vlefshme kundrejt të gjitha të drejtave të tjera mbi pasurinë, objekt të sigurimit të detyrimit tatimor të papaguar dhe ka përparësi.

Neni 92

Ankimimi i masës së sigurimit të detyrimit tatimor

1. Tatimpaguesi ka të drejtë të ankimojë vendimin për masën e sigurimit të detyrimit tatimor të papaguar te drejtori i drejtorisë përgjegjëse për mbledhjen e detyrimeve të papaguara apo drejtuesi i njësisë të ngjashme me të dhe të kërkojë çlirimin nga sigurimi, vetëm kur është ekzekutuar në mënyrë të parregullt. Ankimi bëhet brenda 30 ditëve kalendarike nga çasti i marrjes dijeni për këtë parregullsi.

2. Kur kërkesa e tatimpaguesit miratohet nga drejtori i drejtorisë përgjegjëse për mbledhjen e detyrimeve të papaguara apo drejtuesi i njësisë së ngjashme me të, në bazë të një vendimi të marrë me shkrim, drejtori i drejtorisë përgjegjëse për mbledhjen e detyrimeve të papaguara ose titullari і njësisë së ngjashme me të ndërmerr menjëherë të gjitha masat e nevojshme, sipas legjislacionit në fuqi, për zhbllokimin e masës së sigurimit mbi pasurinë e tatimpaguesit.

Vendimi futet në dosjen e tatimpaguesit.

Në qoftë se drejtori i drejtorisë përgjegjëse për mbledhjen e detyrimeve të papaguara apo titullari i njësisë së ngjashme me të nuk miraton kërkesën e tatimpaguesit, tatimpaguesi mund ta ankimojë këtë vendim në përputhje me kreun XIII të këtij ligji.

Neni 93

Sekuestrimi dhe konfiskimi i pasurisë (Ndryshuar fjalë në pikat 1 e 2 me ligjin nr. 10 415, datë 7.4.2011)

1. Nëse tatimpaguesi nuk paguan detyrimin tatimor në datën e caktuar, në përputhje me nenin 89 të këtij ligji, për njoftimin dhe kërkesën për pagesë, administrata tatimore mund ta mbledhë detyrimin tatimor të papaguar nëpërmjet sekuestrimit, e më pas konfiskimit, të pasurisë së siguruar në favor të administratës tatimore, në pronësi të tatimpaguesit.

2. Ekzekutimi i masës së sigurimit, nëpërmjet sekuestrimit, konfiskimit dhe shitjes së pasurisë sipas këtij kreu, është objekt i dispozitave të ligjit “Për kundërvajtjet administrative” dhe realizohet nga administrata tatimore.

3. Urdhri për sekuestrimin e pasurisë bëhet me shkrim nga drejtori i drejtorisë përgjegjëse për mbledhjen e detyrimeve të papaguara ose titullari i zyrës tatimore të qeverisjes vendore. Urdhri duhet të identifikojë tatimpaguesin, pasuria e të cilit është objekt i sekuestrimit, vendndodhjen e pasurisë dhe vlerësimin e tatimit, për të cilin vihet sekuestroja. Urdhri i dërgohet tatimpaguesit me postë rekomande.

4. Administrata tatimore mund ta sekuestrojë pasurinë sipas detyrimit vetëm pas vendosjes së masës së sigurisë mbi pasurinë, në përputhje me nenin 91 të këtij ligji dhe vetëm 30 ditë kalendarike pas datës, kur urdhri i sekuestrimit është marrë ose vlerësohet të jetë marrë nga tatimpaguesi, në formën e parashikuar në nenin 94 të këtij ligji.

5. Nëse administrata tatimore vëren se mbledhja e tatimit është në rrezik, mund të dërgojë njoftim dhe kërkesë për pagesën e menjëhershme të këtij tatimi dhe nëse detyrimi tatimor nuk paguhet plotësisht, administrata tatimore ka kompetencë të bëjë sekuestrimin, pavarësisht nga afatet e parashikuara në këtë nen.

Neni 94

Urdhri i sekuestrimit

1. Urdhri i sekuestrimit përmban:

a) shumën e detyrimeve tatimore të papaguara;

b) afatin për pagesën e detyrimeve tatimore;

c) pasurinë që sekuestrohet;

ç) mënyrën e ekzekutimit të sekuestrimit;

d) informacionin rreth së drejtës së tatimpaguesit për ankim administrativ.

2. Nëse objekt i sekuestrimit është paga e tatimpaguesit, urdhri përfshin edhe emrin dhe adresën e punëdhënësit të tatimpaguesit.

Neni 95

Pasuria, objekt i sekuestrimit E gjithë pasuria e tatimpaguesit është objekt i sekuestrimit në masën e detyrimit tatimor të papaguar, përveç sendeve të përcaktuara në nenin 529 të Kodit të Procedurave Civile.

Neni 96

Shitja e pasurisë së konfiskuar (Ndryshuar pika 1 me ligjin nr. 10 415, datë 7.4.2011; ndryshuar pika 2 me ligjin nr. 164, datë 4.12.2014; ndryshuar titulli, shtuar pika 4 me ligjin 83/2019, datë 18.12.2019; ndryshuar pika 4 me ligjin nr. 79/2025, datë 11.12.2025)

1. Nëse edhe me kalimin e 15 ditëve kalendarike nga sekuestrimi i pasurisë, bërë në përputhje me nenin 93 të këtij ligji, tatimpaguesi nuk shlyen të plotë detyrimin tatimor të prapambetur, pasuria e sekuestruar konfiskohet nga administrata tatimore dhe shitet në ankand publik, në përputhje me dispozitat procedurale të ligjit për ankandin publik.

2.Të ardhurat nga shitjet përdoren fillimisht për të paguar shpenzimet e shitjes dhe më pas zbatohet radha e pagesës, në përputhje me nenin 79 të këtij ligji.

3. Shuma e mbetur i kthehet tatimpaguesit brenda pesë ditëve pune nga data e përfundimit të ankandit.

4. Procedurat që do të zbatohen për shitjen e pasurisë së konfiskuar, në zbatim të aktit administrativ të konfiskimit, përcaktohen me vendim të Këshillit të Ministrave, me propozim të ministrit përgjegjës për financat.

Neni 97

Transferimi i detyrimit tatimor palës së tretë

1. Në rastet kur shuma e të ardhurave nga shitja e pasurisë së sekuestruar nuk mbulon të gjithë shumën e detyrimit tatimor të papaguar të tatimpaguesit, administrata tatimore mund të nxjerrë një njoftim për palët e treta, me të cilin urdhëron shlyerjen e drejtpërdrejtë të pagesës, brenda 14 ditëve kalendarike, nga data e marrjes së njoftimit ose që vlerësohet të jetë marrë, në një shumë të barabartë me vlerën e pasurisë së transferuar nga tatimpaguesi te pala e tretë, kur ky transferim është kryer pas nxjerrjes së njoftimit të administratës tatimore për sekuestrimin e pasurisë.

2. Përgjegjësia e palës së tretë kufizohet në vlerën e tregut të pasurisë së transferuar nga tatimpaguesi.

3. Në rastet kur detyrimi tatimor i tatimpaguesit, person juridik, mbetet i pashlyer edhe pas shitjes së pasurisë së sekuestruar, personi që, gjatë tre vjetëve përpara nxjerrjes së njoftimit të sekuestrimit, ka marrë nga ky tatimpagues të drejtat mbi pasurinë, nëpërmjet një transaksioni të kryer me vlerë dukshëm më të vogël se vlera e tregut, është në radhë të dytë përgjegjës për detyrimin e pashlyer. Kjo përgjegjësi shkon deri në vlerën e të drejtave të transferuara, duke zbritur shumën e paguar nga personi për këtë pasuri.

Neni 98

E drejta për të kërkuar detyrimet nga pala e treta (Ndryshuar pika 1 me ligjin nr. 99/2015, datë 23.9.2015)

1. Administrata tatimore njëkohësisht me procedurat e tjera të përcaktuara në këtë kre mund t’i kërkojë palës së tretë të kryejë pagesën e drejtpërdrejtë të çdo shume, që kjo palë i detyrohet tatimpaguesit, brenda 30 ditëve kalendarike nga data e dërgimit të njoftimit palës së tretë.

2. Njoftimi dhe kërkesa për të paguar bëhen në përputhje me procedurat dhe afatet e përcaktuara në nenin 69 të këtij ligji.

3. Në qoftë se pala e tretë nuk paguan shumën brenda afatit të caktuar, ndaj saj administrata tatimore mund të fillojë procedurat e mbledhjes me forcë, të parashikuara në këtë kre.

Neni 99

Përgjegjësia e ortakut, aksionarit dhe administratorit (Ndryshuar fjalë në pikën 1 me ligjin nr. 164, datë 4.12.2014)

1. Nëse edhe pas shitjes së pasurisë së sekuestruar detyrimet tatimore të personit juridik nuk shlyhen plotësisht, atëherë detyrimi tatimor i mbetur transferohet për llogari të ortakut, aksionarit dhe administratorit përgjegjës për shlyerjen e detyrimit tatimor, në përputhje me nenin 16 të ligjit “Për tregtarët dhe shoqëritë tregtare”.

2. Administratori, ortakët apo aksionarët janë solidarisht përgjegjës për detyrimin tatimor të papaguar të personit juridik.

3. Rregullat e parashikuara në pikat 1 e 2 të këtij neni vlejnë edhe për rastet kur në përfundim të procesit të likuidimit apo falimentimit të tatimpaguesit, shoqëri tregtare, ka mbetur ende i pashlyer detyrimi tatimor.

4. Ministri i Financave miraton rregullat dhe procedurat për zbatimin e këtij neni.

Neni 100

Parashkrimi i së drejtës për fillimin e procedurave për zbatimin e masave shtrënguese

1. E drejta për fillimin e procedurave për zbatimin e masave shtrënguese, sipas këtij kreu, parashkruhet brenda 5 viteve nga data kur detyrimi tatimor i papaguar duhej të kryhej.

2. Afati i parashkrimit, і parashikuar në pikën 1 të këtij neni, ndërpritet gjatë periudhës:

a) së ankimimit të detyrimit tatimor;

b) kur detyrimi tatimor është objekt i një kontrolli ose hetimi zyrtar nga administrata tatimore;

c) kur detyrimi tatimor është objekt i një çështjeje penale.

Neni 101

Detyrimi për t’u paraqitur (Ndryshuar pika 3 me ligjin nr. 83/2022, datë 24.11.2022)

1. Administrata tatimore ka të drejtë të thërrasë çdo person që ka dijeni për dokumentacionin apo procedurat tatimore, kur ajo e gjykon se prania e tij është e nevojshme për zbatimin e duhur të legjislacionit tatimor.

2. Administrata tatimore ka të drejtë të thërrasë çdo person për të dëshmuar, për të dhënë ekspertizë ose për të paraqitur librat e regjistrimet, në rastet kur informacioni i kërkuar nuk mund të dërgohet lehtësisht dhe pa shpenzime të mëdha me postë ose në mënyrë elektronike.

3. Administrata tatimore duhet të lëshojë një kërkesë thirrjeje me shkrim të autorizuar nga titullari i strukturës përgjegjëse të administratës tatimore, për kontrollet e kryera nga strukturat e kontrollit tatimor në administratën tatimore qendrore, ose nga titullari i njësisë tatimore të qeverisjes vendore, kërkesë që përfshin informacionin e mëposhtëm:

a) identifikimin e strukturës tatimore qendrore ose vendore që nxjerr kërkesën për thirrje;

b) emrin dhe identifikimin tatimor të personit të thirrur;

c) vendin, datën dhe orën e procedurës së thirrjes;

ç) lëndën e thirrjes dhe pozicionin e personit të thirrur (tatimpagues, personi i tretë ose ekspert); dhe

d) një listë të librave dhe të dhënave specifike, si dhe dokumentacion tjetër që personi duhet të dorëzojë.

4. Kërkesa për paraqitje dërgohet me postë rekomande, të paktën 15 ditë kalendarike para datës së caktuar për paraqitje.

5. Personi thirret gjatë orarit të zyrtar të punës, përveç rasteve kur masa të jashtëzakonshme dhe urgjente kërkojnë që procedura të kryhet jashtë orarit zyrtar të punës.

6. Për mosparaqitje, në përputhje me kërkesën e administratës tatimore, personi i thirrur ndëshkohet me gjobë.

7. Procedura e thirrjes shtyhet vetëm për shkaqe të arsyeshme, që paraqiten në një kërkesë me shkrim të tatimpaguesit.

Neni 102

Ndërprerja e procedurave të mbledhjes me forcë të detyrimit tatimor Administrata tatimore ndërpret menjëherë zbatimin e masave shtrënguese të sigurimit të detyrimit tatimor, të parashikuar në këtë ligj:

a) kur tatimpaguesi shlyen plotësisht të gjitha detyrimet tatimore;

b) pas mbarimit të afatit të parashkrimit, sipas nenit 100 të këtij ligji;

c) pas deklarimit si të pambledhshëm të detyrimit tatimor;

ç) kur detyrimi tatimor falet me ligj të veçantë.

Neni 103

Procedurat për deklarimin e detyrimit tatimor si të pambledhshëm (Ndryshuar pika 3 me ligjin nr. 164, datë 4.12.2014; ndryshuar pika 7 dhe shtuar pikat 8 dhe 9 me ligjin nr. 97/2018, datë 3.12.2018; ndryshuar pika 6 me ligjin 83/2019, datë 18.12.2019; shfuqizuar pika 5 me ligjin nr. 83/2022, datë 24.11.2022)

1. Deklarimi i një pjese apo i të gjithë detyrimit tatimor të interesit dhe gjobës, si të pambledhshëm, bëhet pasi të jenë zbatuar dhe evidentuar të gjitha procedurat e mbledhjes, sipas këtij ligji, përfshirë:

a) shitjen e investimeve likuide dhe të aktiveve të tjera jothelbësore për vazhdimin e veprimtarisë ekonomike;

b) negocimin e një plani të pagesës me këste;

c) kryerjen e vlerësimit se falimentimi ose likuidimi nuk do të çonin në një rezultat më të mirë.

2. Vendimi për deklarimin të pambledhshëm të të gjithë ose të një pjese të detyrimit tatimor ka parasysh edhe mundësitë reale të mbledhjes dhe se ndërmarrja e veprimeve të mëtejshme për mbledhjen e plotë të detyrimit tatimor përbën mënyrën më efiçente për maksimalizimin e mbledhjes totale të tatimeve, sipas ligjit.

3.Për klasifikimin si të pambledhshëm të një pjese ose të të gjithë detyrimit tatimor, njësia përkatëse e borxhit i paraqet një relacion me shkrim Drejtorit të Përgjithshëm të Tatimeve, sipas të cilit evidenton, në përputhje me këtë nen, çdo dokumentacion dhe veprim të kryer për mbledhjen e detyrimit tatimor sipas këtij ligji dhe çdo dokumentacion tjetër për të gjitha aktivet dhe pasivet e tij, përfshirë edhe:

a) të dhëna të hollësishme për të ardhurat dhe shpenzimet;

b) të dhëna për fluksin e parasë dhe parashikimet për fluksin;

c) vlerësimet e aktiveve;

ç) deklaratat (pasqyrat) e fitimeve e të humbjeve dhe bilancet;

d) listat e debitorëve e të kreditorëve;

dh) një vlerësim të mundësisë për mbledhjen e borxheve.

4. Deklarimi і detyrimit tatimor si i pambledhshëm i të gjithë ose i një pjese të tij nuk mund të bëhet kur ka prova të evazionit tatimor ose të mashtrimit.

5. Shfuqizuar.

6. Deklarimi i pambledhshëm i detyrimit tatimor apo i një pjese të tij bëhet si më poshtë:

a) për shuma deri në 1 000 000 (një milion) lekë bëhet me urdhër të drejtorit rajonal të tatimeve, bazuar në vendimin e marrë nga komisioni i ngritur për këtë qëllim në DRT, i cili funksionon sipas përcaktimeve të bëra në udhëzimin e ministrit përgjegjës për financat, në zbatim të këtij ligji.

b) për shuma mbi 1 000 000 (një milion) lekë deri në 5 000 000 (pesë milionë) lekë, sipas propozimit të DRT-së, bëhet me urdhër të Drejtorit të Përgjithshëm të Tatimeve, bazuar në vendimin e marrë nga komisioni i ngritur për këtë qëllim në DPT. Komisioni funksionon sipas përcaktimeve të bëra në udhëzimin e ministrit përgjegjës për financat, në zbatim të këtij ligji.

c) për shuma mbi 5 000 000 (pesë milionë) lekë, sipas propozimit të DPT-së, bazuar në vendimin e marrë nga komisioni i ngritur për këtë qëllim në DPT, bëhet me urdhër të ministrit përgjegjës për financat. Komisioni funksionon sipas përcaktimeve të bëra në udhëzimin e ministrit përgjegjës për financat, në zbatim të këtij ligji.

7. Pas deklarimit të pambledhshëm të detyrimit tatimor ose të një pjese të tij, organi tatimor evidenton në regjistrin kontabël detyrimet që janë deklaruar të pambledhshme në zbatim të ligjit.

8. Fillimi i procedurës për deklarimin e detyrimit tatimor si të pambledhshëm mund të bëhet me kërkesë nga ana e tatimpaguesit ose kryesisht nga ana e organit tatimor.

9. Administrata tatimore publikon çdo vit vlerën totale të detyrimeve tatimore të deklaruara si të pambledhshme, numrin e kërkesave në total dhe numrin e kërkesave të pranuara.

Neni 104

Fillimi i procedurës së falimentimit (Ndryshuar pika 1 me ligjin nr. 164, datë 4.12.2014; shfuqizuar me ligjin nr. 110/2016, datë 27.10.2016; ndryshuar me ligjin nr. 112/2016 datë 3.11.2016) Fillimi i procedurës së falimentimit në gjykatë nga administrata tatimore bëhet në përputhje me ligjin për falimentimin.

KREU XII HETIMI TATIMOR

Neni 105

Struktura dhe funksionet e njësive të hetimit tatimor (Ndryshuar shkronja “c”, shtuar shkronja “ç” të pikës 2, ndryshuar pika 4 me ligjin nr. 164/2014, datë 4.12.2014; shtuar pika 6 me ligjin nr. 112/2016 datë 3.11.2016, hequr fjalë në pikën 1 dhe 6, ndryshuar pika 2 me ligjin nr. 83/2022, datë 24.11.2022; shtuar shkronja “c” e pikës 2 me ligjin nr. 79/2025, datë 11.12.2025)

1. Strukturat e hetimit tatimor janë njësi të specializuara hetimi në administratën tatimore qendrore.

2. Strukturat e hetimit tatimor kanë si funksion:

a) mbledhjen dhe analizën e informacionit tatimor;

b) hetimin tatimor;

c) kryerjen e verifikimit dhe vlerësimit tatimor në përputhje me përcaktimet e kreut VIII të këtij ligji, në të gjitha rastet e konstatuara të konsumimit të veprës penale të fshehjes së të ardhurave kur vlera e tatimit, taksës apo kontributit të fshehur nuk është llogaritur paraprakisht, sipas kreut X të këtij ligji. Vlerësimi tatimor dhe nxjerrja e njoftimit të vlerësimit në këto raste bëhet vetëm pas autorizimit nga drejtori i përgjithshëm i Tatimeve.

3. Punonjësit e njësive të hetimit tatimor gëzojnë atributet e Policisë Gjyqësore, në përputhje me Kodin e Procedurës Penale dhe ligjin për organizimin dhe funksionimin e Policisë Gjyqësore.

4. Punonjësit e strukturave të hetimit tatimor pajisen me armë, në përputhje me legjislacionin e fushës në fuqi.

5. Detyrat dhe funksionet e drejtorisë së hetimit tatimor, në zbatim të këtij neni, përcaktohen me vendim të Këshillit të Ministrave.

6. Drejtori i Drejtorisë së Hetimit Tatimor, në Drejtorinë e Përgjithshme të Tatimeve, emërohen nga Ministri i Financave.

Neni 105/1 Struktura dhe funksionet e Drejtorisë së Investigimit të Brendshëm (Antikorrupsion) (Shtuar me ligjin nr. 10209, datë 23.12.2009; hequr fjalë me ligjin nr. 10415, datë 7.4.2011)

1. Drejtoria e Investigimit te Brendshëm (Antikorrupsion) janë struktura të specializuara zbulimi, hetimi dhe zbatimi në administratën tatimore qendrore.

2. Drejtoria e Investigimit të Brendshëm (Antikorrupsion) ka si mision parësor:

a) parandalimin, zbulimin dhe hetimin e veprimeve të administratës tatimore, të cilat mund të përbëjnë vepra penale;

b) mbledhjen e informacionit nga burime të ndryshme për veprimtaritë e punonjësve të administratës tatimore qendrore, të cilat mund të përbëjnë vepër penale;

c) bashkërendimin e punës me prokurorinë, si hallkë ndërmjetëse, për vazhdimin e plotë të hetimit;

ç) shërbimin, si pikë kontakti, ndërmjet administratës tatimore dhe institucioneve të tjera, që kanë si funksion luftën ndaj korrupsionit.

3. Punonjësit e Drejtorisë së Investigimit të Brendshëm (Antikorrupsion) gëzojnë atributet e Policisë Gjyqësore, në përputhje me Kodin e Procedurës Penale dhe ligjin për organizimin dhe funksionimin e Policisë Gjyqësore.

4. Punonjësit e Drejtorisë së Investigimit të Brendshëm (Antikorrupsion) dhe ata, që ushtrojnë funksionet e parandalimit, të zbulimit, ndjekjes dhe hetimit të plotë të veprave korruptive pajisen me armë, në përputhje me legjislacionin e fushës. Miratimi i lejes jepet nga Ministria e Brendshme, vetëm pas autorizimit të lëshuar nga Ministri i Financave.

5. Detyrat dhe funksionet e Drejtorisë së Investigimit të Brendshëm (Antikorrupsion) miratohen me vendim të Këshillit të Ministrave.

Neni 105/2 Struktura, kompetencat dhe funksionet e Avokatit të Tatimpaguesve (Shtuar me ligjin nr. 10261, datë 1.4.2010; ndryshuar me ligjin nr. 112/2016 datë 3.11.2016; zëvendësuar fjale ne shkronjën “dh” të pikes 2 me ligjin nr. 95, date 7.12.2023)

1. Avokati i Tatimpaguesve mbron interesat e tatimpaguesve në marrëdhëniet me organet tatimore. Ai autorizohet të investigojë të gjitha kërkesat e tatimpaguesve, që përmbajnë probleme të administrimit të tatimeve, si vonesa administrative të paarsyeshme, gabime të zyrtarëve tatimorë, që nuk janë zgjidhur në mënyrën e duhur pas paraqitjes nga tatimpaguesi, mosrespektimi i procedurave tatimore apo shkelje të procedurave tatimore nga zyrtarët tatimorë.

2. Avokati i Tatimpaguesve ka këto funksione:

a) evidentimin, klasifikimin dhe trajtimin e drejtë të çdo ankese të marrë nga tatimpaguesit;

b) bashkëpunimin me drejtorinë e shërbimit të tatimpaguesve, për të promovuar rolin e Avokatit të Tatimpaguesit në mbrojtjen e të drejtave të tatimpaguesit;

c) bashkëpunimin me drejtorinë e kontrollit të brendshëm, me drejtorinë e personelit dhe me drejtoritë e tjera të Drejtorisë së Përgjithshme të Tatimeve, për të garantuar që tatimpaguesit të trajtohen apo do të trajtohen në përputhje me dispozitat ligjore dhe se të drejtat e tyre mbrohen dhe respektohen në mënyrën e duhur nga punonjësit e administratës tatimore, në përputhje me Kodin e Etikës;

ç) ndjekjen dhe trajtimin me korrektësi të çdo rasti individual dhe mbylljen e arkivimin e tyre vetëm pasi ankesat të jenë trajtuar e zgjidhur në përputhje me legjislacionin tatimor, dispozitat e Kodit të Etikës dhe udhëzimet e nxjerra në zbatim të dispozitave të këtij kreu;

d) bashkëpunimin me drejtorinë e shërbimit të tatimpaguesve, drejtorinë e trajnimit dhe drejtorinë e personelit, me qëllim që nga përfundimet e nxjerra nga rastet e veçanta në të gjitha drejtoritë rajonale tatimore, të garantohet mospërsëritja e gabimeve;

dh) bërjen e propozimeve drejtorit të Përgjithshëm të Tatimeve dhe drejtorëve rajonalë tatimorë për masa administrative ndaj punonjësve të administratës tatimore, të cilët kanë shkelur dispozitat e Kodit të Etikës;

e) referimin e rasteve të veçanta drejtorisë së investigimit të brendshëm ose drejtorisë së investigimit kriminal, nëse informacioni apo dokumentacioni i nxjerrë tregojnë se rasti në fjalë kërkon nisjen e procesit të investigimit administrativ ose kriminal;

ë) bërjen e propozimeve Drejtorit të Përgjithshëm të Tatimeve për përmirësime në proceset e punës dhe në procedurat tatimore, si dhe lidhur me dispozitat e Kodit të Etikës, me synim përmirësimin e shërbimeve ndaj tatimpaguesve, reduktimin e barrës administrative dhe lehtësimin e procedurave për tatimpaguesit në përmbushjen e detyrimeve tatimore.

f) nxjerr rekomandime me karakter të përgjithshëm në lidhje me çështjet e identifikuara gjatë ushtrimit të funksioneve të tij dhe i përdor ato si bazë për të bërë propozime për ndryshimin e legjislacionit përkatës;

g) nxjerr rekomandime me shkrim drejtuar Drejtorisë së Apelimit Tatimor ose Komisionit për Shqyrtimin e Apelimeve Tatimore dhe/ose i paraqet këto rekomandime në seancat dëgjimore administrative të mbajtura nga Drejtoria e Apelimit Tatimor ose Komisioni për Shqyrtimin e Apelimeve Tatimore.

3. Drejtoria e Avokatit të Tatimpaguesve ka si funksion parësor sigurimin e një informacioni efiçent dhe prezantimin në hallkat administrative përkatëse të problemeve e të shqetësimeve të tatimpaguesve, në përmbushjen e detyrimeve tatimore dhe të procedurave përkatëse administrative, si dhe garantimin e plotësimit të të drejtave të tatimpaguesve nga administrata tatimore.

3/1. Avokati i Tatimpaguesve gëzon të drejtën e njohjes dhe marrjes me shkrim nga strukturat e administratës tatimore të çdo informacioni të përgjithshëm apo të veçantë për një tatimpagues apo një grup tatimpaguesish, në çdo fazë të procesit administrativ. Ai mund të kërkojë informacion pranë çdo strukture të administratës tatimore, përfshirë Drejtorinë e Hetimit Tatimor, për aq sa nuk cenohen interesat e hetimit tatimor, siç përcaktohet në dispozitat ligjore në fuqi për këtë qëllim. Avokati i Tatimpaguesve gëzon të drejtën e njohjes dhe marrjes se informacionit edhe nga strukturat përkatëse të shqyrtimit administrativ tatimor në Ministrinë e Financave.

3/2. Avokati i Tatimpaguesve, në bazë të kërkesës se tatimpaguesit, ka të drejtë t’i rekomandojë Drejtorit të Përgjithshëm të Tatimeve nxjerrjen e vendimeve teknike, në përputhje me përcaktimet e nenit 10 të këtij ligji. Drejtori i Përgjithshëm i Tatimeve në çdo rast i kthen përgjigje të arsyetuar Avokatit të Tatimpaguesve, për marrjen parasysh ose jo të rekomandimit brenda një afati 30-ditor.

4. Avokati i Tatimpaguesve nuk është i autorizuar të investigojë apo të ndërhyjë në rastet, për të cilat tatimpaguesi është investiguar nga drejtoria e investigimit tatimor apo nga drejtoria e investigimit të brendshëm. Avokati i Tatimpaguesve nuk autorizohet të investigojë apo të ndërhyjë në procesin e përcaktimit të detyrimit tatimor apo për raste, të cilat janë në proces apelimi. Megjithatë, Avokati i Tatimpaguesve është i autorizuar të investigojë dhe të ndërhyjë, nëse procesi i vlerësimit të detyrimeve tatimore apo procesi i apelimit nuk kryhet në përputhje me procedurat e vendosura në ligj apo në dispozitat përkatëse nënligjore. Ky autorizim kufizohet me të drejtën e sigurimit të respektimit të procedurave dhe jo në vendimet lidhur me shumat e vlerësuara të detyrimeve tatimore apo në vendimin e marrë për apelimin.

5. Avokati i Tatimpaguesit emërohet sipas dispozitave të legjislacionit për nëpunësin civil dhe është strukturë e pavarur në vendimmarrje, në përbërje të Ministrisë së Financave.

6. Kompetencat, detyrat funksionale dhe mënyra e bashkëpunimit të Avokatit të Tatimpaguesve me Drejtorinë e Përgjithshme të Tatimeve dhe me palët e treta përcaktohen me vendim të Këshillit të Ministrave.

7. Procedurat e hollësishme për funksionet, përgjegjësitë dhe procedurat që do të zbatohen nga Avokati i Tatimpaguesve, si dhe procedurat që do të ndiqen nga tatimpaguesit, për të përfituar nga shërbimet e ofruara nga Drejtoria e Avokatit të Tatimpaguesve, përcaktohen me udhëzim të Ministrit të Financave.

8. Manuali i Avokatit të Tatimpaguesve, i cili përmban procedura të hollësishme për mbledhjen e informacionit, evidentimin dhe shqyrtimin e ankesave të tatimpaguesve, zgjedhjen dhe trajtimin e ankesave e të shqetësimeve të tatimpaguesve dhe procedurat e raportimit, si dhe rregullat për përgjithësimin e gjetjeve individuale, mbylljen e shqyrtimeve, kohën brenda të cilës do të shqyrtohen ankesat, si dhe treguesit e matjes së performancës miratohet nëpërmjet një udhëzimi të Ministrit të Financave.

Neni 105/3 Struktura dhe funksionet e Drejtorisë së Verifikimit dhe Koordinimit në Terren (Shtuar me ligjin nr. 83/2022, datë 24.11.2022)

1. Strukturat e verifikimit dhe koordinimit në terren janë njësi të specializuara zbatimi në administratën tatimore qendrore.

2. Strukturat e verifikimit dhe koordinimit në terren kanë si funksion parësor:

a) marrjen e masave administrative për kundërvajtjet administrative tatimore;

b) zbatimin e masave shtrënguese.

3. Drejtoria e Verifikimit dhe Koordinimit në Terren është e organizuar në nivel qendror dhe rajonal.

KREU XIII ANKIMIMI ADMINISTRATIV TATIMOR

Neni 106

Objekti i ankimit administrativ tatimor (Shtuar fjalë në fund të pikës 1, me ligjin nr. 112/2016 datë 3.11.2016)

1. Tatimpaguesi mund të ankimojë kundër çdo njoftim vlerësimi, çdo vendimi që ndikon në detyrimin e tij tatimor, çdo kërkese për rimbursim ose lehtësim tatimor, ose çdo akti ekzekutiv të posaçëm tatimor, në lidhje me tatimpaguesin. në përputhje me Kodin e Procedurave Administrative, përveçse kur në këtë ligj përcaktohet ndryshe.

2. Ankimi bëhet me shkrim dhe në formën e parashikuar në zbatim të këtij ligji, me udhëzim të Ministrit të Financave.

3. Tatimpaguesi e dorëzon ankimin në drejtorinë e apelimit tatimor brenda 30 ditëve kalendarike nga data kur vlerësimi ose vendimi i administratës tatimore është marrë ose vlerësohet të jetë marrë nga tatimpaguesi.

4. Drejtoria e apelimit i dërgon një kopje të ankimit administratës tatimore, që ka nxjerrë vlerësimin tatimor ose vendimin, objekt të ankimit tatimor.

Neni 107

Pagesa e detyrimit tatimor, objekt ankimi (Ndryshuar pikat 1, 2,3 me ligjin nr. 179/2013, datë 28.12.2013; shtuar fjalë në pikën 1 me ligjin nr. 164/2014, datë 4.12.2014; shtuar fjalë në pund të pikës 2 me ligjin nr. 97/2018, datë 3.12.2018)

1. Tatimpaguesi, i cili kërkon të ankimojë, sipas pikës 1 të nenit 106 të këtij ligji, duhet që bashkë me ankesën të paguajë shumën e plotë të detyrimit tatimor ose të vendosë garanci bankare minimalisht 6 muaj, por jo më pak se afati, sipas të cilit vendimi ka marrë formë të prerë për shumën e plotë të detyrimit tatimor, të përcaktuar në njoftimin e vlerësimit të administratës tatimore.

2. Shuma e pagueshme ose shuma e vënë si garanci bankare, sipas pikës 1 të këtij neni, përjashton gjobat e përfshira në vlerësimin tatimor të ankimuar, si dhe kamatëvonesat e llogaritura.

3. Ankimi merret në shqyrtim vetëm kur tatimpaguesi ka paguar detyrimin tatimor, që është objekt i ankimit, ose ka paraqitur dokumentin bankar që vërteton vendosjen e garancisë, sipas përcaktimit të pikave 1 dhe 2 të këtij neni.

4. Akti administrativ, i lëshuar nga administrata tatimore dhe për të cilin nuk është ankimuar në rrugë administrative, nuk mund të ankimohet në rrugë gjyqësore.

Neni 108

Kompetenca për shqyrtimin e ankimit tatimor (Ndryshuar pika 5, 6, shtuar pika 7 e fjalë në të gjithë nenin me ligjin nr. 112/2016 datë 3.11.2016)

1. Drejtoria e apelimit tatimor ose Komisioni për Shqyrtimin e Apelimeve Tatimore shqyrton ankimin tatimor dhe merr vendim në bazë të provave dhe të argumenteve të paraqitura nga tatimpaguesi dhe administrata tatimore.

2. Drejtoria e apelimit tatimor ose Komisioni për Shqyrtimin e Apelimeve Tatimore ka të drejtë të kërkojë dokumentacion shtesë nga tatimpaguesi ose administrata tatimore.

3. Drejtoria e apelimit, ose Komisioni për Shqyrtimin e Apelimeve Tatimore pas shqyrtimit të ankimit, vendos:

a) lënien në fuqi të aktit, objekt ankimi dhe rrëzimin e ankimit;

b) shfuqizimin/revokimin e aktit, objekt ankimi;

c) ndryshimin e aktit, objekt ankimi, duke e pranuar pjesërisht ankimin.

4. Tatimpaguesi ka të drejtë ta paraqesë personalisht çështjen para drejtorisë së apelimit tatimor ose Komisionit për Shqyrtimin e Apelimeve Tatimore ose të caktojë një person për ta përfaqësuar para kësaj drejtorie.

5. Barra e provës për të vërtetuar se një vlerësim tatimor ose vendim është i pasaktë ushtrohet në përputhje me Kodin e Procedurave Administrative.

6. Vendimi i drejtorisë së apelimit tatimor ose Komisioni për Shqyrtimin e Apelimeve Tatimore duhet të përfshijë një shpjegim, me shkrim, për mbështetjen ligjore të vendimit të marrë prej saj, duke përfshirë arsyetimin, në përputhje me nenin 100 të Kodit të Procedurave Administrative.

7. Komisioni për Shqyrtimin e Apelimeve Tatimore ka për kompetencë të shqyrtojë dhe të marrë vendim për ankimin tatimor që ka për objekt detyrimin tatimor, sipas vlerës së përcaktuar me vendim të Këshillit të Ministrave.

Neni 109

Vendimi për ankimin administrativ tatimor dhe e drejta e ankimit (Shtuar fjali në pikën 4 me ligjin nr. 179, datë 28.12.2013; ndryshuar fjalë në pikën 2 me ligjin nr. 164, datë 4.12.2014; ndryshuar me ligjin nr. 112/2016 datë 3.11.2016; zëvendësuar fjalë në pikën 3 me ligjin nr. 95, date 7.12.2023)

1. Vendimi i drejtorisë së apelimit tatimor ose Komisioni për Shqyrtimin e Apelimeve Tatimore futet në dosjen e tatimpaguesit dhe nga një kopje i dërgohet, me postë rekomande, tatimpaguesit dhe organit të administratës tatimore, që ka bërë vlerësimin tatimor ose ka marrë vendimin, që është objekt i ankimit.

2. Tatimpaguesi mund ta kundërshtojë vendimin e drejtorisë së apelimit tatimor ose Komisioni për Shqyrtimin e Apelimeve Tatimore në gjykatë, brenda 30 ditëve kalendarike nga data e marrjes dijeni për këtë vendim. Nëse drejtoria e apelimit tatimor ose Komisioni për Shqyrtimin e Apelimeve Tatimore nuk shprehet brenda 60 ditëve nga data e marrjes së ankimit, tatimpaguesi mund të ankohet drejtpërdrejt në gjykatë.

3. Vendimi i Drejtorisë së Apelimit Tatimor ose i Komisionit për Shqyrtimin e Apelimeve Tatimore është i detyrueshëm për zbatim nga organi i administratës tatimore që ka bërë vlerësimin tatimor brenda 30 (tridhjetë) ditëve kalendarike nga data kur është marrë dijeni për këtë vendim.

4. Për rivendosjen në afat, zbatohen procedurat e parashikuara në Kodin e Procedurave Administrative. Drejtoria e Apelimit Tatimor merr masa për publikimin në website të qëndrimeve të mbajtura në vendimet e marra prej saj.

Neni 110

Rimbursimi i detyrimit tatimor, pagesa e kamatëvonesës dhe e gjobës (Shtuar fjali në pikën 1 me ligjin nr. 179, datë 28.12.2013; ndryshuar me ligjin nr. 112/2016 datë 3.11.2016)

1. Nëse vendimi i drejtorisë së apelimit tatimor ose Komisioni/t për Shqyrtimin e Apelimeve Tatimore është në favor të tatimpaguesit, detyrimi tatimor, i paguar më tepër nga tatimpaguesi dhe kamatëvonesa për tatimet e paguara më tepër, të llogaritura nga data e pagesës së detyrimit tatimor deri në datën e rimbursimit, i rimbursohen tatimpaguesit brenda 30 ditëve kalendarike nga data kur është marrë ose vlerësohet të jetë marrë vendimi i drejtorisë së apelimit tatimor.

Nëse tatimpaguesi ka paraqitur garanci për pagesën e detyrimit, kjo çlirohet tërësisht apo pjesërisht sipas vendimit të drejtorisë së apelimit, ose Komisioni/t për Shqyrtimin e Apelimeve Tatimore brenda 30 ditëve kalendarike nga data kur është marrë ose vlerësohet të jetë marrë vendimi.

2. Nëse Drejtoria e Apelimit Tatimor ose Komisioni për Shqyrtimin e Apelimeve Tatimore lë në fuqi vendimin e administratës tatimore dhe tatimpaguesi e pranon vendimin, çdo detyrim tatimor, që përfshin tatimin, në rastin kur nuk është paguar, por është vendosur garanci, kamatëvonesë dhe çdo gjobë e llogaritur, paguhen nga tatimpaguesi, brenda 30 ditëve kalendarike nga data kur vendimi për ankimin është marrë ose vlerësohet të jetë marrë.

3. Shfuqizuar.

KREU XIV SANKSIONET

Neni 111

Dënimet administrative (Shtuar pika 5 me ligjin nr. 10209, datë 23.12.2009; shtuar pika 4/1 me ligjin nr. 95, datë 7.12.2023)

1. Çdo veprim ose mosveprim i tatimpaguesit, agjentit tatimor apo përfaqësuesit të tatimpaguesit, që bie në kundërshtim me ligjin dhe për të cilin ky ligj parashikon dënim administrativ, përbën shkelje tatimore administrative.

2. Shkeljet e ligjit, që parashikohen për lëvizjen e mallrave, nëpërmjet kufirit doganor të Republikës së Shqipërisë, dënohen në përputhje me legjislacionin doganor në fuqi.

3. Shkeljet e ligjit, që parashikohen për mallrat e akcizës, zbatohen në përputhje me ligjin në fuqi për akcizat.

4. Gjobat e vendosura për shkelje tatimore administrative mund të hiqen në rrethana të jashtëzakonshme, kur moszbatimi i legjislacionit tatimor është shkaktuar nga fatkeqësi natyrore apo rrethana të tjera, të jashtëzakonshme, si vdekja ose një sëmundje e rëndë e tatimpaguesit, ose kur tatimpaguesi vepron në përputhje me udhëzimet me shkrim të administratës tatimore.

4/1. Për njësitë e qeverisjes qendrore dhe të vetëqeverisjes vendore nuk aplikohen dënimet administrative të parashikuara nga ky ligj në rastet kur mosdeklarimi në afat ka ardhur si rrjedhojë e zbatimit të një akti ligjor apo nënligjor me efekte prapavepruese apo zbatimit të një vendimi gjykate të formës së prerë.

5. Gjobat e vendosura për shkelje administrative, që lidhen me një detyrim tatimor, nuk mund të kalojnë 100 për qind të detyrimit tatimor.

Neni 112

Mungesa e ekzekutimit të detyrimit për regjistrim (Ndryshuar me ligjin nr. 164, datë 4.12.2014 dhe nr. 83/2022, datë 24.11.2022) Përveç sanksioneve administrative të parashikuara në legjislacionin në fuqi për këtë qëllim, mosrespektimi i detyrimit për regjistrim apo detyrimit për përditësimin e të dhënave dënohet për çdo shkelje me gjobë prej 10 000 lekësh për personat fizikë dhe 15 000 lekësh për personat juridikë.

Neni 113

Mosdeklarimi në afat (Ndryshuar me ligjin nr. 179, datë 28.12.2013; ndryshuar me ligjin nr. 112/2016 datë 3.11.2016, ndryshuar shkronja “b” dhe shtuar shkronja “c” nr. 83/2022, datë 24.11.2022) Tatimpaguesi, i cili nuk dorëzon në afatin e përcaktuar sipas ligjit përkatës deklaratën tatimore, për të cilën detyrohet sipas ligjit të deklarojë, dënohet me gjobë për çdo deklaratë tatimore të padorëzuar në afat, si më poshtë:

a) 10 000 lekë për tatimpaguesit e tatimit mbi fitimin korporativ;

b) 5 000 lekë për tatimpaguesit e tjerë me përjashtim të tatimpaguesit individë.

c) 3 000 lekë për tatimpaguesit individë.

Neni 114

Mospagimi në afat i detyrimit tatimor apo і kontributit (Ndryshuar me ligjin nr..10209, datë 23.12.2009; shtuar pika 4, me ligjin nr. 124/2012, datë 20.12.2012; shfuqizuar pika 3 me ligjin nr. 179, datë 28.12.2013; ndryshuar pika 2 me ligjin nr. 84/2014, datë 17.7.2014; ndryshuar pika 1 me ligjin nr. 164/2014, datë 4.12.2014; ndryshuar fjalia e dytë e pikës 2 me ligjin nr. 112/2016 datë 3.11.2016)

1. Tatimpaguesi, i cili nuk arrin që, brenda afatit të parashikuar në këtë ligj për pagesë, të paguajë shumën e detyrimit tatimor e të kontributit, detyrohet të paguajë një gjobë, të barabartë me 0,06 për qind të shumës së detyrimit të papaguar për çdo ditë, gjatë së cilës pagesa nuk është kryer. Në asnjë rast, gjoba nuk llogaritet për një periudhë më të gjatë se 365 ditë kalendarike.

2. Për qëllime të këtij neni, shuma e papaguar e detyrimit tatimor është diferenca ndërmjet detyrimit tatimor që duhet paguar dhe shumës së tatimit të paguar. Shumë e papaguar e detyrimit tatimor është diferenca ndërmjet shumës së saktë të rimbursueshme dhe shumës së rimbursimit të marrë në datën e caktuar.

3. Shfuqizuar.

4. Përjashtimisht, dispozitat e këtij neni nuk aplikohen për rastet e institucioneve buxhetore, të cilat vonesat në pagimin e detyrimeve tatimore dhe kontributeve i kanë bërë për shkak të vonesave në çeljen e fondeve buxhetore.

Neni 114/1 Mospagimi i kësteve të tatimit mbi fitimin korporativ dhe mbi të ardhurat personale (Shtuar me ligjin nr. 99/2015, datë 23.9.2015; ndryshuar me ligjin nr. 112/2016 datë 3.11.2016, nr. 83/2022, datë 24.11.2022; ndryshuar fjale me ligjin nr. 95, datë 7.12.2023) Mospagimi në afat i kësteve paraprake të tatimit mbi fitimin korporativ dhe tatimit mbi të ardhurat personale nga biznesi dhe vetëpunësimi, sipas legjislacionit në fuqi për tatimin mbi të ardhurat, dënohet me gjobë në masën 0,06 për qind të shumës së detyrimit të papaguar për çdo ditë gjatë së cilës pagesa nuk është kryer, por jo më shumë se 365 ditë kalendarike.

Neni 115

Plotësim i pasaktë i deklaratës tatimore (Ndryshuar pika 1 me ligjin nr. 10209, datë 23.12.2009; ndryshuar me ligjin nr. 164/2014, datë 4.12.2014; shfuqizuar fjalia e dytë e pikës 2 me ligjin nr. 112/2016 datë 3.11.2016; shtuar pika 3 me ligjin nr. 97/2018, datë 3.12.2018; shtuar shkronja “c” me ligjin nr. 79/2025, datë 11.12.2025)

1. Dorëzimi i një deklarate tatimore të pasaktë dënohet me një gjobë të barabartë me 0,06 për qind të shumës së detyrimit të papaguar për çdo ditë, gjatë së cilës pagesa nuk është kryer. Në asnjë rast, gjoba nuk llogaritet për një periudhë më të gjatë se 365 ditë kalendarike.

2. Për qëllime të këtij neni, shuma e papaguar e detyrimit tatimor është diferenca ndërmjet detyrimit tatimor, që duhet paguar dhe shumës së tatimit të paguar.

3. Deklarim i pasaktë konsiderohet edhe rasti kur, si rezultat i një kontrolli tatimor, bëhet rivlerësim në ulje i tepricës kreditore të tatimpaguesit. Në këtë rast tatimpaguesi penalizohet me gjobë 20 % të diferencës ndërmjet tepricës kreditore të deklaruar me tepricën kreditore që duhej deklaruar.

Neni 115/1 Dënime lidhur me transferimin e çmimit (Shtuar me ligjin nr. 43/2014, datë 24.4.2014;

ndryshuar togfjalësh në pikat 2 dhe 3 me ligjin nr. 79/2025, datë 11.12.2025)

1. Në rast të mosparaqitjes në kohë të “Njoftimit të transaksioneve vjetore të kontrolluara”, në përputhje me dispozitat përkatëse të udhëzimit të Ministrit të Financave, “Për transferimin e çmimit”, tatimpaguesi dënohet me një gjobë fikse prej 10 000 (dhjetë mijë) lekësh, për çdo muaj vonesë.

2. Në rast rregullimesh të detyrimeve tatimore, për efekt të transferimit të çmimit në bazë të dispozitave të nenit 32, të ligjit nr. 29/2023, “Për tatimin mbi të ardhurat”, të ndryshuar, tatimpaguesit dënohen sipas nenit 114, “Mospagimi në afat i detyrimit tatimor apo kontributit”, të ligjit nr. 9920, datë 19.5.2008, “Për procedurat tatimore në Republikën e Shqipërisë”, të ndryshuar.

3. Në rast rregullimesh të detyrimeve tatimore, për efekt të transferimit të çmimit, në bazë të dispozitave të nenit 32, të ligjit nr. 29/2023, “Për tatimin mbi të ardhurat”, të ndryshuar, ndaj tatimpaguesve, të cilët kanë plotësuar dhe kanë paraqitur në organet tatimore dokumentacionin e transferimit të çmimit, siç përcaktohet në nenin 37 të ligjit të sipërpërmendur, dhe udhëzimin e Ministrit të Financave, “Për transferimin e çmimit”, këta tatimpagues janë të detyruar të paguajnë vetëm detyrimin shtesë dhe interesat, por jo gjoba.

Neni 115/2 Dënimet për mosnjoftimin e ndryshimeve në lidhje me ndryshimin e pronësisë (Shtuar me ligjin nr. 97/2018, datë 3.12.2018) Nëse një person juridik nuk njofton administratën tatimore lidhur me ndryshimet e pronësisë, sipas kërkesave të nenit 27/1, “Ndryshimi i pronësisë”, të ligjit nr. 8438, datë 28.12.1998, “Për tatimin mbi të ardhurat”, të ndryshuar, ai është përgjegjës dhe dënohet si më poshtë:

a) për shkeljen në rastin e pikës 3, të nenit të sipërpërmendur, 15 për qind të vlerës së tregut të aktiveve të trajtuara si me ndryshim pronësie;

b) për shkeljen në rastin e pikës 4, të nenit të sipërpërmendur, 5 për qind të vlerës së tregut të aksioneve ose interesave të ngjashёm që u ka ndryshuar pronësia.

Dënimi, sipas shkronjës “b” më sipër, nuk zbatohet kur vërtetohet që personi nuk ishte në dijeni të ndryshimit të pronësisë apo nuk ka të dhëna, prova apo fakte që të besohet se personi duhet të ishte në dijeni.

Neni 115/3 Dënime lidhur me mosdërgimin e dokumentacionit për zbatimin e dispozitave të marrëveshjeve për shmangien e tatimit të dyfishtë (Shtuar neni me ligjin nr. 95, datë 7.12.2023)

1. Dokumentacioni për zbatimin e dispozitave të marrëveshjes për shmangien e tatimit të dyfishtë dorëzohet brenda vitit kalendarik, që pason vitin në të cilin janë zbatuar dispozitat e kësaj marrëveshjeje. Ky dokumentacion përcaktohet në udhëzimin e ministrit përgjegjës për financat.

2. Nëse tatimpaguesi nuk e dorëzon dokumentacionin brenda afatit të përcaktuar në pikën 1 të këtij neni, atëherë ndaj tatimpaguesit aplikohet një gjobë prej 10 000 lekësh për çdo muaj të paraqitjes me vonesë. Kjo gjobë aplikohet deri në 24 muaj pasues, pas përfundimit të afatit të përcaktuar në pikën 1 të këtij neni.

3. Nëse tatimpaguesi nuk paraqet dokumentacionin edhe pas kalimit të afatit prej 24 muajsh të përcaktuar në pikën 2 të këtij neni, atëherë tatimpaguesi humbet të drejtën e zbatimit të dispozitave të marrëveshjes për shmangien e tatimit të dyfishtë dhe duhet të paguajë tatimet e papaguara apo pjesën e reduktuar të tatimit sipas marrëveshjes, si dhe gjobat dhe interesat për pagesë të vonuar në përputhje me këtë ligj.

Neni 115/4 Dënime lidhur me detyrimet e raportimit për çdo vend (Shtuar neni me ligjin nr. 95, datë 7.12.2023)

1. Mospërmbushja e detyrimit për të dorëzuar në kohë raportimin për çdo vend, sipas dispozitave të këtij ligji, dënohet me gjobë 10 000 lekë për çdo muaj vonesë deri në 12 muaj pas afatit të përcaktuar në nenin 63/4 të këtij ligji.

2. Pas afatit të përcaktuar në pikën 1 të këtij neni, për mospërmbushjen e detyrimit për paraqitjen e këtij raportimi tatimpaguesi dënohet me gjobë 200 000 lekë.

3. Mospërmbushja e detyrimit për paraqitjen e saktë dhe të plotë të raportimit për çdo vend, sipas dispozitave të këtij ligji, dënohet me gjobë 50 000 lekë.

Neni 116

Evazioni tatimor (Riformuluar me ligjin nr. 164/2014, datë 4.12.2014; ndryshuar shkronja “c” e pikës 2 me ligjin nr. 79/2025, datë 11.12.2025)

1. Fshehja apo shmangia nga pagimi i detyrimeve tatimore, nëpërmjet mosdorëzimit të dokumenteve ose mosdeklarimit të të dhënave të nevojshme, sipas legjislacionit në fuqi, dorëzimi i dokumenteve të falsifikuara apo deklaratave ose informacioneve të rreme, që çojnë në përllogaritjen e pasaktë të shumës së tatimit, taksës apo kontributit, përbën evazion tatimor dhe dënohet me gjobë të barabartë me 100 për qind të diferencës së shumës së përllogaritur nga ajo që duhet të ishte në fakt.

2. Në kuptim të pikës 1, të këtij neni, konsiderohet gjithashtu se kryejnë evazion tatimor duke kryer fshehje të të ardhurave, me qëllim fshehjen apo shmangien nga pagimi i detyrimeve tatimore, tatimpaguesit, për të cilët konstatohet se kryejnë këto shkelje dhe për të cilët janë aplikuar dënimet administrative në përputhje me:

a) pikën 1, të nenit 119, të këtij ligji,

b) pikën 3, të nenit 121, të këtij ligji;

c) pikën 4, të nenit 123 të këtij ligji.

Neni 117

Dënimet për agjentët e mbajtjes së tatimit në burim, agjentët e taksave dhe agjentët e tarifave (Ndryshuar me ligjin nr. 179/2013, datë 28.12.2013; ndryshuar me ligjin nr. 112/2016 datë 3.11.2016) Agjenti i mbajtjes së tatimit, agjenti i taksave apo ai i tarifave detyrohen të paguajnë gjobë, në masën e mëposhtme:

a) Gjobë në masën 0,06 për qind të shumës së plotë të tatimit, taksës apo tarifës, në rast se e ka mbajtur, llogaritur dhe deklaruar tatimin në burim apo tatimin, taksën ose tarifën, por nuk e ka transferuar atë në Buxhetin e Shtetit. Ky dënim aplikohet për çdo ditë, gjatë së cilës pagesa nuk është kryer, por jo për një periudhë më të gjatë se 365 ditë kalendarike.

b) Gjobë në masën 50 për qind të shumës së plotë të tatimit, taksës apo tarifës në rast se nuk mban tatimin në burim apo tatimin apo nuk mbledh taksën ose tarifën;

c) Gjobë në masën 100 për qind të shumës së plotë të tatimit, taksës apo tarifës nëse mban dhe nuk deklaron e paguan tatimin në burim apo tatimin, taksën ose tarifën e mbledhur.

Neni 118

Mosmbajtja e saktë e librave, regjistrave dhe dokumentacionit (Ndryshuar me ligjin nr. 83/2022, datë 24.11.2022) Tatimpaguesi që nuk arrin të mbajë regjistrat dhe dokumentacionin tatimor, të kërkuar sipas këtij ligji, detyrohet të paguajë një gjobë me 10 000 lekë për çdo shkelje, në rastet kur është person fizik që ushtron veprimtari ekonomike tregtare apo si i vetëpunësuar dhe 50 000 lekë kur është person juridik.

Neni 119

Mosdeklarimi i punonjësve dhe fshehja e pagës (Ndryshuar me ligjin nr.10209, datë 23.12.2009; ndryshuar me ligjin nr. 10415, datë 7.4.2011; ndryshuar shkronjat “a” dhe “b” me ligjin nr. 124/2012, datë 20.12.2012; ndryshuar me ligjin nr. 164/2014, datë 4.12.2014; ndryshuar me ligjin nr. 112/2016 datë 3.11.2016, ndryshuar fjalia e dytë e shkronjës “b” me ligjin 83/2019, datë 18.12.2019; ndryshuar pika 3 me ligjin nr. 83/2022, datë 24.11.2022)

1. Nëse nga verifikimi dhe kontrolli në vendndodhjen e biznesit rezulton se tatimpaguesi nuk ka deklaruar në organin tatimor çdo të punësuar rishtazi, të paktën një ditë kalendarike përpara fillimit të punës, përveç detyrimit për pagimin e shumës së detyrimeve tatimore dhe kontributeve të sigurimeve shoqërore e shëndetësore, të llogaritura nga data e konstatimit, dënohet me gjobë për çdo punonjës të padeklaruar:

a) tatimpaguesit e regjistruar si subjekte të tatimit mbi vlerën e shtuar dhe tatimit mbi fitimin korporativ, me gjobë prej 200 000 (dyqind mijë) lekësh;

b) tatimpaguesit e tjerë, me gjobë prej 50 000 (pesëdhjetë mijë) lekësh.

2. Këto gjoba nuk aplikohen në rastin kur nga verifikimi dhe kontrolli në vendndodhjen e aktivitetit të tatimpaguesit me status ligjor person fizik, evidentohen persona mbi 16 vjeç, të cilët deklarohen si “të vetëpunësuar me punonjës të papaguar të familjes”. Pas konstatimit, organi tatimor vërteton në portalin “e-Albania”, nëpërmjet certifikatës familjare të të vetëpunësuarit, nëse ai plotëson ose jo kushtet për t’u konsideruar si person i papaguar i familjes apo si bashkëjetues, sipas kuptimit të Kodit Civil.

3. Nëse nga verifikimi dhe kontrolli rezulton se tatimpaguesi ka fshehur dhe nuk ka deklaruar pagën e saktë të përfituar nga punëmarrësi, si rezultat i marrëdhënieve të punësimit, punëdhënësi përveç detyrimit për pagimin e shumës së duhur të detyrimit tatimor dhe kontributet për këtë punonjës, të llogaritur për gjithë periudhën e provuar se është kryer shkelja, dënohet me gjobë në masën:

a) 200% të detyrimit dhe kontributit të llogaritur për tatimpaguesit entitete juridike;

b) 100% të detyrimit dhe kontributit për të gjithë tatimpaguesit e tjerë.

Neni 119/1 Mosdeklarimi i pagës reale (Shtuar me ligjin nr. 99/2015, datë 23.9.2015 dhe shfuqizuar me vendimin e Gjykatës Kushtetuese nr. 33, datë 8.6.2016)

Neni 120

Pagesat ose arkëtimet me para në dorë mbi 150 000 lekë (Ndryshuar me ligjin nr. 179, datë 28.12.2013; ndryshuar me ligjin nr. 112/2016 datë 3.11.2016; shtuar paragrafë me ligjin nr. 31/2019, datë 17.6.2019) Tatimpaguesit, persona fizikë apo juridikë, tregtarë, që kryejnë ndërmjet tyre transaksione shitjeje apo blerjeje me para në dorë, jo në përputhje me përcaktimin e pikës 1, të nenit 59, të k��tij ligji, dënohen me gjobë në masën 10 për qind të vlerës së secilit transaksion.

Mospërmbushja e detyrimit të përcaktuar në pikën 1/2 dhe 1/3 të nenit 59, të këtij ligji nga tatimpaguesit dënohen si më poshtë:

a) për tatimpaguesit, persona fizikë tregtarë, të regjistruar për tatimin mbi vlerën e shtuar, me qarkullim deri në 8 000 000 (tetë milionë) lekë, gjobë në masën 25 000 lekë;

b) për tatimpaguesit persona juridikë, pavarësisht nga qarkullimi, si dhe tatimpaguesit persona fizikë tregtarë, me qarkullim mbi 8 000 000 (tetë milionë) lekë, gjobë në masën 50 000 lekë;

c) për organizatat jofitimprurëse, gjobë në masën 37 000 lekë.

Në rast të vazhdimit të mosrespektimit të detyrimit të pikës 1/2 dhe 1/3, të nenit 59, të këtij ligji, edhe pas dënimit, sipas shkronjave “a”, “b” dhe “c”, të këtij paragrafi, tatimpaguesi dënohet me dyfishin e gjobës së parë.

Neni 121

Mallrat e pashoqëruara me dokumente tatimore (Shtuar pika 3 me ligjin nr. 10415, datë 7.4.2011; shtuar paragrafi i fundit me ligjin nr. 164, datë 4.12.2014; shtuar me ligjin nr. 99/2015, datë 23.9.2015; shtuar pikat 4 dhe 5 me ligjin nr. 99/2015, datë 23.9.2015; shfuqizuar pika 4 me vendimin e Gjykatës Kushtetuese nr. 33, datë 8.6.2016; ndryshuar pikat 1 dhe 3, dhe shfuqizuar pika 2, me ligjin nr. 112/2016 datë 3.11.2016, ndryshuar me ligjin 83/2019, datë 18.12.2019; ndryshuar me ligjin nr. 83/2022, datë 24.11.2022)

1. Tatimpaguesit që mbajnë në ruajtje, përdorin ose transportojnë mallra të pashoqëruara me dokumente tatimore, në përputhje me dispozitat e këtij ligji dhe të legjislacionit në fuqi për faturën dhe sistemin e monitorimit të qarkullimit, penalizohen si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi apo vetëpunësimi, të cilët nuk janë të regjistruar për TVSH-në, dhe tatimpagues të tjerë dënohen me gjobë prej 25 000 lekësh;

b) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi apo vetëpunësimi dhe për TVSH-në dënohen me gjobë prej 50 000 lekësh, por jo më pak se vlera e TVSH-së së munguar;

c) tatimpaguesit e regjistruar me përgjegjësinë tatimore të tatimit mbi fitimin korporativ dënohen me gjobë prej 750 000 lekësh, por jo më pak se vlera e TVSH-së së munguar;

ç) personi, i cili ushtron veprimtari ekonomike tregtare i paregjistruar, sipas përcaktimeve të nenit 41 të këtij ligji, dënohet me gjobë prej 50 000 lekësh.

2. Përcaktimi i vlerës së TVSH-së së munguar bëhet nga administrata tatimore në momentin e konstatimit të shkeljes duke vlerësuar mallin e gjetur pa faturë me çmimin e tregut.

3. Për shkeljet e parashikuara në pikën 1 të këtij neni, në rast përsëritjeje, administrata tatimore, përveç penaliteteve të përcaktuara në pikën 1, kallëzon penalisht tatimpaguesin në përputhje me përcaktimet e neneve 116 dhe 131 të këtij ligji.

Neni 122

Shkeljet për mosregjistrimin e të dhënave të subjekteve që lëshojnë fatura (Ndryshuar me ligjin nr.10209, datë 23.12.2009; ndryshuar me ligjin nr. 10415, datë 7.4.2011; ndryshuar me ligjin nr. 164/2014, datë 4.12.2014; ndryshuar me ligjin nr. 99/2015, datë 23.9.2015; shfuqizuar pikat “b”, “c” të pikës 1 dhe “d/1, me vendimin e Gjykatës Kushtetuese nr. 33, datë 8.6.2016; ndryshuar me ligjin nr. 112/2016 datë 3.11.2016; ndryshuar me ligjin 83/2019, datë 18.12.2019)

1. Personi, i cili është subjekt i lëshimit të faturës ose i faturës shoqëruese, në përputhje me legjislacionin në fuqi për faturën dhe sistemin e monitorimit të qarkullimit, dënohet me gjobë si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi, të cilët nuk janë të regjistruar për TVSH-në, dhe tatimpagues të tjerë dënohen me gjobë prej 25 000 lekësh;

b) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi dhe për TVSH-në dënohen me gjobë prej 50 000 lekësh;

c) tatimpaguesit e regjistruar me përgjegjësinë tatimore të tatimit mbi fitimin korporativ dhe për TVSH-në dënohen me gjobë prej 75 000 lekësh.

2. Gjobat, sipas shkronjave “a”, “b”, “c”, të pikës 1, të këtij neni, aplikohen nëse:

a) brenda 24 orëve përpara lëshimit të faturës së parë, nuk njofton administratën tatimore për fillimin e kryerjes së furnizimit me mallra e shërbime, mbi bazën e së cilës është i detyruar të lëshojë fatura në përputhje me këtë ligj, përveç nëse është person i regjistruar në regjistrin e administratës tatimore si tatimpagues i TVSH-së, tatimpagues i tatimit mbi fitimin korporativ ose tatimpagues i tatimit mbi të ardhurat personale nga biznesi;

b) brenda 24 orëve përpara lëshimit të faturës së parë, nuk dorëzon në administratën tatimore të dhënat për vendndodhjen e biznesit që përdor për ushtrimin e veprimtarisë ekonomike;

c) nuk i dorëzon të dhënat për çdo operator, person fizik i autorizuar për të lëshuar faturat, brenda 24 orëve përpara fillimit të lëshimit të faturës nga secili operator;

ç) nuk dorëzon informacionin për mirëmbajtësin e software-it brenda 24 orëve nga lidhja e kontratës për këtë shërbim;

d) nuk dorëzon të dhënat në administratën tatimore për ndryshimin e të dhënave, sipas shkronjave “b”, “c” dhe “ç”, të kësaj pike, brenda afateve kohore të përcaktuara.

Neni 123

Shkeljet për moslëshimin e faturave dhe të faturave shoqëruese (Ndryshuar fjalë në pikën 2 me ligjin nr. 10137, datë 11.5.2009; ndryshuar pika 2 me ligjin rn.10209, datë 23.12.2009; ndryshuar me ligjin nr. 10415, datë 7.4.2011, ndryshuar me ligjin 83/2019, datë 18.12.2019; ndryshuar shkronja “a” e pikës 3 me ligjin nr. 83/2022, datë 24.11.2022; shfuqizuar pika 2, ndryshuar pika 3 me ligjin nr. 95, datë 7.12.2023)

1. Personi, i cili është subjekt i lëshimit të faturës ose i faturës shoqëruese, në përputhje me legjislacionin në fuqi për faturën dhe sistemin e monitorimit të qarkullimit dhe për TVSH-në, kryen shkelje nëse:

a) nuk lëshon faturë për çdo furnizim të mallrave ose të shërbimeve në Republikën e Shqipërisë;

b) nuk lëshon faturë për çdo pagesë të bërë përpara furnizimit të mallit ose përpara përfundimit të shërbimit (për parapagimin);

c) nuk lëshon faturë për çdo pranim të mallrave ose të ofrimit të shërbimit, nëse është subjekt i “vetëfaturimit”;

ç) nuk lëshon faturë në kohën e furnizimit të mallrave ose shërbimeve ose brenda afateve kohore të parashikuara që përbëjnë përjashtim të këtij rregulli;

d) lëshon faturë që nuk përmban të gjitha elementet e përcaktuara të faturës;

dh) faturën që lëshon për pagesat me para në dorë dhe, në raste të veçanta, faturën për pagesat pa para në dorë, nuk i shtyp në letër e nuk zbaton procedurën e fiskalizimit, si dhe nuk i dorëzon faturën blerësit në kohën e furnizimit;

e) shuma e parave në dorë të arkëtuara mbi maksimumin e arkës ose nëse shuma totale, në rastet e përcaktuara, nuk depozitohet në një llogari të hapur në bankë, jo më vonë se fundi i ditës së ardhshme të punës;

ë) nuk lëshon faturë shoqëruese për çdo lëvizje të mallrave nga një vend në tjetrin pa tjetërsim të pronësisë ndaj mallrave.

Tatimpaguesit e regjistruar me përgjegjësinë tatimore të tatimit mbi të ardhurat personale nga biznesi, të cilët nuk janë të regjistruar për TVSH-në, dhe tatimpagues të tjerë dënohen me gjobë prej 25 000 lekësh.

Tatimpaguesit e regjistruar me përgjegjësinë tatimore të tatimit mbi të ardhurat personale nga biznesi dhe për TVSH-në, dënohen me gjobë prej 50 000 lekësh, por jo më pak se vlera e TVSH-së së munguar.

Tatimpaguesit e regjistruar me përgjegjësinë tatimore të tatimit mbi fitimin korporativ dhe për TVSH-në dënohen me gjobë prej 75 000 lekësh, por jo më pak se vlera e TVSH-së së munguar.

2. Shfuqizuar.

3. Për tatimpaguesin, i cili për herë të dytë brenda vitit kalendarik kryen një shkelje sipas shkronjave “a” dhe/ose “c”, të pikës 1 të këtij neni, të konstatuar të dyja herët në kuadrin e një kontrolli tatimor “verifikim në vend”, përveç masës së gjobës, siç përcaktohet në pikën 1 të këtij neni, merren edhe masat e mëposhtme:

a) gjobë 50 000 lekë për tatimpaguesit e tatimit mbi të ardhurat personale nga biznesi apo vetëpunësimi, gjobë 100 000 lekë për tatimpaguesit e tatimit mbi të ardhurat personale nga biznesi apo vetëpunësimi me TVSH-në, gjobë 500 000 lekë për tatimpaguesit e tatimit mbi fitimin korporativ;

b) vlerësim tatimor për tre muajt e fundit duke përdorur metodat alternative të parashikuara në nenet 71 e 72 të këtij ligji për tatimpaguesit e regjistruar për TVSH-në;

c) bllokimin e veprimtarisë në vendin ku është konstatuar shkelja për 30 ditë kalendarike.

Masa e bllokimit, sipas shkronjës “c” të kësaj pike, hiqet nëse tatimpaguesi paguan penalitetet e vendosura.

4. Tatimpaguesi, i cili, për herë të tretë e në vijim brenda vitit kalendarik, kryen shkeljet e përcaktuara në shkronjat “a”, “b” dhe “c”, të pikës 1, të këtij neni, përveç dënimit, sipas pikës 3, të këtij neni, procedohet për ndjekje penale, sipas pikës 2, të nenit 116, të këtij ligji. Gjithashtu, publikohen emri i tatimpaguesit, NIPT-i dhe emri i përfaqësuesit të biznesit në faqen zyrtare të internetit të Drejtorisë së Përgjithshme të Tatimeve.

5. Për tatimpaguesin, ndaj të cilit, pas rikontrollit tatimor të kryer brenda 15 ditëve nga konstatimi i parë i shkeljeve, sipas shkronjës “e”, të pikës 1, të këtij neni, përsëri konstatohet shkelje e njëjtë, zbatohen dënimet e përcaktuara në shkronjën “a”, të pikës 3, të këtij neni.

6. Tatimpaguesi, i cili lëshon një dëftesë tatimore/biletë me vlerë të parashtypur, që nuk përmban elementet e përcaktuara në këtë ligj dhe në aktet nënligjore, për dëftesën tatimore/biletën me vlerë të parashtypur dënohet me gjobë në masën 25 000 lekë.

7. Tatimpaguesi, i cili lëshon dëftesë tatimore, ku ka shënuar një vlerë të ndryshme nga vlera e furnizimit ose e çmimit të afishuar, dënohet me gjobë në masën 25 000 lekë.

8. Moslëshimi i biletave të shërbimit me vlerë të parashtypur, të prodhuara nga institucionet e autorizuara, të përdorura në sektorë të ndryshëm, dënohet me gjobë në masën 5 000 lekë për çdo biletë.

Neni 124

Shkeljet në procedurën e fiskalizimit të faturave dhe sistemin e monitorimit të qarkullimit (Ndryshuar me ligjin nr. 99/2015, datë 23.9.2015; ndryshuar pikat 1 dhe 2 me ligjin nr. 112/2016 datë 3.11.2016; shtuar një paragraf në pikën 1 me ligjin nr. 97/2018, datë 3.12.2018; ndryshuar me ligjin nr. 83/2019, datë 18.12.2019;

ndryshuar shkronjat “a”, “b” e “c” të pikës 1 me ligjin nr. 83/2022, datë 24.11.2022)

1. Tatimpaguesi, i cili është subjekt i lëshimit të faturës ose i faturës shoqëruese, në përputhje me legjislacionin në fuqi për faturën dhe sistemin e monitorimit të qarkullimit, dënohet me gjobë si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi apo vetëpunësimi, por që nuk janë të regjistruar për TVSH-në, dhe tatimpagues të tjerë dënohen me gjobë 25 000 lekë.

b) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi apo vetëpunësimi dhe për TVSH-në, dënohen me gjobë prej 50 000 lekësh;

c) tatimpaguesit e regjistruar me përgjegjësinë tatimore të tatimit mbi fitimin korporativ dënohen me gjobë 75 000 lekë.

2. Gjobat, sipas shkronjave “a”, “b” dhe “c”, të pikës 1, të këtij neni, aplikohen nëse:

a) nuk instalojnë pajisjen elektronike të faturimit ose nuk pajisen me pajisje elektronike të faturimit të lëvizshëm dhe me printer fiskal, i cili përmban një software për nënshkrimin elektronik të faturës dhe nuk sigurojnë një lidhje interneti për shkëmbimin elektronik të të dhënave me administratën tatimore, në rast të pagesave me para në dorë;

b) nuk instalojnë pajisjen elektronike ose nuk pajisen me pajisje elektronike të lëvizshme dhe një printer, i cili përmban një software për nënshkrimin elektronik të faturës shoqëruese dhe nuk sigurojnë një lidhje interneti për shkëmbimin elektronik të të dhënave me administratën tatimore;

c) nuk pajisen nga AKSHI me certifikatën digjitale të përcaktuar për nënshkrimin elektronik të faturës ose të faturës shoqëruese dhe për identifikimin e tatimpaguesit që lëshon fatura;

ç) nuk lëshojnë faturat nëpërmjet pajisjeve elektronike të faturimit të përcaktuar në shkronjën “a”, të kësaj pike, ose nëpërmjet përdorimit të një software-i të përcaktuar për lëshimin e faturave pa para në dorë;

d) nuk zbatojnë procedurën e fiskalizimit për shitje nëpërmjet pajisjeve të vetëshërbimit;

dh) nuk përdorin software që mundësojnë shmangien nga zbatimi i fiskalizimit të lëshimit të faturave ose zbatimit të fiskalizimit të shitjes nëpërmjet pajisjeve të vetëshërbimit;

e) në rast të ndërprerjes së internetit, nuk krijojnë lidhje elektronike brenda 48 orëve nga data kur lidhja është ndërprerë dhe nuk i dorëzojnë të gjitha faturat e lëshuara pa të dhënat e numrit identifikues të veçantë të faturës (NIVF-së) tek administrata tatimore, ose në atë afat nuk njoftojnë administratën tatimore për pamundësinë e krijimit të një lidhjeje elektronike (internet);

ë) në rast të ndërprerjes së plotë të punës së pajisjes fiskale, nuk lëshojnë dëftesat e vërtetuara nga administrata tatimore dhe, në afatin e përcaktuar, nuk rivendosin punën e pajisjeve fiskale për lëshimin e faturave ose nuk pajisen brenda afatit të caktuar me pajisje të re, nuk dorëzojnë të gjitha faturat e lëshuara në administratën tatimore, gjatë kohës së ndërprerjes së punës së pajisjes fiskale;

f) ushtrojnë veprimtari ekonomike në vendndodhjen e biznesit, ku nuk është e mundur të vendoset një lidhje elektronike (internet) dhe për këtë ka një vërtetim të AKEP-it, të cilin nuk e dorëzojnë në administratën tatimore dhe nuk dorëzojnë të dhënat për faturat e lëshuara brenda afatit të përcaktuar e në mënyrën e përcaktuar;

g) nuk afishojnë një njoftim në secilën pajisje elektronike të faturimit ose në një vend tjetër të dukshëm në vendndodhjen e biznesit, që tregon detyrimin për të lëshuar faturën, si dhe detyrimin e blerësit për të marrë dhe ruajtur faturën.

Neni 124/1 Mosregjistrimi i prodhuesit dhe i mirëmbajtësit të software-it për lëshimin e faturave (Shtuar me ligjin 83/2019, datë 18.12.2019; shtuar pikat 3 dhe 4 me ligjin nr. 79/2025, datë 11.12.2025)

1. Prodhuesi dhe/ose mirëmbajtësi i software-it, i cili nuk është regjistruar në regjistrin e prodhuesve ose të mirëmbajtësit të software-it, përpara fillimit të ofrimit ose të mirëmbajtjes së software-it për lëshimin e faturave ose të faturave shoqëruese, në administratën tatimore, në përputhje me ligjin që rregullon faturën e sistemin e monitorimit të qarkullimit, dënohet me gjobë 1 000 000 lekë për këtë shkelje.

2. Prodhuesi dhe/ose mirëmbajtësi i software-it, programi i të cilit përdoret nga subjekti që lëshon fatura, nuk mundëson procedurën e fiskalizimit dhe nëse software përmban mundësi, të cilat shmangin procedurën e fiskalizimit të faturës së lëshuar, në përputhje me ligjin që rregullon faturën dhe sistemin e monitorimit të qarkullimit, dënohet me gjobë 1 000 000 lekë për këtë shkelje.

3. Prodhuesi ose mirëmbajtësi i software-it, programi i të cilit përdoret nga subjekti që lëshon fatura, që, për rastet e konfiskimit të pajisjeve fiskale, nuk bashkëpunon me administratën tatimore, me kërkesë të saj për hapjen ose verifikimin e pajisjeve, ku është instaluar ky program, dënohet me gjobë 1 000 000 (një milion) lekë për këtë shkelje.

4. Në rast se prodhuesi ose mirëmbajtësi i software-it, i cili është gjobitur sipas pikës 3 të këtij neni, refuzon për herë të dytë, pa shkaqe të arsyeshme, bashkëpunimin me administratën tatimore, komisioni i përhershëm për monitorimin e tyre, në përputhje me aktet nënligjore në fuqi, harton një relacion sqarues dhe u propozon titullarëve të institucioneve, që kanë miratuar certifikimin, marrjen e masës së shfuqizimit të certifikatës. Titullarët përkatës vendosin nëse certifikata do të shfuqizohet ose jo.

Neni 124/2 Shkeljet në procedurën e lëshimit, dërgimit dhe pranimit të e-Faturës (Shtuar me ligjin 83/2019, datë 18.12.2019)

1. Personi, i cili është subjekt i lëshimit të e-Faturës, në përputhje me legjislacionin në fuqi për faturën dhe sistemin e monitorimit të qarkullimit, dënohet me gjobë si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi, por që nuk janë të regjistruar për TVSH-në, dhe tatimpagues të tjerë dënohen me gjobë prej 50 000 lekësh;

b) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi dhe për TVSH-në dënohen me gjobë prej 100 000 lekësh, por jo më pak se vlera e TVSH-së së munguar;

c) tatimpaguesit e regjistruar me përgjegjësinë tatimore të tatimit mbi fitimin korporativ, në përputhje me ligjin për tatimin mbi të ardhurat dhe për TVSH-në, dënohen me gjobë prej 150 000 lekësh, por jo më pak se vlera e TVSH-së së munguar.

2. Gjobat, sipas shkronjave “a”, “b” dhe “c”, të pikës 1, të këtij neni, aplikohen nëse:

a) nuk lëshojnë apo dërgojnë e-Faturën dhe dokumentet shoqëruese, në përputhje me ligjin që rregullon faturën dhe sistemin e monitorimit të qarkullimit;

b) lëshojnë dhe dërgojnë e-Faturat dhe dokumentet shoqëruese që nuk janë në përputhje me rregullat e përdorimit të e-Faturës;

c) nuk janë regjistruar në regjistrin qendror të shkëmbimit të e-Faturave.

3. Personat, të cilët janë të detyruar të pranojnë e-Faturën, në përputhje me ligjin që rregullon faturën dhe sistemin e monitorimit të qarkullimit, dënohen me gjobë si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi, por që nuk janë të regjistruar për TVSH-në, dhe tatimpagues të tjerë dënohen me gjobë prej 50 000 lekësh;

b) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi dhe për TVSH-në dënohen me gjobë prej 100 000 lekësh;

c) tatimpaguesit e regjistruar me përgjegjësinë tatimore të tatimit mbi fitimin korporativ dhe për TVSH-në dënohen me gjobë prej 150 000 lekësh, por jo më pak se vlera e TVSH-së së munguar.

4. Gjobat, sipas shkronjave “a”, “b” dhe “c”, të pikës 3, të këtij neni, aplikohen nëse:

a) pranojnë dhe përpunojnë e-Fatura dhe dokumentet shoqëruese që nuk janë në përputhje me rregullat e përdorimit të e-Faturës;

b) nuk pranojnë ose nuk përpunojnë e-Faturat dhe dokumentet shoqëruese, në përputhje me ligjin që rregullon faturën dhe sistemin e monitorimit të qarkullimit;

c) kryejnë pagesat e e-Faturës, në kundërshtim me dispozitat e ligjit që rregullon faturën dhe sistemin e monitorimit të qarkullimit.

5. Personi, i cili është ndërmjetës i teknologjisë së informacionit që ofron shërbime për lëshim/dërgim të e-Faturës, të cilat nuk janë në përputhje me ligjin që rregullon faturën dhe sistemin e monitorimit të qarkullimit ose ofron shërbime për lëshim/dërgim të e-Faturës dhe të dokumenteve tjera shoqëruese, të cilat nuk janë në përputhje me rregullat e përdorimit të e-Faturës, sipas legjislacionit në fuqi, dënohet me gjobë 50 000 lekë për çdo faturë.

Neni 125

Mosmarrja e faturës (Ndryshuar me ligjin 83/2019, datë 18.12.2019; ndryshuar fjale në shkronjën “b” me ligjin nr. 95, datë 7.12.2023) Blerësi ose çdo pranues i faturës së lëshuar për pagesë me para në dorë, i cili nuk e merr faturën e lëshuar dhe me kërkesë të personit të autorizuar të administratës tatimore, nuk i tregon faturën e marrë pas largimit nga vendndodhja e biznesit të shitësit, dënohet me:

a) 50 000 lekë, nëse është tatimpagues i regjistruar për TVSH-në dhe/ose tatimin mbi fitimin korporativ;

b) 25 000 lekë, nëse është tatimpagues i regjistruar për tatimin mbi të ardhurat personale nga biznesi;

c) 1 000 lekë, nëse është individ, konsumator final.

Neni 126

Mosdhënia e informacionit Refuzimi për dhënien e informacionit të kërkuar nga administrata tatimore, në përputhje me dispozitat e këtij ligji, dënohet me gjobë me 10 000-50 000 lekë për çdo shkelje.

Neni 127

Pengimi i kontrollit ose i hetimit tatimor (Shtuar pika 3 me ligjin nr. 10209, datë 23.12.2009, ndryshuar pikat 1 e 2 me ligjin nr. 83/2022, datë 24.11.2022)

1. Tatimpaguesi që pengon direkt ose indirekt një kontroll tatimor ose hetim nga administrata tatimore, i nënshtrohet një gjobe prej 100 000 lekësh për tatimpaguesit e klasifikuar si persona fizikë tregtarë apo të vetëpunësuar, dhe 1 000 000 lekë për tatimpaguesit e klasifikuar si entitete ose individë me pasuri të lartë.

2.

Masa e gjobës, e parashikuar në pikën 1 të këtij neni, miratohet nga drejtori i Drejtorisë Rajonale Tatimore ose njësitë e ngjashme me të, ose nga titullari i institucionit apo i deleguari prej tij për kontrollet e kryera nga strukturat e Drejtorisë së Përgjithshme të Tatimeve, dhe nga titullari i njësisë tatimore të qeverisjes vendore për tatimpaguesit që paguajnë taksa dhe tarifa vendore.

3. Në rast se organet tatimore kanë të dhëna të besueshme se tatimpaguesi fsheh informacione për gjendjen e tij ekonomike-financiare, organet tatimore kanë të drejtë t'ia sekuestrojnë dokumentacionin, pajisjet kompjuterike dhe fiskale dhe mjete të tjera të mbajtjes së dokumentacionit të tatimpaguesit në mjediset e ushtrimit të veprimtarisë së tij.

Neni 128

Lëshimi i faturës së pasaktë

1. Tatimpaguesi, që lëshon faturë tatimore të pasaktë e që rezulton me ulje të detyrimit apo rritje të shumës për t’u rimbursuar, dënohet me gjobë të barabartë me 50 për qind të shumës së efektit në ulje të detyrimit tatimor, përveç detyrimeve tatimore dhe interesave të llogaritura në përputhje me dispozitat e këtij ligji dhe të ligjeve specifike tatimore.

2. Tatimpaguesi, që lëshon një faturë tatimore me pasaktësi por që provohet se nuk ka efekt në llogaritjen dhe pagimin e detyrimit tatimor, dënohet me gjobë 10 000 lekë.

3. Tatimpaguesi, i cili nuk është subjekt i detyrimit për lëshimin e faturës me TVSH dhe lëshon fatura të tilla, dënohet me gjobë të barabartë me 50 për qind të TVSH-së së dhënë në faturën tatimore të paautorizuar, si dhe me marrjen e 100 për qind të TVSH-së së faturuar padrejtësisht.

Neni 128/1 Dënime të tjera (Shtuar me ligjin nr. 164/2014, datë 4.12.2014; ndryshuar fjalë në shkronjën “a”, shfuqizuar shkronjat “c” dhe “ç” me ligjin 83/2019, datë 18.12.2019) Për shkeljet e konstatuara në rastin kur përgjegjës për TVSH-në është personi i tatueshëm blerës nëpërmjet “autongarkesës së TVSH-së”, aplikohen dënimet si më poshtë:

a) Me gjobë në përputhje me nenin 118, të këtij ligji, kur ky person nuk ka lëshuar faturë me TVSH, në përputhje me legjislacionin në fuqi për faturën dhe sistemin e monitorimit të qarkullimit, por moslëshimi i faturës nuk sjell pasoja në TVSH-në e pagueshme.

b) Me gjobë në përputhje me nenin 124, të këtij ligji, kur vepron sipas shkronjës “a”, të këtij neni, por, në këtë rast, moslëshimi i faturës sjell pasoja në TVSH-në e pagueshme.

c) Shfuqizuar.

ç) Shfuqizuar.

Neni 128/2 Dënimet për mosngarkim ose ngarkim të pasaktë të numrave IMEI te Baza e të Dhënave (Shtuar me ligjin nr. 99/2015, datë 23.9.2015) Çdo tatimpagues që nuk ngarkon të dhënat e numrave IMEI të telefonave celularë ose ngarkon informacion të pasaktë dënohet me një gjobë prej 30 000 (tridhjetë mijë) lekësh për çdo mosngarkim /ngarkim jo të saktë.

Neni 128/3 Dënimet për certifikimin e deklaratave tatimore nga audituesit (Shtuar me ligjin nr. 99/2015, datë 23.9.2015; ndryshuar me ligjin nr. 112/2016 datë 3.11.2016) Në rast se nga kontrolli i bërë nga administrata tatimore tek tatimpaguesit, deklaratat tatimore të të cilëve janë certifikuar nga kompanitë certifikuese, sipas pikës 4, të nenit 80, të këtij ligji, se janë në përputhje me legjislacionin fiskal, rezulton detyrim tatimor, kompania certifikuese dënohet me një gjobë, në masën 50 për qind të detyrimit tatimor të ngarkuar tatimpaguesit.

Neni 129

Dënimet për tatimpaguesit, që janë banka apo institucione financiare (Ndryshuar shkronja “ ç” e pikës 1 me ligjin nr. 164/2014, datë 4.12.2014; shtuar një fjali në fund të shkronjës “ç” me ligjin nr. 97/2018, datë 3.12.2018; shtuar shkronja “d” me ligjin 83/2019, datë 18.12.2019)

1. Shkeljet e mëposhtme, të kryera nga bankat dhe institucionet e tjera financiare, që kryejnë operacione bankare, kur nuk përbëjnë vepër penale, përbëjnë kundërvajtje administrative dhe dënohen me gjobë si më poshtë:

a) 50 000 lekë për çdo shkelje, për hapjen e llogarive, për pagesa ose forma të tjera transaksionesh bankare/financiare për personat fizikë dhe juridikë, pa dokumentin zyrtar, që konfirmon numrin e identifikimit të tatimpaguesit;

b) 40 000 lekë për çdo shkelje për mosrespektimin e afatit të njoftimit të administratës tatimore për hapjen nga tatimpaguesi të llogarive, të pagesave ose forma të tjera transaksionesh bankare/financiare;

c) 125 për qind të interesit ndërbankar të Bankës së Shqipërisë, të llogaritur për çdo ditë, deri në transferimin e pagesës në buxhet, për mostransferimin e pagesave nga tatimpaguesi në buxhet, brenda një dite pune nga dorëzimi i urdhrit të transferimit nga tatimpaguesi;

ç) kur banka nuk bllokon shumën e kërkuar, ajo paguan gjobë të barabartë me 0,2 për qind në ditë të detyrimit të pambajtur, por jo më pak se 100 000 (njëqind mijë) lekë në ditë. Në çdo rast, shuma e gjobës që zbatohet nuk mund të jetë më e madhe se shuma e kërkuar për t’u bllokuar.

d) 100 000 lekë për çdo rast, nëse banka apo institucioni financiar që ofron shërbime të pagesave pa para në dorë të e-Faturave të lëshuara nga subjekti, i cili ka zbatuar procedurën e fiskalizimit, nuk e regjistron pagesën e kryer, si dhe për këtë pagesë nuk e njofton administratën tatimore nëpërmjet sistemit elektronik, menjëherë pas pagesës, në përputhje me ligjin që rregullon faturën dhe sistemin e monitorimit të qarkullimit.

Neni 130

Mosafishimi i çmimeve të shitjes (Ndryshuar me ligjin nr. 99/2015, datë 23.9.2015; ndryshuar me ligjin nr. 112/2016, datë 3.11.2016) Mosafishimi i çmimeve të shitjes së mallrave apo shërbimeve dënohet me gjobë me 100 000 (njëqind mijë) lekë për tatimpaguesit e tatimit mbi fitimin korporativ dhe 50 000 (pesëdhjetë mijë) lekë për tatimpaguesit e tjerë.

Ministri i Financave përcakton me udhëzim rastet kur për natyrën e aktivitetit përmbushja e detyrimit për afishimin e çmimeve të shërbimeve nuk mund të ushtrohet.

Neni 131

Veprat penale (Ndryshuar me ligjin nr. 164/2014, datë 4.12.2014; shtuar pikat 3 dhe 4 me ligjin nr. 99/2015, datë 23.9.2015; shfuqizuar pika 4, me ligjin nr. 112/2016 datë 3.11.2016)

1. Personi, i cili, për çdo tatim të vendosur nga një ligj tatimor, kryen ndonjërën nga veprat që vijojnë, dënohet në përputhje me Kodin Penal kur:

a) me dashje përpiqet të kryejë evazion tatimor;

a/1) kryen evazion tatimor siç parashikohet në pikën 2, të nenit 116, të këtij ligji.

b) me dashje nuk mbledh detyrimin tatimor dhe kontributet e sigurimeve shoqërore dhe shëndetësore ose nuk i paguan ato në buxhet.

c) me dashje fsheh ose shkatërron libra dhe regjistrime, dokumente, deklarata apo informacion tjetër të rëndësishëm për detyrimin tatimor;

ç) me dashje dorëzon dokumente, deklarata tatimore ose informacion të falsifikuar;

d) me dashje nuk i bindet një kërkese me shkrim për t’u paraqitur në organet tatimore;

dh) me dashje ndërhyn në vlerësimin ose mbledhjen e tatimit;

e) kërcënon ose kryen shkelje ndaj një zyrtari tatimor;

ë) në bashkëpunim me një zyrtar tatimor, paguan ose pranon ryshfete;

f) i ofron ryshfet një zyrtari tatimor;

g) me dashje jep informacion tatimor në mënyrë të paautorizuar me ligj ose rregullore.

2. Administrata tatimore bën kallëzim penal në prokurori për çdo shkelje të parashikuar në pikën 1 të këtij neni.

3. Përjashtimisht, për tatimpaguesit, të cilët, deri në datën 31.12.2015, me vullnetin e tyre deklarojnë dhe për pasojë korrigjojnë një deklaratë tatimore të plotësuar qëllimisht gabim, në kushtet e nenit 116 të ligjit, pavarësisht periudhës tatimore që i përket kjo deklaratë, paguajnë tatimin dhe kamatëvonesat, sipas nenit 76, të këtij ligji, administrata tatimore, në përputhje me këtë nen, nuk do të bëjë kallëzim penal. Korrigjimi, i cili përfshin tatimin e papaguar dhe kamatëvonesat, do të vetëdeklarohet nga tatimpaguesi në deklaratën e muajit korrent, brenda datës 31.12.2015, ose do të kërkojë të bëhet nëpërmjet një rivlerësimi nga administrata tatimore.

Tatimpaguesit nuk përfitojnë nga kjo dispozitë, nëse shkelja, sipas paragrafit të mësipërm, është konstatuar paraprakisht nga administrata tatimore.

4. Shfuqizuar.

Neni 132

Ndjekja e dyfishtë

1. Vendosja e dënimit administrativ, sipas këtij ligji ose një ligji tjetër tatimor, nuk e ndalon administratën tatimore për të paraqitur kallëzim penal në prokurori, për vepra penale tatimore.

2. Përfundimi i një çështjeje penale kundër tatimpaguesit nuk ndalon vendosjen, për të njëjtin tatimpagues, të një dënimi administrativ, sipas këtij ligji ose një ligji tjetër tatimor.

KREU XV DISPOZITA TRANZITORE DHE TË FUNDIT

Neni 133

Efekti në detyrimet tatimore dhe vlerësimet ekzistuese (Shtuar dy paragrafët e fundit me ligjin nr. 10415, datë 7.4.2011; shtuar pika 3 me ligjin nr. 99/2015, datë 23.9.2015; shtuar pika 4, me ligjin nr. 112/2016 datë 3.11.2016) Me hyrjen në fuqi të këtij ligji, zbatohen dispozitat e parashikuara në këtë ligj për të gjitha procedurat e mbetura për mbledhjen e detyrimeve tatimore.

“Tatimpaguesit, të cilët janë të çregjistruar në QKR, por që figurojnë të regjistruar në regjistrat përkatës të administratave tatimore, konsiderohen të çregjistruar nga këto administrata nga data e çregjistrimit të tyre në QKR. Brenda një muaji nga hyrja në fuqi e këtij ligji, administratat tatimore marrin masat për pasqyrimin e këtij veprimi në regjistrat e tyre.

Tatimpaguesve, të cilët kanë bërë kërkesë për çregjistrim në QKR e më pas nuk kanë zhvilluar veprimtari ekonomike, por nuk kanë dorëzuar deklaratat tatimore me vlerë zero dhe, për këtë arsye, janë të evidentuar si debitorë pranë administratës tatimore, u falen gjobat dhe interesat për këtë mosdeklarim.

3. Numërtimi i konstatimeve dhe zbatimi i penaliteteve, të përcaktuara në nenet 119 dhe 122, të këtij ligji, zbatohen nga data e hyrjes në fuqi të këtij ligji.

4. Numërtimi i konstatimeve për zbatimin e penaliteteve të përcaktuara në nenin 122, të këtij ligji, fillon të zbatohet me hyrjen në fuqi të këtij ligji.

Neni 133/1 Rregullime për deklarimet tatimore si pasojë e sistemit të ri të IT-së (Shtuar me ligjin nr. 99/2015, datë 23.9.2015) Tatimpaguesve, të cilët me fillimin e sistemit të ri të IT-së, edhe pse nuk kanë pasur përgjegjësinë tatimore për një tatim apo taksë të caktuar, janë ngarkuar me këtë përgjegjësi dhe, për pasojë, janë evidentuar si debitorë pranë administratës tatimore, deri në datën 31.8.2015, u shfuqizohen gjobat dhe interesat e përllogaritur.

Neni 134

Komisioni i Apelimeve Tatimore

1. Brenda 60 ditëve nga hyrja në fuqi e këtij ligji, përfundojnë të gjitha funksionet e Komisionit të Apelimeve Tatimore.

2. 15 ditë pas hyrjes në fuqi të këtij ligji, Komisioni i Apelimeve Tatimore nuk do të pranojë më depozitimin për shqyrtim të kërkesave të reja.

3. Komisioni i Apelimeve Tatimore shqyrton të gjitha praktikat e depozituara në sekretarinë e komisionit, brenda afatit të parashikuar në pikën 1 të këtij neni.

Neni 135

Nxjerrja e akteve nënligjore (Shtuar pika 2/1 me ligjin nr. 97/2018, datë 3.12.2018)

1. Ngarkohet Këshilli i Ministrave që, brenda 6 muajve nga hyrja në fuqi e këtij ligji, të nxjerrë aktet nënligjore në zbatim të neneve 20 pika 3, 52 pika 2, 55 pika 2, 56 pika 2 dhe 91 pika 5 të këtij ligji.

2. Ngarkohet Ministri i Financave që, brenda 6 muajve nga hyrja në fuqi e këtij ligji, të nxjerrë aktet nënligjore në zbatim të neneve 10 pika 1, 16 pika 5, 21 pika 3, 50 pikat 2 dhe 4, 51 pika 3, 52 pika 1, 53 pika 2, 55 pika 3, 56 pika 1, 64 pika 4, 72 pika 3, 79 pika 2 dhe 80 pika 6 të këtij ligji.

2/1. Ngarkohet ministri përgjegjës për financat për nxjerrjen e aktit nënligjor në lidhje me procedurat dhe kriteret e zbatimit të nenit 71/2, lidhur me përdorimin e metodave alternative të vlerësimit, në rastet e veprimeve për shmangien e tatimit dhe abuzimit me parimet e ligjit tatimor.

3. Ngarkohet Drejtori i Përgjithshëm i Tatimeve që të nxjerrë aktet nënligjore në zbatim të nenit 29 pika 2 dhe të miratojë manualet teknike, manualin e vlerësimit, të investigimit, të shërbimit të tatimpaguesit dhe të masave shtrënguese, si dhe manuale të tjera.

4. Aktet nënligjore dhe manualet botohen edhe në buletinin tatimor dhe janë detyruese për administratën tatimore dhe tatimpaguesit.

5. Buletini tatimor është publikimi zyrtar i Drejtorisë së Përgjithshme të Tatimeve.

Neni 136

Shfuqizime (Shfuqizimet e paragrafit të tretë janë parashikuar me ligjin nr. 83/2019, datë 18.12.2019 dhe ndryshuar fjalë në paragrfin e tretë me ligjin nr. 110/2020, datë 29.7.2020)

1. Me hyrjen në fuqi të këtij ligji, ligji nr. 8560, datë 22.12.1999 “Për procedurat tatimore në Republikën e Shqipërisë”, të ndryshuar, shfuqizohet.

2. Me hyrjen në fuqi të këtij ligji, ligji nr. 7758, datë 12.10.1993 “Për dokumentimin dhe mbajtjen e llogarive për tatimet”, shfuqizohet.

Në momentin e shfuqizimit të neneve 55 dhe 56 të këtij ligji, shfuqizohen udhëzimi nr. 16, datë 3.5.2010, i Ministrit të Financave, “Për administrimin dhe dokumentimin e procedurave të pajisjeve fiskale”, vendimi nr. 781, datë 14.11.2007, i Këshillit të Ministrave, “Për karakteristikat teknike e funksionale të pajisjeve fiskale, sistemit të integruar të kompjuterizuar për transferimet periodike, automatike, të deklarimeve financiare, sistemit të komunikimit, për procedurën e dokumentacionin për miratimin e tyre dhe për kriteret për pajisjen, me autorizim, të shoqërive të autorizuara për ofrimin e pajisjeve fiskale”, i ndryshuar, dhe dispozitat e tjera të ligjeve zbatuese të nxjerra në zbatim të këtij ligji, të cilat janë në kundërshtim me këtë ligj.

Dispozita kalimtare (Shtuar me ligjin nr. 164/2014, datë 4.12.2014, shtuar pika me ligjet: nr. 112/2016 datë 3.11.2016, nr. 31/2019 datë 17.6.2019, nr. 110/2020, datë 29.7.2020, aktin normativ nr. 27, datë 1.7.2021, me aktin normativ nr. 36, datë 24.12.2021)

1. Të gjithë tatimpaguesit që, në datën e hyrjes në fuqi të këtij ligji, rezultojnë mosdeklarues për më shumë se 12 muaj të njëpasnjëshëm, transferohen automatikisht nga regjistri aktiv në regjistrin pasiv të administratës tatimore.

2. Përfaqësuesit tatimorë që janë regjistruar në drejtorinë rajonale tatimore ose do të regjistrohen si të tillë deri më 31.12.2014, në përputhje me nenin 9, të këtij ligji, janë përgjegjës për të paguar detyrimin tatimor për TVSH-në dhe nuk do të çregjistrohen deri në përfundim të përmbushjes së detyrimit të tyre si përfaqësues tatimor.

3. Drejtoria e Apelimit Tatimor kryen funksionet si strukturë e Drejtorisë së Përgjithshme të Tatimeve deri në datën 1 janar 2017. Procedurat për ankimet administrative tatimore në proces përcaktohen me udhëzim të Ministrit të Financave.

4. Drejtoria e Apelimit Tatimor shqyrton dhe merr vendim për të gjitha ankimet administrative tatimore, pavarësisht nga vlera e detyrimeve të apeluara, deri me hyrjen në fuqi të vendimit të Këshillit të Ministrave për përbërjen dhe procedurat e funksionimit të Komisionit për Shqyrtimin e Apelimit Tatimor.

5. Tatimpaguesit e regjistruar pranë Qendrës Kombëtare të Biznesit/administratës tatimore janë të detyruar të hapin llogarinë bankare, jo më vonë se 90 ditë nga hyrja në fuqi e këtij ligji dhe ta deklarojnë atë në administratën tatimore.

6. Pajisjet fiskale, të ofruara nga shoqëritë e autorizuara, me të cilat janë pajisur tatimpaguesit para hyrjes në fuqi të këtij ligji, do të vijojnë të funksionojnë dhe të mirëmbahen nga këto shoqëri për aq sa nuk bien në kundërshtim me ligjin nr. 87/2019 “Për faturën dhe sistemin e monitorimit të qarkullimit”.

Deri në datën e fillimit të efekteve juridike, sipas nenit 48 të ligjit nr. 87/2019, shoqëritë që kanë qenë të autorizuara, sipas vendimit nr.781, datë 14.11.2007, të Këshillit të Ministrave, të ndryshuar, dhe iu ka përfunduar afati i autorizimit përpara apo gjatë periudhës kalimtare, vazhdojnë të ofrojnë shërbimin e mirëmbajtjes së pajisjeve fiskale për tatimpaguesit. Përcaktimet e këtij paragrafi nuk përjashtojnë përmbushjen e detyrimeve sipas ligjit nr. 87/2019.

7. Përjashtimisht parashikimeve në këtë ligj, për kundërvajtjet administrative që lidhen me afatet e hyrjes në fuqi dhe zbatimin efektiv të ligjit nr. 87/2019, “Për faturën dhe sistemin e monitorimit të qarkullimit”, të ndryshuar, zbatimi i sanksioneve do të fillojë të aplikohet pas datës 1 janar 2022.

8. Përjashtimisht parashikimeve në këtë ligj, zbatimi i sanksioneve për kundërvajtjet administrative që lidhen me zbatimin efektiv të ligjit nr. 87/2019, “Për faturën dhe sistemin e monitorimit të qarkullimit”, të ndryshuar, do të fillojë të aplikohet pas datës 30.6.2022, për tatimpaguesit, si më poshtë:

a) tatimpaguesit e regjistruar me përgjegjësinë tatimore të tatimit mbi të ardhurat personale nga biznesi dhe që nuk janë të regjistruar për TVSH-në, të cilët kryejnë vetëm shitje me para në dorë kundrejt konsumatorëve finalë, persona të patatueshëm;

b) tatimpaguesit që ofrojnë furnizimin me ujë për konsumatorët finalë, si dhe tregu i rregulluar i energjisë elektrike;

c) bankat apo institucionet financiare për njoftimin e pagesave të e-Faturave të lëshuara nga subjektet tatimpaguese.

Neni 137

Hyrja në fuqi Ky ligj hyn në fuqi 15 ditë pas botimit në Fletoren Zyrtare.

Shpallur me dekretin nr. 5749, datë 9.6.2008 të Presidentit të Republikës së Shqipërisë, Bamir Topi